POLOKALAMA FOU SUESUEGA MA TOGAFITIGA O LE MA’I SUKA - “TAUSI MATUA”

Pago Pago - AMERIKA SAMOA

O  le polokalama fou o le “TAUSI MATUA” lea ua fa’aaogaina nei e taumafai ai le vaega fa’apitoa o loo galulue malosi e tima’ia le atunuu i le Ma’i Suka. O le aoga o lenei tima’iga ma suesuega atili i lea gasegase, ua fa’atutu lea ina ia fa’aititia mai le faitau aofai o tagata o le tatou atunuu e po’ia pea i le Ma’i Suka.  O Amerika Samoa o lo ua numera tasi i le lalolagi i le to’atele o i latou ua maua i le Mai Suka.

O lo ua fuafua nei e amatalia lea polokalama i se taimi lata mai ae afai e oo ane le taumafaiga ia te oe le ua maua i le ma’i suka, ua tatau ona tatou silafia lelei, ua fa’atino lea auaunaga, ina ia mafai ona vave tima’ia nisi, ia fa’amatala auiliilia ia i latou le ogaoga o le gasegase tumau lea, pe afai e le vave ona e fa’atino nisi o gaoioiga e mafai ai ona e le auai i lea lisi o e ua maua tumau i le ma’i suka.

Ua fa’atulaga fo’i lenei taumafaiga, ina ia tima’ia le fanau talavou, ina ia fesoasoani malosi i le tausiga lelei o latou matua ma sui matutua o latou aiga, o e pele ia i latou, ina ia fa’afaigofie ia i latou auga o le gasegase.

O lo’o ua fa’aautu le taumafaiga lea, ina ia fa’atino a’ia’i ai e fanau talavou o totonu o mafutaga poo le li’o o le aiga, ia latou fesoasoani e fa’amama le tiga i e o lo’o po’ia i le ma’i suka i totonu o latou aiga. Ia fa’ailoa i le fanau talavou mea e ao ina tausia lelei ai i latou o matua o maua i le ma’i suka, ituaiga o mea’ai e moomia ona tausia lelei ai o latou tino, o vaiinu foi e aoga mo i latou atoa ai ma taimi e tatau ona faia ai le latou taumafataga.

“Afai e a’oa’oina tatau fanau o tausia gasegase poo nonofo fa’atasi ma o latou matua ma e matutua o latou aiga e maua i le Ma’i Suka, e mafai ona fesoasoani malosi i latou e tausia lelei i latou, ma fa’aititia ai tiga o lea fo’i gasegase, ma fa’aumiumi atili ai mafutaga ma o latou pelega ua mae’a maua i le Ma’i Suka,” o se tasi lea o faamatalaga o lo ua fa’ailoa mai e Joshua Naseri.

“Ua mautinoa lava aiga Samoa, e alolofa i o latou matua matutua fa’apea fo’i ma o latou lava matua, e auau i latou i ai ma e fiafia e faia mea e latou te manana’o i ai. O le auga lea o le taumafaiga, aua a silafia lelei e fanau talavou o tausia lelei latou matua mea e tatau ona tausia ai le tagata ma’i suka, e latou te fa’atinoa fo’i aua e mana’omia e i latou ona fa’aumiumi le latou mafutaga mafana,” o se toe fa’aauau mai lea o se lagona o Naseri e tusa o le Tausi Matua.

O le ituaiga o polokalama fa’apea fo’i o lo ua fa’atautaia nei i Samoa ma ua fa’aigoaina lea o le “OLAGA” ma ua fa’apa’aga ma le Yale University School of Public Health. O lo ua fa’atautaia nei fo’i la le Tausi Matua, o se taumafaiga fa’apea mo Amerika Samoa nei.

O lo ua fuafua la lenei taumafaiga ina ia a’otauina le fanau e ta’i 14-17 tausaga le matutua, lea e auau i ai nai matua matutua ma e fiafia e mafana le mafutaga ma o latou matua matutua i le li’o o latou aiga, ae ua mae’a po’ia fo’i matua i le ma’i suka.

Ua mafai ona maua nisi fa’amatalaga auiliilia e tusa o lenei taumafaiga i le telefoni numera 254-5277 poo le emeli  [email protected]