Pasia e Faipule ia Matila avea ma Faatonusili Ofisa Alamanuia ma le Tamaoaiga

Pago Pago, AMERIKA SAMOA

Na pasia e afioga i Faipule o le Maota o Sui i le aso Lulu o le vaiaso nei tofiga a le afioga i le ali’i Kovana ia Lemanu P. S. Mauga mo le Faletua ia Petti Tagipo Matila e avea ma Faatonusili o le Matagaluega o Alamanuia ma le Tamaoaiga a le malo i le palota e 17-0.

O le faaiuga a afioga i Faipule na faia lea ina ua mae’a le iloiloga e faamaonia ai tofiga a le Kovana mo Matila, lea na faatautaia i luma o le Komiti o le Tamaoaiga ma Alamanuia, i lalo o le ta’ita’iga a le afioga i le ali’i Faipule ia Samuel Ioka Ale Meleisea o le Ta’ita’i Komiti

Na i ai fo’i i totonu o le Maota o Sui nisi o le Matagaluega mo le lagolagoina o le latou Faatonusili filifilia, lea e aofia ai ma le afioga a Fuiavailiili Keniseli Lafaele sa avea ma Faatonusili o lea Matagaluega i le tele o tausaga ua mavae.

O le to’atele o afioga i Faipule na maua le avanoa e saunoa ai i le iloiloga, sa latou fa’aalia le leai o ni fesili e faatatau i agava’a o le tamaitai Faatonusili filifilia, se’i vagana ai fautuaga ma nisi o tulaga e tatau ona faamanino.

Na faafetaia e afioga i Faipule le afioga i le Kovana, mo le filifilia o Matila i lenei tofiga taua. I lo latou talitonuga, ua atoatoa le tomai ma le agava’a o Matila na te tauaveina ai lenei tofiga taua.

Na faatusa e ni isi o afioga i Faipule le Faletua ia Matila, o se tasi o Lupe faalele a le atunuu ua toe fo’i mai e tautua ma galue mo le malo ma le atunu’u o Amerika Samoa.

O se tasi o mataupu na fesiligia ai Matila na te faamaninoina, o le polokalame lea o lo o faatupe e le malo Feterale e fesoasoani ai i aiga lima vaivai mo le fausiaina o maota ma laoa (HUD prgoram), lea e aiofia ai ma le polokalame o lo o i lalo o le vaavaaiga a le Faletupe o Atina’e a le malo o Amerika Samoa (DBAS).

Na taua e Matila e faapea, e 3 polokalame eseese o lo o i lalo o le HUD program. O nei polokalame e aofia ai le fausia o fale mo aiga lima vaivai i lalo o le DBAS; o le polkalame e fai paaga ai ma pisinisi o lo o i alo o le Matagaluega o Alamanuia a le malo; ma le polokalame e fesoasoani ai i faafitauli tutupu faafuase’i o loo i lalo o le vaavaaiga a le Matagaluega o Tautua ma Auaunaga Lautele (DHSS).

Na fesili le afioga i le ali’i Faipule ia Faimealelei Anthony Fu’e Allen i le molimau, pe i ai ni suiga na ia faia talu ona filifilia o ia e avea ma Taitai o le Matagaluega, na tali Matila, e le tau faia ni suiga ona o le Matagaluega lava lea ua leva ona tautua ai. Ae afai fo’i e faia ni suiga, o ni suiga mo le manuia o le Matagaluega faapea le tautuaina o le malo.

Na talosaga Faimealelei ia Matila ina ia toe silasila i le polokalame lea sa mafai ai ona auina atu alo ma fanau sa tautua i le Vaega o le EMS e a’oa’oina i Amerika mo faailoga maualuluga. Na taua e Faimealelei le taua tele o le tautua a le EMS i soo se tagata o le atunuu.

Na fesili le Faipule mai Vaifanuatele ia Lavea Fatulegaee P. Mauga pe mafai e le isi polokalame o loo faatupe mai i lalo o le HUD program ona faatau ni Taavale Fuimu mo le Falelima i Sasa’e, na tali Matila, “e mafai.”

Saunoa Lavea e faapea, ua tele tausaga e le o i ai se Taavale Fuimu ma se taavale Ambulance a le EMS mo le Ofisa o Leoleo i Fagaitua.

Saunoa Matila e faapea, o le mae’a ai o le faalavelave lea na maliliu ai ni ali’i Fuimu se to’alua ina ua lavea se Taavale Fuimu i le tausaga na te’a nei, na talosaga atu ai loa le malo i le latou Ofisa mo se vaega tupe e faatau mai ai ni Taavale Fuimu fou.

O lea ua mae’a ona faia fuafuaga mo le faatauina mai o le isi Taavale Fuimu fou e tasi, ae o le Taavale Fuimu e tasi lea ua mae’a ona faatau mai ma ua taunuu i le atunu’u, ua faamoemoe le Ofisa e toe faatumu le tupe a le Ofisa o Leoleo na faatau mai ai le Taavale Fuimu ua mae’a ona taunuu mai i le atunu’u.

Na talosaga le Faipule mai Sua, afioga a Lua’itaua Gene Pan ia Matila mo se avanoa e fesoasoani ai le polokalame a le HUD program e faaleleia ai tulaga faaletonu i lologa ma le tetele o timuga. Sa ia taua e faapea, o le isi lea faafitauli ua tele tausaga o pagatia ai le atunu’u, e le gata o lologa i le itu i sisifo, ae o le tafia o le eleele i le malosi o galu ma tafega i le itu i sasa’e o le atunu’u.

