Pasia e le Senate suiga a le Maota o Sui i le tupe faasoasoa 2025

Pago Pago - AMERIKA SAMOA

Na pasia e le Maota Fono i le aso Tofi o le vaiaso ua tuanai, ia le tupe faasoasoa a le Malo, mo le tausaga tupe 2025, faatasi ai ma suiga mai i maota e lua, lea e le’i toe faaopoopo ai se tupe i le tupe faasoasoa, ae na ona sui o vaegatupe i polokalama ua talitonu sui faitulafono, ua alagatatau ma manaomia.

Sa pasia e le Maota o Sui i le aso Gafua ia a le pili faatasi ai ma  latou suiga, ma fa’ao’oina atu i le maota maualuga i le taeao na soso’o ai.

O lo’o aofia i le pili fou a le Maota o Sui ia suiga sa pasia mai e le Senate faapea ma suiga na pasia e le Komiti Aufa’atasi a le Paketi ma Tupe Faasoasoa, lea na pasia i le aso Faraile o le vaiaso i ona tua atu.

O le tele o suiga sa faia lea i le vaegatupe mo le paketi o Polokalama Faapitoa a le Ofisa a le Kovana.  Ae o lo’o tumau pea lona aofaiga i le $36.2 miliona.

Sa pasia foi  i le aso Faraile, Setema 6, 2024 ia se fa’aopoopoga i le tupe mo le ASCC, lea o lo’o i lalo o Polokalama Faapitoa, mai i le $1 miliona, i le $2 miliona.  Faapea ma le $300,000 mo femalagaiga i Manu’a ma Swains.  

Lea sa to’esea mai i le Poloketi o Fanua Atina’e i Samoa faapea ma se vaegatupe na fa’aagaaga mo se polokalama tau Atina’e i Manu’a.

O suiga a le Senate na pasia e le Maota o Sui, na aofia ai le $45,000 e si’itia ai totogi o kovana faaitumalo e to’atolu, mai i le $60,000 i le $75,000.  Faapea ma le $1 miliona lea ua faaopoopo i le umusaga o le fale Fono fou i le tausaga fou.

O ia fa’aopoopoga na aumai mai i vaegatupe fa’aagaga mo paketi sa faatulagaina mo ‘Ceremonial Activities’ ma le paketi mo le faamamaina o le teritori.

Sa pasia e le Senate i la latou tauaofiaga masani i le taeao o le aso Tofi, i lona faitauga faatonu lenei pili ma o le taeao nei o le a faapea ona palotaina ai i lona faitauga faatolu, ia le pili a le Maota o Sui.

PASIA E LE SENATE I LONA FAITAUGA MULIMULI IA LE FA’AITIITIA O TAUSAGA TAUTUA A LE ALJ

O le taeao o le aso Tofi, na pasia ai e le Maota Maualuga i lona faitauga mulimuli, ia se pili na fa’aulufaleina e le afioga Tuaolo Manaia Fruean, le peresetene o le Senate, ia se i’ugafono e fa’aitiitia ai tausaga e tautua ai le Faamasino Tulafono a tagata faigaluega o le malo (Administrative Law Judge – ALJ), mai i le ono tausaga, i le na’o le fa tausaga.

Sa faaleoina e le Loia Sili, le susuga ia Fainu’ulelei Alailima-Utu i luma o le Komiti o Faamasinoga a le Senate, ia le fesiligia e le kovana le mafuaaga o lenei suiga, ma ia ta’ua ai le sologa lelei o le faatinoga o lenei tiute i le ono tausaga sa iai, i le tele o tausaga.

Na saunoa le Loia Sili, o lo’o finagalo le kovana, ina ia fa’atumauina pea le umi o tautua ai le ALJ, e pei ona sa faavaeina e le maota fono, i tausaga ua tuanai.

Sa saunoa le afioga i le Senatoa ia Togiola T.A. Tulafono, ina ua faavaeina tiute a le ALJ, na soalaupuleina ai le umi o lenei tofiga, i le fa tausaga, ono tausaga pe tumau mo le olaga atoa.

Ma o le faaiuga mo le ono tausaga, sa faia ina ia faamautuina le le a’afia o fa’aiuga a le ALJ i faaiuga fai a le kovana.  Sa ta’ua e Togiola, sa filifilia le ono tausaga ina ia le ova atu i le taimi o le nofoaga a se kovana, ma ia tutoatasi ai lenei faamasino.

Ae peitai, sa finau Tuaolo, ua a’afia uma vaega o le malo i faiga faapolokiki.  Ma ua va’aia le tele o mataupu o lo’o taoto i totonu o le ofisa a le ALJ, e le o iloiloina ma e foliga mai, o lo’o toso e le ALJ nei mataupu aua e umi le ono tausaga.

Na faamamafaina foi e Tuaolo, o lo’o iai i le Senate le pule e pasia ai le pili ae e mafai lava ona te’ena (veto) e le kovana pe a na te le lagolagoina ia suiga.  Ae i sona talitonuga faaleoina, e lelei pe a toe tu’u mai le umi o le tausaga mo se ALJ i le fa tausaga, ina ia mae’a faatasi ma le tausaga e tu’ua ai e le kovana na filifilia.

I le talifuaitau mai a le loia sili i le saunoaga a le peresetene o le Senate, sa ia faamamafaina ai le taua o le tutoatasi o faamasinoga, o se faavae taua lena o so’o se malo faatemokarasi.  Ma sa saunoa foi Fainu’ulelei, e ui lava ina filifilia e le kovana ia le ALJ, ae o ona tiute e puipuia e le tulafono, ae le o mana’oga a le kovana.

Na saunoa le loia sili, e le mafai ona faatonutonu e le kovana ia le ALJ e faia mea o lo’o mana’o ai le kovana.

Ae peitai, sa tu malosi Tuaolo ina ia suia tausaga e galue ai le ALJ mai i le ono tausaga, i le fa tausaga.  Ma sa ia saunoa foi e faapea, e le o faamalosia foi le Senate ina ia mulimuli i le fautuaga ale loia sili.  Na toe faamanino mai e le afioga i le peresetene e senate e faapea, o lo’o iai i le kovana le aia tatau e te’ena ai (veto) so’o se pili e na te le lagolagoina.

I le i’uga, sa faapea ona pasia e afioga Senate ia lenei I’ugafono, i lona faitauga mulimuli.