POU TIUTE A LEOLEO

Pago Pago - AMERIKA SAMOA

OVA LE TAGO I LE ‘AVA MALOSI + TAUFA’AMATA’U I SE TAMAITAI = LOKA I LE FALEPUIPUI

O le po o le aso Kerisimasi o le tausaga na se’i mavae atu, sa faapea ona lokaina ai le susuga ia Anesone Lama, ina ua fa’afeso’ota’i e se tamaitai le Ofisa a Leoleo i Tafuna, ona o le fa’atupu vevesi o Lama i lo latou aiga ma lona fa’afefeina o le tamaitai, i se agaese.

Sa agai atu leoleo i le nofoaga na tupu ai le faalavelave ma va’aia le taoto mai o le na molia, i luga o le mutia ma na faapea loa ona lokaina mai o ia e leoleo.  Na sosogia e leoleo ia le malosi o le manogi o le ‘ava malosi mai i le na molia.

Sa fa’atalanoaina e leoleo ia le tamaitai sa valaau atu i le latou ofisa ma sa ia ta’ua le fo’i atu o Lama i le fale, ae ua tau i lona ua, ma amata ona palauvale solo ma fa’amata’uina le tipi o lona ulu i se agaese.  Ma na tamo’e mai se tasi o tuaoi ma taofiofi le na molia, ina ua ia taumafai e tu’i le tamaitai sa valaau i le ofisa a leoleo.

O iina na savali ese atu ai Lama ma palasi i luga o le vao.

Sa ta’ua foi e le tamaitai na valaau i le ofisa a leoleo, e le o se taimi muamua lea ua faia ai e le na molia, ia se tulaga faapea.

Na faatalanoaina foi e leoleo ia se molimau ma sa ia faamatalaina foi le tulaga e tasi, i le toe fo’i mai o Lama i le fale ma amata ona palauvale i le tamaitai na a’afia ma ana tuaoi ma sa ia fa’afefeina foi le tamaitai i se agaese.  Ona savali atu lea ma taoto i luga o le mutia ma moe ai.

O moliaga na tu’ua’ia ai Lama, na aofia ai le Fa’atupu Vevesi i totonu o le aiga ma le Fa’ao’olima i lona tulaga e tolu.

O le moliaga o le faatupu vevesi, o se vaega ‘B’ o solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘A’ o solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

E leai se tupe sa faatulagaina e tatalaina mai a ii tua le na molia, e faatalitali ai lona faamasinoga.

SOLA SE ALII NA A’AFIA I SE FAALAVELAVE TAU TAAVALE

E tusa ai ma fa’amaumauga a le faamasinoga, o le taeao o le aso 20 o Tesema, 2024, na taunu’u ai se valaau i le Ofisa a Leoleo i Fagatogo, e tusa ai ma se faalavelave tau taavale, na tupu i le va o Amaluia ma Auma, ma manunu’a ai ni tamaiti ma se tina ma’itaga.

E ui ina sa sola le na molia i lenei faalavelave, ae peitai sa mafai ona pu’eina o ia e leoleo, i se taimi mulimuli ane.

O lo’o ta’ua i fa’amaumauga a le faamasinoga, le faamatalaina e le aveta’avale sa fa’afoeina le taavale sa agai atu i le itu i Sasa’e, lona o’o mai i le pioga i le va o Amaluia ma Auma, ae ona va’aia le taavale a le ua molia, le susuga ia Tausagafou Puaaniu, o lo’o masau atu i le itu o le auala lea o lo’o sau ai le taavale a le na a’afia.  

E ui ina sa ia o’omi le vae taofi o le taavale, ae peitai, na fa’aauau pea ona alu sa’o atu le taavale a Puaaniu, ma so’aina le taavale a le na a’afia.

Sa alu atu Puaaniu ma fesili atu po o manu’a se tasi, ona sola ese lea ae tia’i lana taavale.  Na ta’ua e le aveta’avale na a’afia, e to’afa lana pasese ma sa manunu’a uma.  Sa aveina uma atu i latou e le vaega a le EMS i le falema’i i Faga’alu mo togafitiga.

O lo’o ta’ua foi i fa’amaumauga a leoleo, le molimauina o se apa pia i totonu o le taavale a le na molia ma sa fa’ailoa atu e i latou na iai i le nofoaga ma le taimi na tupu ai le faalavelave, ia le suafa o Puaaniu ma le nu’u e sau ai (Se’etaga).

E  le’i maua atu e leoleo ia Puaaniu i lo latou fale, ae sa fa’ailoa mai e ona tuaoi, o lo’o tamo’e agai i luga o le mauga.  Na faapea ona taumafai leoleo e mulimuli i le auala na tamo’e agai iai Puaaniu, ae peitai, na toe fo’i mai ona o le puipuiga o lo latou saogalemu.

Sa faapea ona agai atu foi leoleo i le falema’i e faia sa latou ripoti e tusa ai ma le pasese na manunu’a mai i le faalavelave.  O i latou ia na aofia ai se teineititi e 13 tausaga, o se tamaititi e 4 tausaga  le matua, o se tina ma’itaga e 33 tausaga ma na taofia o ia i le potu failele, faapea ma se tamaititi 3 tausaga sa taofia i le potu mo fanau iti.

O le aoauli o lea lava aso, na va’aia ai e se tasi o tuaoi a le na molia, ia lona oso i totonu o se pasi togipau a StarKist ma na taofia e leoleo le pasi, ma lokaina mai ai Puaaniu.

Na fa’amaonia e Puaaniu i leoleo lona faafoeina o le taavale, ae sa sola ese ona o lona fefe, ina ne’i fasi o ia e tagata sa iai i le taimi na tupu ai le faalavelave.

I su’esu’ega a le Faamasinoga Faaleitumalo, sa fa’amaonia ai le fa’aleaogaina o le laisene avetaavale a Puaaniu.

O moliaga ua faia e faasaga i le na molia, na aofia ai le Avetaavale le Faautauta na manunu’a ai nisi, o le avetaavale a’o fa’asuaava, sola ese mai i le nofoaga na tupu ai le faalavelave, le fa’ailoa i ofisa inisiua ia se faalavelave ma le tagofia o ‘ava malolosi i se nofoaga faasaina.

O moliaga o le avetaavale le faautauta ma le moliaga o le sola ese mai i le nofoaga o le faalavelave, o se vaega ‘A’ o solitulafono mama, e mafai ona nofosala ai i le falepuipui mo le ta’i tasi tausaga; po o se sala tupe e $1,000; po o faasalag auma e lua.

O moliaga o le le logoina o ofisa inisiua faapea ma le tagofia o ‘ava malolosi i nofoaga faasaina, o ni vaega ‘B’ o solitulafono mama, e mafai ona nofosala ai i le ta’i ono masina mo le moliaga e tasi, po o se sala tupe e ta’i $500 i le moliaga; po o faasalaga uma e lua.

Ae o le moliaga o le avetaavale le fa’autauta ma tula’i mai ai se faafitauli na manunu’a pe maliliu ai nisi, o se vaega ‘D’ o solitulafono mamafa, e mafai ona nofosala ai i le falepuipui i le va o le 90 aso ma le lima tausaga, po o se sala tupe e $5,000; po o faasalaga uma e lua.

E $15,000 le vaegatupe na faatulagaina e tatalaina ai le ua molia, e faatalitali ai lona faamasinoga.