Saunoa Matila e faapea, e mafai ona faatupe e le HUD program manaoga nei, ae sei vagana o ni vaega sa faaletonu i le lologa ma tafega na tula’i mai i le afa o Gita, lea na afatia ai le atunu’u i le 3 tausaga talu ai. E mafua lea tulaga, ona o le alagatupe lea na maua mai e le HUD, na faapitoa lava mo vaega sa faaleagaina i le afa o Gita.

E $1.5 le tupe na maua mai i le polokalame a le HUD i lalo o le Tulafono a le malo tele o le CARES Acts, e fesoasoani ai mo puipuiga o le faama’i oti o le COVID-19. 

Saunoa le affoga i le alii Faipule ia Vailiuama Steve Leasiolagi e faapea, o le tamaoaiga o Amerika Samoa e faitau miliona ma miliona, ae o le tulaga o lo o i ai le soifuaga o tagatanu’u o le atunu’u e matua pau maualalo lava. 

Sa ia taua le to’atele o tagatanu’u o Amerika Samoa e le o lelei fale ma mea e nonofo ai, e oo lava fo’i i auala ma auvai e le o lelei ona fausia lelei. O le tele o taimi e fa’aalu e faipule a latou tupe mai a latou taga e faaleleia ai alavai ma auala, peita’i o vaega uma nei e tatau ona faatupe i lalo o le faitau miliona ma miliona o lo o maua mai i le tele o polokalame eseese nei o loo fesoasoani mai ai le malo tele o Amerika mo le atunu’u.

Na fesili le afioga i le ali’i Faipule ia Avagafono Vaimaga Maiava ia Matila, poo i ai ni ana fuafuaga mo le faaleleia o galuega atoa ai ma aoaoga mo tagata faigaluega i le lumana’i. 

Na taua e le Tamaitai Faatonusili filifilia e faapea, e 6 ni vaega ua vaevaeina i ai ana ta’iala mo le manuia o le tautua a lana matagaluega i le lumana’i. O nei vaega e aofia ai le faaleleia o le tulaga i galuega ma aoaoga, ina ia faalautele le tomai o tagata i soo se galuega; o le faaleleia lea o auala e malosi ai le tamaoaiga; faamalosia le atina’eina o pisinisi laiti i le atunu’u; fai paaga ma pisinisi i totonu ma fafo atu o le atunu’u, ina ia mafai ai ona fesoasoani i auala e faamalosia ai le tamaoaiga; ia maua mai ni alagatupe mai fafo e mafai ona nono atu i tagatanu’u e amata ai pisinisi, ma ia saili auala e faaleleia ai le tele o le tamaoaiga o loo maua i laufanua o Amerika Samoa.

O se tasi o itu sa fautuaina i le iloiloga, o le tulaga o pemita mo le fausiaina o fale i le itu i sisifo o le atunu’u. Saunoa le afioga i le ali’i Faipule ia Larry Sanitoa e faapea, o le tele o faafitauli ua mafua ai on lologa ma tafega, ona e le o mulimulita’i le malo i le tulafono mo le fausiaina o fale. O le tele o fale sa fautua e le malo i le 2 tausaga talu ai, sa fausia lava e aunoa ma ni pemita, o se faiga ua le tusa ma le tulafono.

Ina ua fesiligia ona agava’a atoa ai ma lana tautua, na taua ai e le Faatonusili filifilia e faapea, o le 15 lenei o tausaga talu ona tautua i le malo o Amerika Samoa, ina ua toe taliu mai i atunuu i fafo ma aoga ma galue ai.

Na faau’u mai o ia i le Kolisi Tuufaatasi a Amerika Samoa (ASCC) mo tausaga e 2 na a’o tauina ai, ona malaga atu ai loa lea i le Iunivesite a Arizona ma faauu mai ai lona faailoga BA i tulaga tau Pisinisi (Political Science, Minor in Business Administration) mai le tausaga e 2003-2005.

O le tausaga e 2015-2017 na faauu mai ai o ia i le Iunivesite o Amerika i le faailoga o le MA i tulaga o Pulega ma le Fuafuaina o le Tamaoaiga (Master of Public Administration and Policy).

Na ulua’i galue Matila mo le Ofisa o le Matagaluega a le Initeria i Amerika Samoa mo tausaga e 3, a o le i malaga atu i le Laumua i Uosigitone ma galue ai i le Ofisa o le afioga i le ali’i Senatoaia Daniel K. Inouye mo tausaga e 2, a o le i toe taliu mai ma galue i le Ofisa o le Kovana i lalo o le nofoaiga a Togiola ma Faoa mo le umi e 5 tausaga.

O le tausaga e 2017 na galue ai loa o ia i le Matagaluega o Alamanuia ma le Tamaoaiga a le malo, ma avea ai o ia ma Faufautua Faapitoa mo le Faatonusili, seia oo ina filifilia ai loa o ia e le faigamalo a Lemanu ma Talauega e avea ma Faatonusili filifilia mo lenei Matagaluega taua a le malo mo le isi 4 tausaga o lo o lumana’i nei.