Pasia e le Senate ia Jon Clemens e avea ma Faamasino i totonu o le Faamasinoga Faaitumalo a Amerika Samoa

Pago Pago - AMERIKA SAMOA

Na pasia e le Maota o le Senate i le aso Faraile o le vaiaso ua mavae, i se palota 15-0, ia le avea o Jon Clemens ma Faamasino mo le Faamasinoga Faaitumalo a Amerika Samoa.

O faamasino uma o le Faamasinoga Faaitumalo, i luga o se fautuaga mai i le faamasino sili, e faaulu mai e le afioga I le kovana o latou suafa, mo le iloiloina ma le pasiaina e le Senate.

Ina ua mae’a lona iloiloga i luma o le Komiti o Faamasinoga a le Senate, ae e le i alo atu le Senate i a latou tauaofiaga masani, sa fa’aleoina e Clemens lona agaga faafetai i le taitaifono o le komiti faapea ma afioga i Senatoa sa feagai ma lona iloiloga.

Sa ia faaleoina foi lona agaga faafetai i le afioga i le kovana faapea le faamasino sili, mo le filifilia o ia e avea ma faamasino i totonu o le faamasinoga faaitumalo, ae le gata i lea, o le lagolago a lona aiga.

Sa saunoa Clemens i lona fa’aaloalo tele i le faamasinoga maualuga ma le faamasinoga faaitumalo.  Sa ia ta’ua foi, a’o itiiti o ia, i le le lava o se faautautaga loloto, sa mafai ona ia aoaoina mai i lona tua’a le agaga fa’aaloalo mo le faamasinoga.

Ina ua avea o ia ma loia, sa ia aoaoina ai tiute ma galuega i totonu o faamasinoga, o le faamautuina lea o le puipuiga ma le aloaia o aia faavae ma faamasinoga tonu, ia tutusa mo tagata uma.

Sa saunoa foi Clemens, mai i le silia ma le sefulutasi (11) tausaga na avea ai o ia ma se tasi o loia i totonu o le faamasinoga maualuga, seia o’o ina filifilia o ia e avea ma se faamasino le tumau ia Mati 2022, ma ua ia aoaoina ai le tele ma le taua o tiute tauave o lenei tofiga.

Sa fa’aalia e Clemens, i aso uma, e faia ai e faamasino o faamasinoga faaitumalo le tele o faaiuga e a’afia ai ola ma soifuaga o tagata e o’o atu i luma o le faamasinoga, ae le gata i lea, o o latou aiga ma uo.  E a’afia ai foi ma tagata lautele i faaiuga e faia, ona o faaiuga a faamasinoga e iloa ai le auala e faaliliu ai tulafono ma auala e faamalosia ai nei tulafono.

Sa molimau Clemens i le loloto ma le taua o le tiutetauave ua tu’uina atu ia te ia.  Ae le gata i lea, o le mamafa o le tiutetauave sa feagai ma le komiti i le filifiliga o ia.

I le saunoaga a le afioga i le Peresetene o le Senate, ia Tuaolo Manaia Fruean, sa ia saunoa ai i le laititi o le taimi na galue ai Clemens i mataupu savili i totonu o faamasinoga.  Sa fia malamalama le afioga Tuaolo, pe le manaomia e Clemens lea atamai ae le i avea o ia ma faamasinoga.

Na saunoa Clemens, e eseese lava itu e mafai ona avea ai se tasi ma faamasino, ae peitai, a’o galue o ia o se loia i totonu o le faamainoga maualuga, sa mafai ona ia maua ai le avnaoa e aoao ai auala e fa’atino ai tiute ma faaiuga a le faamasinoga.  Ae na maua foi e ia le avanoa e avea ai ma loia mo le faamasinoga, i le tele o tagi sa faaulu, e faasaga i le faamasinoga.  E le gata i lea, na avea foi o ia ma loia mo le faamasino sili.

 Sa aloaia e totino o le komiti ia le soifuaga a’oa’o a Clemens i totonu o aoga lotoifale ma sa ia ausia foi le sikolasipi a le malo lea na mafai ai ona fa’aauauina ana aoaoga i atunu’u i fafo.

Sa faaleoina e afioga i Senatoa lo latou agaga fa’afetai ua mafai ona toe foi mai Clemens i laufanua e auauna atu i tagata o le atunu’u faapea le malo.

Sa fa’au’uina mai Clemens i le aoga faaloia i Kalefonia (Davis School of Law) i le tausaga e 2010 ma na toe foi mai i Amerika Samoa ma avea ma failautusi i totonu o le faamasinoga maualuga i le 2011

Talu mai le 2012, na galue Clemens o se loia i totonu o le faamasinoga maualuga.  I le 2022 na avea ai o ia ma faamasino le tumau.