Polokalama fa’atulaga fanau tu’uaga tau mafanafana 2017

O lenei fo’i tu’uaga umi o aoga mo le tau mafanafana ua fa’atulaga ai mo le fanau a’oga le tele o polokalama eseese e afua mai ta’aloga, ae o nisi o le toe taumafaiga e fafagu ma a’oa’o le fanau i Tu ma Aga Fa’asamoa moni. O isi ua faia aoa’oga ma tolauapi i nofoaga fa’apitoa o le Siomaga o lo’o tausia fa’apitoa mo Fa’asao Fa’apitoa o le Gataifale po’o le Vaomatua, ina ia tagolima fo’i tupulaga fai a’e o Amerika Samoa i le lumana’i. Po’o le a lava le ituaiga a’oa’oga o le a fa’ao’o ane i ai le fanau talavou o le atunu’u, ia tautuana, lo latou saogalemu ma ia mautinoa fo’i e matua ma aiga, o lo’o aga’i tonu le fanau i nei a’oa’oga ua faatulaga mo i latou, aua e i ai lava fa’alavelave e ono tutupu mai, pe afai e mau va’ava’aia lelei a tatou fanau.

ASO FA’ATOAGA A LE ASCC LAND GRANT

Ua fa’alauiloa mai le lesitala mo le fanau e amata i le 8 seia o’o i le 13 tausaga o le a fa’amuta i le aso Iuni 21, 2017 ae o lea aso fa’apitoa o Iuni 23, 2017 po’o le aso Faraile o lenei vaiaso lea. Ua fa’ailoa mai o le a aoaoina le fanau uma i ala e mafai ona saogalemu ai i latou a’o fa’atino tiute fai e fesoasoani ai i matua ma aiga tau le tausiga o fa’ato’aga ma le tausia lelei o lafumanu.

E lua ituaiga o saogalemu o le a fa’ailoa i le fanau, o le saogalemu mai vaila’au o’ona e ono lamatia ai latou soifua maloloina ae aoga mo galuega atina’e o fa’ato’aga, ma le saogalemu mai mea faigaluega e fa’aaogaina mo le galuea’ina o fa’ato’aga ma le tausiga o lafumanu fo’i.

O le taimi atofa mo lenei polokalama i le aso ua fa’atulagaina e amatalia i le itula e 7:30 i le taeao, ae mae’a lea kosi i le itula e 1:00 i le aoauli.

O le aoaoga fa’apitoa lenei ua fa’atautaia ma fa’atupea lea e le ASCC - Agriculture Community & Natural Resources [Land Grant Program], le Agriculture Extension Services ma le Farm Safety Program. Peita’i o pa’aga na o lo’o i le tatou malo, ae o pa’aga fa’avaomalo lea ua fa’ailoa mai o le BUNCE Crop Production Servies, Agrium, Farm Credit, CHS Monsanto, The Mosaic Company Fundation ma le Pioneer & Toyota.

ASO OLIMIPEKA IUNI 23 & 24 I LE VETERANS STADIUM

O le aso fa’apitoa mo le lautele o le atunu’u e aofia fa’atasi ai Aiga ma Pisinisi ua fa’atautaia e le American Samoa National Olympic Committee ma ua latou ‘au’au fa’atasi ai ma le Matagaluega mo Tina ma Talavou a le malo, lea ua fa’atulaga ia Iuni 23 & 24, 2017, i le Veterans Memorial Stadium i Tafuna.

Ua i ai pepa talosaga mo avanoa e fa’atutu ai ni fale’ie mo pisinisi, e mafai ona faia ai so’o se ituaiga o fefa’ataua’iga, mea’ai po’o oloa gaosi. O lo ua i ai fo’i pepa talosaga e ao ina fa’atumu mai mo ta’avale teuteuina lelei e faia ai le fa’aaliga faapitoa mo ta’avale o so’o se ituaiga. Ua i ai fo’i pepa fa’atumu mo le tauvaga o “Fa’ailoga a kamupani Eseese” [Logo competition] ma e ao fo’i ona fa’atumu ai sau talosaga i lea vaega o le tauvaga.

E i ai fo’i pepa talosaga mo le auai i le Savali Fa’aaloalo i lea lava aso ma e faia uma mea nei i le aso 23 Iuni, 2017. Ae o le mea mulimuli lava o le Savali po’o le Tamo’e i le 5 kilomita le mamao po’o le 10 kilomita le mamao. Ua fa’ailoa mai o pepa talosaga uma lava ma nisi fa’amatalaga e ao ina fia malamalama atili ai e tusa o nei mea uma, e maua lea i le Ofisa autu o le Matagaluega o Tupulaga ma Tina i Pago Pago, Ofisa o le ASNOC i le VA Stadium i Tafuna po’o le Ofisa o le South Pacific Water Sports i Utulei. Peita’i, a o’o loa ona faaulu lau talosaga, e ao ina fa’aoo sao i le Ofisa o le ASNOC i le stadium.

O lo’o i ai le fesoasoani tele o lo’o tausoaina nei e le GHC Reids & Company, le McDonalds American Samoa ma le ASCO Motors mo lea aso tele. Ua fa’ailoa mai, a lesitala lelei lau ‘au po’o oe fo’i mo nei mea uma, e leai se totogi mo le fa’aulu o lou fia auai.

“TAOFI LE I’UMAEA O LE AGANU’U” - AOAO TU MA AGANU’U

O le polokalama ua alo atu nei le American Samoa Arts Council e fa’atino mo le fanau talavou i lenei tausaga ua fa’alauiloa o le “Taofi le I’umaea o le Aganu’u” ma e toe sasa’a ai le fafao ma fa’ailoa atu ia i latou mamanu o le elei ma le tele o le aganu’u o lo’o tamau ai.

E fa vaiaso o le a fa’atautaia ai lenei polokalama taua, ma ua fa’atulaga ai le fanau i le va o le 7-17 tausaga le matutua ina ia a’oa’oina ai fa’apitoa i le tusia o mamanu o Elei Samoa, Taina o nei mamanu e gaosia ai Upeti Samoa mo le saunia o Ie Elei mo le gaosiga o Laei Elei Samoa moni.

E ese  ai lea matata, ae o le a a’oa’oina le fanau i le aoga o lea mamanu ma lea mamanu  o le Elei Samoa, ma lona taua i le aganu’u, atoa ma lona uiga.

Ua fa’ailoa mai e ono vasega eseese o le a fa’atulaga ai le fanau e tusa o latou tausaga. O nei vasega ta’itasi o le a fesuiai ina ia fa’asolo i vasega uma ma matata o le a a’oa’oina ai. E ta’i 30 minute i le vasega ae amatalia vasega uma i le 8 seia pa’ia le 12:00 i le aoauli ona tu’ua lea. E i ai le malologa e faia pe a ta tonu le 10:00 i le taeao mo le 30 minute, ona toe amatalia lea o vasega mulimuli o so ta’itasi. O le aso Faraile nei e muta ai le lesitala o suafa mo le polokalama.