Pasia I’ugafono a le Senate talosagaina ai le Faigamalo e “fausia ma faatumauina se uafu i Fitiuta”

Pago Pago - AMERIKA SAMOA

Ua pasia nei se I’ugafono a le Maota o Senate, “e talosaga ai ma le fa’aaloalo le afioga i le Kovana ia Lemanu ina ia fausia ma faatumauina se uafu i Fitiuta, Manu’a, e fesoasoani ai i tagata Manu’a, i auala o fela’ua’iga o lo’o matua mana’omia ma le atina’e o le tamaoaiga.”

O lenei I’ugafono, o se tasi o pili e tolu sa faaulufaleina i totonu o le Senate, i le aso Gafua, ina ua toe tatalaina a latou tauaofiaga talu ona mae’a le latou maloloina mo le fa vaiaso.

Na mafai ona faitauina lenei I’ugafono sa faaulufaleina e afioga i Senatoa ia Utu Sila Poasa, Poumele Pete Galea’I, Malaepule Saite Moliga ma Ma’o Fa’auma S. Gogo.

Na fa’alauiloa e Malaepule e faapea, ua mae’a ona fa’afofoga le maota maualuga i le mafua’aga o lenei I’ugafono ma o lea na ia fa’atula’i ai se manatu ina ia fa’ao’oina atu loa lea I’ugafono i le kovana mo lona pasiaina mai, i se taimi vave lava.

Sa faamanino e le afioga i le Peresetene o le Senate, ia Tuaolo Manaia Fruean, o le a’ano moni o lenei iugafono, o so’o se tulaga e lelei mo Tutuila, e lelei foi mo Manu’a ma ia talosagaina ai senatoa e fa’aalia lo latou lagolagoina o lea manatu, e ala i le si’i o latou a’ao.  Ma sa fa’aalia le auai uma o le maota i lea manatu.

O lo’o ta’ua i faaupuga o le I’ugafono e faapea, “e taua tele se uafu i Fitiuta, Manu’a e fa’aaoga e le gata i tagata o Manu’a lava ia, ae faapena foi i le malo, o saienisi, ma auaunaga tau Paka Fa’asao a le Iunaite Setete.”

E le gata i lea, ua aofia i totonu o faaupuga a le I’ugafono le “matua tapula’a lava [o] auaunaga tau fela’ua’iga atu ma le fo’i mai i Ta’u.  Na o le tasi le va’alele e malaga i Manu’a, ae a o’o fo’i ina leaga le tau pe fa’aletonu le va’a, e tele lava taimi e fa’alavelavea ai femlaga’iga.”

E le gata i lea, “E matua tele naunau le fa’alagolago o tagata i le uafu mo pasese ma uta fela’ua’i i aso ta’itasi.  Toetoe lava o le ‘afa o le faitau aofa’i o Ta’u e alaala i Fitiuta, ma o le taimi nei e leai se auala faamoemoeina o feoa’iga saogalemu i le ‘ea po o le sami foi.”

Ma o le “tulaga foi i feoa’iga i le sami i le taimi nei, o lo’o matua feagai lava ma lu’itau.  O va’a tetele atu, e mo’omia le loloto e tatau ai e pei o le taulaga i Pago Pago, e mafai ai ona saogalemu le fa’alatalata atu e taula i le uafu.”

Ua aofia foi i totonu o faaupuga o lenei I’ugafono, le ‘leai [o] se auala i le sami e feso’ota’i atu ai ma Fitiuta pe afai e iai se fa’alavelave fa’afuase’i.  A le o le faatalitali o tagata i se vaalele e mafai ai ona o’o i leisi itu o le motu, po o le kolosi i le itu e mafai ai ona maua se avanoa i se va’a i le afioaga i Ta’u.”

“O se uafu i Fitiuta, o le a fesoasoani tele lea i le la’ueseina o tagata ma meatotino Ii taimi o fa’alavelave fa’alenatura.  E le’i mamao atu nei ona pa o se maugamu e fa’aigoaina o Vailu’ulu’u, i lalo o le sami, e latalata i Motu o Manu’a, ma sa lamatia ai soifua o tagata Manu’a.”

Ua aofia foi i faaupuga o le I’ugafono le “mana’omia e tagata Manu’a [o] se auala faigofie e mafai ona sosola ese ai pe afai e toe pa le maugamu po o se isi lava foi faalavelave faalenatura.”

“Ma o le fausia o se uafu i Fitiuta, o le a fesoasoani tele lea mo le saogalemu o tagata Manu’a.”

Ma ua aofia foi i totonu o le I’ugafono “penefiti o se uafu i Fitiuta, e le gata ai i le nofoaga e tu ai ma le faafaigofie o faimalaga mo tagata Manu’a, a o i latou foi e asiasi atu i atumotu o Manu’a.”

• “Siitia le Tamaoaiga:  Fa’ateleina gaioiga fa’apisinisi, e pei o fagotaga, fefa’ataua’iga ma turisi, ma fa’aleleia atili ai le tamaoaiga mo le afioaga.”
• “Fua o Fa’ato’aga auina atu i fafo:  O le felauaiga ma le fa’atauina atu o fua o fa’ato’aga a Fitiuta – aofia ai ‘ulu, talo fa’i ma popo.”
• “Avanoa o galuega:  O le uafu o le a maua ai galuega a tagata Manu’a, i le fa’aaogaina o le uafu, tausiga o le uafu, ma auaunaga tau turisi, faapea foi ma le lagolagoina o le atina’e o pisinisi laiti, e lagolago ai le uafu.”
• “Fuafuaga mo le Ave’esea o Tagata:  O le uafu o le a mafai ona maua se isi auala e ave’esea ai tagata pe a tula’i mai se fa’alavelave.”
• “O se uafu i Fitiuta, o le a tosina mai ai tagata tafafao maimoa, e ofoina atu se nofoaga matagofie mo tafaoga ma gaioiga e mo’omia i le sami.  E mafai ona fa’amanatuina ma fa’asoa atu i tagata asiasi atu le ‘oa o tu ma aga fa’asamoa, talatu’u ma mata’aga o le vavau.  E mafai foi ona fa’aaoga le uafu e potopoto i ai mo ni sauniga fa’aleaganu’u, o ni sauniga, ma le fa’amatalaina o tala e pei foi o isi Motu o le Pasefika ua fa’amanuiaina i le atina’e o le tamaoaiga, e ala i uafu.”

Ua ta’ua i le fa’ai’uga o le I’ugafono le “taumafai [o] o le Senate a Amerika Samoa i se tupe fa’afaigaluega a le Malo o Amerika Samoa ina ia fausia ai se uafu i Fitiuta, Manu’a, i le talafatai o le itu i matu sasa’e o le motu o Ta’u.  O le tulaga o Fitiuta e fetaui lelei ona tu ai se uafu loloto, e fa’aaoga e saogalemu ai le fa’ataunuu i ai o le MV Sili ma le MV Manu’atele.”

E le gata i lea, “O le tele o alamanuia faanatura, e aofia ai papa tetele, ua avea ai ma nofoaga lelei mo le fausiaina o se uafu.  O lea uafu o le a avea ma feso’ota’iga taua tele, fa’afaigofie ai le fe’avea’ia o oloa, sapalai, ma pasese i le va o motu ma feso’ota’i ai le vasa ma le ‘ea ona o Fitiuta foi o lo’o i ai malaevaalele i le motu o Ta’u.”