Poloa’i le faamasinoga e nofo vaavaaia se tama ile umia ole aisa

E 5 tausaga lea nofovaavaaia ai le Tama e 58 tausaga le matua, ina ua faamaonia e le fa’amasinoga maualuga le moliaga o le umia faasolitulafono o vaega o fualaau fa’asaina, le ituaiga o le aisa.

Ina ua tula’i le susuga ia Onosa’i Navelika i luma o le fa’amasinoga maualuga i le vaiaso na te’a nei mo le lauina o lana fa’asalaga, na faailoa i ai e le afioga i le Faamasino Sili ia Michael Kruse e fa’apea, e le mafai ona ia tausia lona aiga ma fesoasoani ia tei latou, pe afai e muamua ona alu lona taimi e fesoasoani i le fa’amalieina o lona ola tu’inanau i le fualaau fa’asaina o le aisa.

Na ulua’i tuuaia Navelika i le moliaga mamafa o le umia fa’asolitulafono o vaega o fualaau fa’asaina. Ae i lalo o se maliliega na saiia e le ua molia ma le malo, na ia ioe ai i le moliaga feololo o le umia faasolitulafono o fualaau faasaina, lea e faasala ai se tasi mo le umi e le sili atu i le 5 tausaga, poo le salatupe e le sili atu i le $5,000.

Na ta’utino Navelika e fa’apea, i le aso 26 o Tesema 2018, sa ia umia faasolitulafono ai se paipa tioata o loo i ai vaega o le pauta o le aisa. Na maua atu e le Leoleopo o le Falema’i o le LBJ ia Navelika o loo ula lana paipa i totonu o lana ta’avale i le vaega e paka ai ta’avale a le falema’i. Na logo Leoleo ma loka ai loa le ua molia i le aso lava lea.

Na faatoese Navelika i le fa’amasinoga e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i tua e tausi lona to’alua ma lana fanau. Sa ia ta’utino fo’i i le fa’amasinoga, na te le toe solia se tulafono a le malo, na te le toe tagofia fo’i fualaau fa’asaina.

Na talosaga loia a itu e lua, mo se faasalaga faanofovaavaaia, lea fo’i na talia e le fa’amasinoga.

O nisi o tuutuuga o le nofovaavaaia e 5 tausaga, e aofia ai lona tuliina o masina e 20 i le toese i Tafuna, atoa ai ma lona totogiina o le salatupe e $2,000. O ia faasalaga uma e aofia ai le taimi faa falepuipui ma le salatupe, ua faamalumalu e le fa’amasinoga, fuafua lava i le usita’i o le ua molia i tuutuuga o lana nofovaavaaia.

Na faailoa e Kruse ia Navelika, o le a fa’aauau pea ona mafuta i lona aiga ma tausi lona to’alua ma lana fanau, ae afai loa na te toe solia se tulafono, o le a faaleaoga loa lana nofovaavaaia.