POU TIUTE A LEOLEO

Pago Pago - AMERIKA SAMOA

MOLIA SE ALII 20 TAUSAGA I LE PISA I LUMA O FALE O AIGA

O le aso 26 o Tesema, 2024, na ripotia atu ai e se alii, i le Ofisa a Leoleo i Fagatogo, ia se fusuaga a ni alii e to’alua i luma o se faleoloa i Pago Pago.  Ma na ta’ua e le alii na valaau atu i le ofisa a leoleo le tau le mafai ona taofiofi o se tasi o le to’alua ia o lo’o fufusu, ma ia tu’iina le fa’amalama a le faleoloa.

Na agai atu leoleo i le nofoaga na tupu ai le faalavelave ma molimauina ni tagata se to’a 12 o lo’o tu tu mai i luma o le faleoloa.  Ae ina ua iloa mai e le susuga ia AJ Talauega (o ia lea na molia i lenei faalavelave) ia le taunu’u atu a leoleo, sa ia sola ese loa ma le nofoaga na tupu ai le faalavelave.

Ae na tuliloaina o ia e leoleo ma lokaina mai o ia, ma aveina atu i le ofisa a leoleo mo le faatinoina o a latou tiute.

 E tusa ai ma le faamatalaga a le alii na fufusu ma Talauega, sa fiu e fa’afilemu ia Talauega ona ua fa’asuaava ma nap isa leotele ma ‘e’e solo i luma o le fale a le tina matua a le alii na fufusu ma Talauega, ma o le mafuaaga lena o le la fusuaga.

Sa molia Talauega i le Faatupu Vevesi i nofoaga lautele, o se vaega ‘B’ o solitulafono mama,e mafai ona nofosala ai i le falepuipui i le ono masina, po o se sala tupe e $500; po o faasalaga uma e lua.

E leai se vaegatupe na faatulagaina e tatalaina ai i tua le na molia, e faatalitali ai lona faamasinoga.

MOLIA SE ALII I LE FAAMISA I NISI O LE ‘AUMAGA A’O FAATINO O LATOU TIUTE FA’ALENU’U

O le afiafi o Tesema 22, 2024 na fa’afeso’ota’i ai e se tamaitai ia le Ofisa a Leoleo i Fagatogo, mo se fesoasoani i le ave’esea o le susuga ia Mikey Tipoti (lea na molia i lenei faalavelave), mai lo latou fale.

Ma sa ta’ua e le tamaitai le sauaina e le na molia, o lona tua’a.  Ina ua taunu’u leoleo i le nofoaga na tupu ai le faalavelave, ua le toe iai Tipoti, ae o se taimi mulimuli ane, na pu’eina ai o ia e leoleo.

E tusa ai ma fa’amaumauga, ina ua taunu’u leoleo i le fale o le aiga na tupu ai le faalavelave, sa faamatalaina iai e le tamaitai na valaau i le ofisa a leoleo, le ita o Tipoti i lona tua’a, ona o lona taumafai e taofi lana taavale.

Ina o agai atu leoleo, sa oso Tipoti i lana taavale ma sola ese ai, ae na mafai ona pu’eina ma taofi e leoleo lana taavale i luma o le StarKist ma lokaina mai ai Tipoti.

 E tusa ai ma le molimau lona na iai i le taimi na tupu ai le faalavelave, sa ia ta’ua le amataina o le latou fe’ese’esea’iga ma Tipoti i le aso Lua o lea vaiaso, i le taimi o le latou leoleoga i le sa a le nu’u.  Sa ta’ua e le molimau, le ki i luga e le ua molia ma ana uo ia le musika o le latou ta’avale, i taimi o le sa. 

Sa ta’ua foi e le molimau, o nisi afiafi i taimi o le sa, e masani ona alu atu le ua molia i lana ta’avale, ona fa’asaoasaoa atu lea agai ia te ia, ona toe ta ese lea pe a toeititi lava ona so’a o ia e le taavale a Tipoti.  Ma sa fa’aauau ai lava ona faia e Tipoti lea tulaga, se’ia o’o i le afiafi o le aso Toonai lea na tupu ai le faalavelave.

E tusa ai ma le faamatalaga a le molimau, na la o atu ma lona tama i le tulafono (father-in-law) e teuteu ia le auala i moli Kerisimasi ae alu atu le ua molia ma tu i luma o lona ‘father-in-law’, lea ua fai sina mamao teisi atu.  Ma na va’aia e le molimau le u’uina e le tagata o ana moto ma tu, e foliga mai o le a ia tu’iina lona ‘father-in-law’.

Sa ta’ua e le molimau ia le fetaui o lona o’o atu ae sasau loa le tu’i a le na molia, agai i lona ‘father-in-law’ ae na mafai ona ia polokaina, ma amata ai loa le la fusuaga ma le ua molia, ae tamomo’e atu nisi na iai i lena taimi ma taumafai e vaovao le la fusuaga.

Na molia Tipoti i le Faatupu Vevesi i Nofoaga Faitele ma le Fa’ao’o’olima i lona tulaga e tolu.  O le moliaga o le faatupu vevesi, o se vaega ‘B’ o solitulafono mama, e mafai ona nofosala ai i le falepuipui mo le ono masina po o se sala tupe e $500; po o faasalaga uma e lua.  Ae o le moliaga o le Fa’ao’olima, o se vaega ‘A’ o solitulafono mama, e mafai ona nofosala ai i le falepuipui i  le tausaga atoa, po o se sala tupe e $1,000; po o faasalaga uma e lua.

E $1,000 se vaegatupe na faatulagaina e mafai ona tatalaina ai le na molia, e faatalitali ai lona faamasinoga.