Pasia e le Senate pili taufa’aofi e taofia ai le suia o fanua faitele e avea ma fanua pulea e se tagata toatasi

Pago Pago - AMERIKA SAMOA

O le aso Lua o le vaiaso nei, sa faapea ona molimau ai le Failautusi fou o le Ofisa o Mataupu tau Samoa, le afioga ia Fai’ivae Iuli A. Godinet, totonu o se iloiloga a le Komiti o Mataupu tau Samoa a le Maota o Senate, e tusa ai ma le iloiloina o se pili taufa’aofi mo se Tulafono ua fa’aulutalaina:  O se tulafono e faasa ai ona suia Fanua Faitele Faaleaiga, e avea ma fanua pulea toatasi.”

I lana uluai saunoaga, sa faaleoina ai e Faiivae le taua tele o lenei tulafono, “i le tau taofiofi ai ma tau sefe mai ai meatotino a le tatou atunu’u, aemaise lava o measina e pei o fanua faitele.”

Na fa’aalia e Fai’ivae lona iloiloina auiliili o lenei pili ma e na te lagolagoina atoatoa.  Sa ia faamamafaina le puipuia o fanua faitele ma le aganu’u mo fanau o le lumana’i, pe afai ae pasia lenei pili.  Ae le gata i lea, o le a fesoasoani malosi i le latou ofisa (Mataupu tau Samoa) i le fofoina o nisi o fa’afitauli tau fanua, ua loa ona iai.

O lenei pili sa faaulufaleina e le afioga i le Senatoa Togiola T.A. Tulafono, i le faai’uga o le tauaofiaga o le Fono Faitulafono na se’i mavae atu.  Ma e le gata ina fa’asaina ai le avea o fanua faitele ma fanua e pulea e se tagata toatasi, ma faasaina ai “o so’o se tagata po o e vaega latou te faamamafaina se fanua e le’i fa’ato’aina, se togavao e le’i asa muamua po o se ‘ele’ele lava foi i le togavao mai le lesitalaina o ia fanua, e fa imo latou lava.”

 Sa pasiaina e le Senate ia le pili i lona faitauga mulimuli ia Setema 2024.  Ae peitai, ona o lenei tulafono e gafa ma le tu’u’esea o fanua, e mana’omia se palota 2/3, o le aofaiga atoa a le Maota o Sui ma le Senate, e pasiaina ai ma sainia mai ai e le Kovana.

O le mafuaaga lea na toe fa’aulufaleina ai le pili ia Ianuari 16, 2025, ae e le’i malolo le Fono mo le tasi vaiaso.

I le iloiloga i le aso Lua, lea sa fa’afoeina e le sui Taitaifono a le Komiti, le afioga i le Senatoa Leatualevao S. Asifoa, na fa’amanino ai e le afioga Togiola suiga e lua o lo’o aofia i totonu o lenei pili taufa’aofi, mo tulafono tau fanua, a le Teritori o iai nei – ma ua mafua ona faia nei fa’aopoopoga ona o fa’afitauli ua tula’i mai.

Na saunoa Togiola, o le taimi nei, o lo’o mafai e se Sa’o po o se matai o lo’o taitai’a se aiga potopoto, ona liliu fanua faitele e avea ma fanua e pulea e se tagata to’atasi, ma tu’uina atu pepa o le fanua i se tagata e tau toto i le aiga, e ala lea i le fuaina o le fanua, ae e le’i fa’ao’oina atu lenei mataupu i le Komisi o Fanua.

Afai ae pasia mai e le Komisi ia lenei tulaga, ona fa’ao’oina atu loa lea i le Kovana mo le sainiaina, ma aloaia ai loa lenei suiga.

Ae i lana molimau, sa saunoa ai le afioga Faiivae i fa’afitauli ma fe’ese’esea’iga o lo’o tupu i le va o aiga ma le tagata lea ua pulea le fanua, faapea ma lana fanau, lea ua vavae iai le ‘fanua umia saoloto’.

Sa na ia fa’amanino foi, e mafai ona finau se tagata, o fanua faitele ia ua o latou pulea, o fanua ‘umia saoloto’, o lona uiga, e le auai latou i saofaga mo fa’alavelave fa’aleaiga.  Po o se fanua faitele ua suia e se Sa’o o se aiga, ma avea ma fanua ‘umia saoloto’. 

A o’o ina maliu le Sa’o tuai, e mafai e le Sa’o fou ona finau faapea, e le’i nofo malamalama le aiga atoa, i le suia o le fanua faitele ina ia avea ma fanua ‘umia saoloto’ ma sa le’i iai se aia tatau i le Sa’o tuai, e faia ai lea suiga, e aunoa ma se maliliega mai i le aiga.

Na fa’aopoopo mai le Peresetene o le Senate, le afioga Tuaolo Manaia Fruean i le saunoaga a Fai’ivae ma ia faamatalaina ai se tulaga faapena na tula’i mai, a’o avea o ia ma faamasino lagolago i le Vaega o Fanua ma Suafa, i totonu o le Faamasinoga Maualuga.

Sa faamatalaina e Tuaolo se Sa’o o se aiga i Lauli’i, sa na ia suia se fanua faitele ina ia pulea to’atasi e sona tausoga.  Ma na o’o lava lenei mataupu i luma o le faamasinoga, sa finau le aiga e latou te le’i nofo malamalama i le tulaga ua tupu i a latou fanua faitele.

