POU TIUTE A LEOLEO

Pago Pago - AMERIKA SAMOA

OSOFA'I E SE TAMALOA IA SE LEOLEO ONA O LE LOTO MASALOSALO I LONA TO’ALUA

O le aso 21 o Tesema, 2024 na ripotia ai e se tamaitai leoleo (e le i faigaluega i le aso na tupu ai le faalavelave) ia le osofa’i o se alii leoleo, e le to’alua a seisi tamaitai leoleo, e suafa ia Leisale Polevia.

E tusa ai ma fa’amaumauga a leoleo, sa agai atu leoleo i le nofoaga na tupu ai le faalavelave ma lokaina mai Polevia, ma aveina atu o ia i le ofisa a leoleo mo le fa’ataunu’uina o le latou su’esu’ega.

Na muamua ona fa’atalanoaina e leoleo ia le alii leoleo na a’afia ma sa ia faamatalaina lona agai atu e piki mai le tamaitai leoleo (le to’alua a le na molia), ae peitai, na oso mai Polevia ma togi se ‘cone’ i luma o lana ta’avale ma ia fa’atuina loa lana taavale, ae faatonu ia Polevia e ave’ese le ‘cone.

Ae peitai, na savali mai Polevia ma tu’i le pito i tua o lana taavale.  Ma o iina na savali mai ai le to’alua a Polevia (le tamaitai leoleo) ma ta’ita’i ‘ese atu ia le ua molia. 

Sa ta’ua e le alii leoleo na a’afia, e na te le’i iloa o le to’alua lea a le tamaitai leoleo ma sa ia taumafai e fa’avasega ia le tulaga o tupu.  Ae ina ua latalata atu i le ua molia ma le tamaitai leoleo, sa a’apa mai le ua molia ma u’u atu le kola o lona ofu, ma na ia va’aia le pa’u i lalo o le tamaitai leoleo (le to’alua a le na molia), ma o iina na fufusu ai loa le leoleo ma le ua molia.

Ae na toe oso mai le to’alua a le ua molia (le tamaitai leoleo) ma toso atu le ua molia ma fa’atonu le alii leoleo na a’afia, e alu e piki mai seisi tamaitai leoleo (o ia lea na fa’afeso’ota’ina le ofisa a leoleo).

Na fa’amatalaina e le tamaitai leoleo (le to’alua a le na molia) na iai se la fe’ese’esea’iga ae e le’i malaga le ua molia e faigaluega.  Ma ina ua vala’au atu le alii leoleo na afaina, o lea ua alu atu e piki mai o ia (le to’alua o le na molia), atonu na lagona e le ua molia ia lea talanoaga, ma amata loa ona savali agai i le auala.

Ma ina ua savali atu le tamaitai leoleo (le to’alua a le na molia) i le auala, sa ia va’aia lona to’alua (lea na molia) o tu mai i luma o le ta’avale a le alii leoleo na a’afia, ma se ‘cone’ i lona lima.  O lea na ia faatopetope atu ai ma toso ese mai lona to’alua (lea na molia) mai i le taavale.

Sa va’aia foi e le tamaitai leoleo (le to’alua a le na molia) ua savali atu le alii leoleo na a’afia, o lea na ia fa’atonuina ai o ia e alu e piki mai leisi tamaitai leoleo, lea e latou te galulue faatasi.  Ae peitai, e le’i usita’i le alii leoleo na a’afia, ma o le mafuaaga lea na o la fufusu ai ma lona to’alua.

Na ta’ua fo’i e le tamaitai leoleo (le to’alua a le na molia) lona taumafai e vaovao le misa a lona to’alua ma le alii leoleo na a’afia.  Ma na ia ta’ua foi lona faatonu fa’afia o le alii leoleo na a’afia, e alu ‘ese loa, ae atonu e le’i silafia e le alii leoleo na a’afia, o le tagata lea e la te fufusu, o lona (tamaitai leoleo) to’alua.

Sa ta’ua foi e le tamaitai leoleo (le to’alua a le na molia), ana le feosofi atu nisi na iai i le taimi o le fusuaga ma vaovao le misa a lona to’alua ma le alii leoleo sa a’afia, semanu, e le alu ‘ese le alii leoleo e piki ia leisi tamaitai lea e latou te faigaluega faatasi.

Sa faatalanoaina foi e leoleo ia le tamaitai leoleo lea na valaau atu i lo latou ofisa ma sa ia ta’ua ia lona le iai i le taimi na tupu ai le misa.  Ae ina ua o’o atu le alii leoleo na a’afia ma piki mai o ia, sa ia va’aia le iai o se mea o mamafa i lona mafaufau ma le faatopetope e piki mai o ia.

Ina ua ia fesiligia le alii leoleo na a’afia, sa faamatala ane e le alii leoleo ia te ia, le la fusuaga ma le to’alua a le tamaitai leoleo lea na alu muamua e piki mai.  Ma ina o la toe fo’i atu i le fale o le tamaitai leoleo (le to’alua o le na molia), sa tau’ai mai le la ta’avale e le ua molia.  Ma toe solomuli ai le la taavale ma la o tu tu mai i luma o se faleoloa lata ane.

I le fa’atalanoaga o Polevia (lea na molia) sa ia ta’ua le tupu o se fe’ese’esea’iga i le va o ia ma lona toalua i lea aso, ma ia savali ese ai, agai i le alatele.  Ma sa ia u’uina se ‘cone’ ma togi i luga o le auala, ae na te le’i va’aia le agai atu o le taavale a le na a’afia.  Ina ua tu le taavale, sa va’aia e Polevia (lea na molia) ia le faasino o le avetaavale i le ‘cone’ ma faatonu o ia e ave’esea mai luga o le auala.

