POU TIUTE A LEOLE

Pago Pago - AMERIKA SAMOA

MOLIA SE AVETAAVALE NA FAI TULIGA MA LEOLEO

O le vaveao o le aso 14 o Iuni, 2025, sa fai ai se tuliga a leoleo ma se pikiapu, i Tafuna, ina ua musu le avetaavale e fa’atu mai lana taavale, i le taofiga e leoleo.  Ae sa mafua ona taumafai leoleo e fa’atu le taavale lea, ona sa maitauina le agai mai o le pikiapu, ae o lo’o nonofo uma i luga, i tua o le ta’avale, ia le pasese. 

Na fiu leoleo e faatonu le alii avetaavale, tauala atu i masini faaleotele a leoleo, e fa’atu le taavale, ae peitai, sa le’i amanaia mai e le aveta’avale, e pei ona ta’ua i fa’amaumauga a le faamasinoga.  

Ina ua o’o atu le tuliga i Fagaima, sa molimauina e leoleo le aveina ma le le fa’autauta o le taavale a le na molia, a’o feoa’i tagata i luga o le ala savali, i tafatafa o le aualatele.

Na fa’aauau atu le tuliga i Ottoville, lea na fa’ato’a malie ai loa le loto a le na molia, ma fa’aafe loa i tua lana taavale, ae oso i fafo ma taumafai e sola ‘ese.  Ua tu’u nei taavale, ae ua fai vae tuliga a leoleo ma le na molia.  Sa mafai ona pu’eiina le na molia, e leoleo ae sa le’i tu’u ai lona taumafai e sola ‘ese mai a’ao o leoleo, a’o taumafai leoleo e loka ona lima.

O lo’o ta’ua i fa’amaumauga a le malo le malosi o le manogi pia o le na molia, i le taimi o le faalavelave ma sa aveina atu o ia i le ofisa a leoleo i Tafuna mo le fa’atalanoaina, a’o fa’afoeina atu e se tasi o sui malu a le malo, ia le pikiapu a le na molia.

Ina ua taunu’u le faigamalaga i le ofisa a leoleo, sa taumafai leoleo e tapa se laisene avetaavale po o se ID, a le na molia, ae peitai, e leai sana laisene na ia te ia.  Sa ta’ua e le na molia, na le toe aoga lona laisene avetaavale talu mai le tausaga 2023.

Sa faapea loa ona aveina atu le na molia ma lokaina i le to’ese i Tafuna, e faatalitali ai lona faamasinoga.

Na faamaonia i su’esu’ega a leoleo le suafa a le na molia, o le susuga ia Tresil Fepuleai, e 33 tausaga, mai i Samoa.

O ona moliaga, na aofia ai lona Sola mai leoleo, o le moliaga o le Aveta’avale le fa’autauta, o le moliaga o le leai o sona laisene avetaavale, atoa ai ma le Moliga, i lona tete’e atu i leoleo a’o latou taumafai e ave faapagotaina o ia.

O moliaga o le sola mai leoleo, aveta’avale le fa’autauta ma le leai o se laisene avetaavale, o ni vaega ‘B’ i solitulafono mama, e mafai ona nofosala ai i le falepuipui, e o’o atu i le ta’i ono masina.  Po o se sala tupe e ta’i $500.  Po o fa’asalaga uma e lua.

O le moliaga o le tete’e atu i leoleo, o se vaega ‘A’ i solitulafono mama,e  mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

E $3,000 sa fa’atulagaina e mafai ona tatalaina ai Tresil mai i le falepuipui, e faatalitali ai lona faamasinoga.

FAI SE TAU’AIGA MA’A A SE TAMA MATUA MA SE ALII TALAVOU 

O le po o Iuni 17, 2025 na o’o atu ai se tama matua i le Ofisa a Leoleo i Fagaitua, e ripotia le sauaina o ia e se alii talavou, ma molia uma ai i la’ua.

E tusa ai ma faamaumauga a le faamasinoga, na o’o atu le tama matua i le ofisa a leoleo, ma ia talosagaina se fesoasoani a leoleo, ina ua manu’a ma i le la vevesiga ma le alii talavou.

Sa ta’ua e le tama matua, lea na alu atu i le ofisa a leoleo, ua fula ma manu’a le itu tauagavale o lona muaulu, o le alii talavou na o la pisa, o sona tuaoi.  Ma na togiina e le alii talavou o ia i se ma’a ma tau i lona ulu.  Sa ia fa’ailoa atu foi i leoleo, o le a ia alu i le falemai e togafitia ona manu’a, pe a mae’a ona fai lana ripoti i leoleo.

Sa faapea ona agai atu leoleo i le nofoaga na tupu ai le faalavelae, e su’e le alii talavou na a’afia.  Ma na toe fo’i atu leoleo i le ofisa a leoleo, ma le alii talavou faapea ma lona tina.

Na faapea foi ona faatalanoaina e leoleo ia le toatele o tuaoi ma nisi sa molimauina le faalavelave na tupu.  O le to’atele o molimau, na fa’ailoa atu i leoleo, o le mafuaaga o le faalavelave, o le tama matua, ina ua na ia palauvale i le alii talavou, i luma o se faleoloa.

Ma sa avea le palauvale o le tama matua i le alii talavou, ma mafuaaga na alu atu ai le alii talavou ma se la’au i le tama matua, a’o i luma o lona (tama matua) fale.  E le gata i lea, sa faapea ona ‘e’e le tama matua ma togi le alii talavou.  Ona faapea lea ona tau’ai e le tama matua ia le alii talavou i ni ma’a, ma amataina ai se tau’aiga ma’a i lo la va ma le alii talavou.

Sa faate’ia le toatele o tuaoi i le faalavelave na tupu ma o laou taumafai e fa’ato’ato’a le mataupu.  Ae i le fa’aauauina o su’esu’ega a leoleo, sa fa’aalia ai le tupu o lenei fa’alavelae, ona o se fe’ese’esea’iga i le va o le aiga potopoto ma tuaoi.

Na faapea ona momoliina atu le tama matua i le to’ese i Tafuna ae ave le alii talavou i le nofoaga o lo’o taofia ai fanau talavou, ua solia le tulafono, e faatalitali ai o la faamasinoga.

O moliaga a le tama matua, na aofia ai le Faatupu Vevesi i nofoaga faitele ma le Fa’ao’olima i lona tulaga e tolu.

O le moliaga o le faatupu veevsi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu I le tausaga atoa, po o se sala tupe e $1,000; po o faasalaga uma e lua.

E $500 se vaegatupe na fa’atulagaina, e mafai ona tatalaina ai le na molia, mai i le falepuipui, e faatalitali ai lona faamasinoga.