Na ta’ua e Tuaolo le le’i faamanuiaina o taumafaiga a le aiga, ona i le faaiuga a le faamasinoga, sa faamalieina e le tausoga ia agava’a faaletulafono, e aofia ai ma le fuaina o le fanua, pasiaina mai e le Komisi o Fanua faapea ma le sainia e le Kovana.

Sa saunoa foi Tuaolo, na ia fa’aleoina i le Faamasino Sili sa iai, o Grover J. Rees III, e ui i lona aloaia o lana faaiuga sa faia, aua ua ausia agava’a uma faaletulafono, ae peitai, i le avea ai o ia (Tuaolo) ma se matai, sa ia le taliaina le faaiuga a le faamasinoga.

Na finau Tuaolo, afai e foa’i e se Sa’o o se aiga ia se fanua lautele a se aiga, o fea o le a nonofo ai fanau o le lumanai o lea aiga ma o le a fa’apefea ona fa’aauau la latou tautua, pe afai ua leai ni fanua?

O le suiga lona lua, “o le a faasa ai so’o se tagata po o se vaega, latou te fa’amamaina se fanua e le’i fa’ato’aina, se togavao e le’i asa muamua po o se eleele lava foi i le togavao, mai le lesitalaina o ia fanua, e fa imo latou lava.”

Sa ia fa’amanino mai le ulua’i taimi na nofo malamalama ai le Senate i lenei mataupu, ina ua pisa tagata o le atunu’u e tusa ai ma ripoti a vaega fa’asalalau, e uiga i ni tagata ua o latou fa’amamaina se ‘togavao e le’i asa muamua” ma taumafai e lesitala e avea ma a latou fanua.

O lea mataupu na tupu i le tausaga e 2022, ina ua fa’amamaina e nisi o taitai o le atunu’u, ma fuaina, se vaega o fanua faitele ma togavao e lata i le 400 eka, i luga o mauga, i tua atu o Malaeimi, Fagasa ma Aasu.

Sa o latou fa’aigoaina ia fanua o le “Nu’u Fou” ma fa’ao’o atu i le Ofisa Lesitala, ina ia lesitala o ni fanua e pulea e se tagata to’atasi.  O lea fa’afitauli, o lo’o aofia foi i totonu o lenei pili.

Na saunoa Togiola, o lea mataupu sa faia iai se suesuega a le Komiti Su’esu’e a le Senate (SSIC), lea na fautuaina ai le faavaeina o se tulafono mo le puipuiga o fanua, ona o le tele o afioaga o Tutuila e limiti ona fanua ‘flat land’ ma o lo’o fa’aaogaina siomaga faalenatura, e avea ma tuaoi, e pei o le sau mai i le a’au e tau mai i tumutumu o mauga.

Sa faamanino atili e Togiola e faapea, O so’o se tasi o le nu’u e finagalo e faato’a se fanua i luga o mauga pe ta’amilo o le nu’u, e to to ai taumafa aua le tausiga o latou aiga, ma tautua i le sa’o, e pau lava le tulaga e manaomia, o se faatagana mai i matai o le nu’u.

Ae afai ua mana’o se tasi e faamama ma fa’ato’a se fanua, mo ia lava, aua o ni fanua e le’i asaina muamua, o le a tali i matai ma aumaga o le nu’u.  Ma o le mafua’aga lea e taua tele ai lenei pili, o le faamamafa mai lea a Togiola, ina ia faamautu ai le puipuiga ma faasaoina o measina a le atunu’u mo fanau o le lumanai. 

Na fa’asoa mai Tuaolo i se tasi o aso Sa, a’o faia le toanai a matai o le latou afioaga o Pago Pago, ae saunoa ai se tasi o matai, e tusa ai ma se fanua i luga o le mauga o lo’o siomia ai le nu’u, ua famamaina e se tagata e tau mai i le afioaga o Pago Pago, ae o lo’o faamautu i Tafuna, ma ua fai mai lea tagata, o lana fanua lea ua faamamaina.

Sa ta’ua e Tuaolo le su’esu’eina e matai o le nu’u o lenei mataupu ma fa’asaina lea alii mai le toe faamamaina o le fanua.

I le Fa’atomu’aga o lenei pili, ua ta’ua ai e faapea, “Talu ai, mo le faitau senituri o lo’o soifua pea tagata Samoa ma o lo’o olaola pea foi ana aga ma tu i le fa’aaogaina o ona fanua.  O le faiga o fanua tau aiga faitele e lotolotoi ma mili faatasi i totonu o aiga ma afioaga.  O le va’aia ma le tausia o fanua tau aiga, ua mafai ai e i latou o lo’o nonofo i luga o fanua ia e fa’asoa atu ai o latou i o latou aiga ma tautua ai isi.”

Ina ua fa’aulufaleina lenei pili taufa’aofi i le Senate i le tausaga ua mavae, sa tula’i mai ai se fesili, pe mata e a’afia ai fanua lautele ia ua mae’a ona ‘tu’ueseina’ ma avea ma fanua pulea e se to’atasi, i le tulafono fou lenei.

Sa faamanino ai e Togiola, le le aofia ai o fanua ua mae’a ona ‘tuueseina’ i lenei tulafono, pe a pasia lenei pili.  E le gata i lea, o le a e a’afia ai foi lisi (leases) ma maliliega o lisi (lease agreements), i lenei tulafono.

Na faapea ona pasia lenei pili e le Senate i lona faitauga lona tolu ma ua fa’ao’oina atu nei i le Maota o Sui mo sa latou iloiloga, ae e le’i fa’ao’oina atu i le Kovana ina ia mafai ona sainia e avea ma tulafono.