Ae ina ua ia (Polevia) tilotilo i totonu o le taavale, sa ia iloa atu ai se toniga leoleo ma ia iloa ai le tagata lea o lo’o i totonu o le taavale.

Na ta’ua e le na molia, le iai o sona masalosaloga i le va o lona to’alua ma le alii leoleo sa i totonu o le taavale, ma na oso ai lona ita.  Ina ua o’o atu i le itu o iai le aeta’avale, sa ia tu’iina le taavale ma taumafai e tatala le faitoto’a o le taavale.  Ae na u’una’i o ia i tua e lona to’alua.

Sa ia va’aia le savali atu o le na a’afia ma ia oso mai ai loa i le kola atu ma amata ai loa ona avau le la fusuaga.  Na vaovaoina le la misa e ni tagata sa iai i lena taimi.  Ma na ia toe fo’i atu ma fa’aauau le la taugaupu ma lona to’alua.

Sa ta’ua e Polevia le ‘ese o ona manatu ina ua ia va’aia le alii leoleo na a’afia, o alu atu e piki mai lona to’alua i se taavale tua.  Ma na pau le tulaga i lona mafaufau, o le fia pa’i i le na a’afia.  Na te’ena foi e Polevia ia tu’uaiga i lona tau’aia o le taavale ina ua toe fo’i atu.

O moliaga o Polevia, na aofia ai le Faatupu Vevesi i Nofoaga Lautele, o le Fa’ao’olima i lona tulaga e tolu faapea ma le Faaleagaina o mea totino, i lona tulaga e tolu.

O le moliaga o le faatupu vevesi ma le faaleagaina o mea totino, o se vaega ‘B’ i soligatulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

Ae o le moliaga o le fa’ao’olima, o se vaega ‘C’ o solitulafono mama, e mafai ona nofosala ai i le falepuipui mo aso e sefululima, po o se sala tupe e $300; po o faasalaga uma e lua.

E $2,000 se vaegatupe na fa’atulagaina mo le toe tatalaina ai o le molia mai i le falepuipui, e faatalitali ai lona faamasinoga.

MOLIA SE ALII NA FA’AO’OLIMA I SE TAMAITAI NA ALU MA AVE SE IPU MEAAI MAI LONA FALE

O le po o Tesema 14, 2024 na vala’au ai se tamaitai i le Ofisa a Leoleo i Tafuna ma ripotia ia se alii e suafa ia Tauasosi Fa’apale, i le sasaina o ia i se ipu uga i luma o lona fale, ma manu’a ai lona ulu.

E tusa ai ma faamaumauga a le faamasinoga, sa aga’i atu leoleo i le nofoaga na tupu ai le faalavelave ma va’aia le tamaitai na a’afia o tu mai ma lona ulu o lo’o tafe mai ai le toto faapea ma ni ma’osia i lona lima

Ae na fiu leoleo e saili ia Fa’apale (lea na molia), ae sa le’i mauaina o ia.

Na faapea loa ona malaga atu leoleo ma le tamaitai na a’afia, i le ofisa a leoleo mo le fa’aauauina o su’esu’ega a leoleo aemaise ai le togafitia o ia e le vaega a le EMS.

Sa faamatalaina e le tamaitai na a’afia, i leoleo, o se taimi muamua lenei ua faia ai e Faapale, (o sana uo) ia lea tulaga ia te ia.

Sa ta’ua e le tamaitai na a’afia, na alu i le fale a Faapale i lea aso, ona sa faia ai se pati o le aso fanau a se tasi o ana uo.  Ma sa ia fa’ameaalofaina i lana uo se tupe e $20, ae o le taimi lea, o lo’o iai Fa’apale i totonu o le umukuka, i le kukaina o meaai.

Na ta’ua e le tamaitai, lona savali mai i fafo e toe fo’i i lona fale, ma se ipu mea’ai, ae taofia o ia e le ua molia, i luma o le fale, ma tatu’i lona ulu ma ona foliga.  Ina ua ia taumafai e toe fa’afo’i  le ipu meaai ia Faapale, ae sa ia tago i le sasa ai lona ulu, lea na lavea ai lona ulu.

O le mae’a o le sauniga a Faapale, sa fa’ailoa atu ai e le tamaitai na a’afia, lona valaauina o leoleo, ae tali mai le ua molia, ia lona le popole iai.

Ma o lea na savali ai le tamaitai na a’afia i le isi itu auala, i luma o se fale suisui, e faatalitali ai leoleo.  Sa ia ta’ua foi, ia lona le malamalama i le mafua’aga na fasi ai o ia e le ua molia, ae o lo’o iai sona masalosaloga atonu ai ona ua ia alu ma ave le ipu meaai.

Na molia ia Faapale i le Fa’ao’olima i lona tulaga e tolu faapea ma le Faatupu Faalavelave i totonu o le aiga.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui mo le tausaga atoa, po o se sala tupe e $1,000; po o faasalaga uma e lua.

Ae o le moliag ao le faatupu vevesi, o se vaega ‘C’ i solitulafono mama, e mafai ona nofosala ai i le falepuipui i aso e sefululima, po o se sala tupe e $300; po o faasalaga uma e lua.

E $2,000 se vaegatupe na fa’atulagaina e tatalaina ai le ua molia, e faatalitali ai lona faamasinoga.