Pagota sola i tua mai le toese ua toe fa’afoi i le falepuipui : ‘O lo’o masalomia lona osofaia le TBAS i Tafuna’

Pago Pago - AMERIKA SAMOA

O se pagota na sola ese mai le toese i Tafuna ua toe maua ma toe tofia i le falepuipui. Ma o lo’o masalomia o ia lea sa taumafai e ave fa’agaoi ni mea totino a le Faletupe a le Teritori a Amerika Samoa (TBAS i lona lala i Tafuna, i le faaiuga o le vaiaso ua te’a atu nei. 

O le a tu’uaia le ali’i pagota pe a mae’a su’esu’ega a leoleo, e pei ona fa’amaonia mai ai e le ofisa sinia o Leoleo a le Matagaluega o le Puipuiga o le Saogalemu Lautele, Pouu’amea Tuaolo Supapo, ina ua fesiligia e le Samoa News. 

“O lea ua toe fo’i le pagota i lalo o le vaavaaiga a leoleo ma e le mafai ona ou toe fai se faamatalaga ona o loo faagasolo suesuega a leoleo,” ose isi vaega lea o le tali mai a Supapo i fesili a le Samoa News. 

O le ali’i pagota o lo o fesiligia, ua fa’amaonia mai e Leoleo Sinia i le Samoa News, e suafa ia Joeita Fa’aaliga, lea e i ai fa’amaumauga o le sola ese ma le isi pagota, mai le toese i le tausaga e 2016.

I lea solaaga talu ai, na gaoia ai e Fa’aaliga se ato tupe a se tama’ita’i sa i totonu o le ta’avale sa paka i le Ofisa o le ASPA i Tafuna.

Sa ia gaoia foi se fale i le itu i Tafuna ae le’i toe alu i le toese ma i le taimi o lea mataupu, na taua ai e le ua molia lona fia’ai o le mafua’aga lea na sola ai i tua mai le falepuipui.

E pei ona lipotia e le Samoa News i le masina o Iulai, o lo o tumau pea le le mautonu o lea pulega, ona o le leai o se fa’aaliga mo le lautele pe a sola ese se pagota mai le toese i Tafuna.

O se faamatalaga tusitusia na tuuina mai e le TBAS i le Aso Gafua, o loo taua ai le talepeina o le lala i Tafuna i le vaveao o le Aso Toonai, Novema 27, 2022, ma iu ai ina “faaleagaina tele le ATM a le TUPE VAVE ua le mafai ona toe faaleleia”.

Fa’aalia foi e le TBAS e leai se mea na aveeseina mai le ATM.

E pei ona lipotia e le Samoa News i le Aso Gafua o le vaiaso lenei, le masalomia o se pagota sa taumafai e osofa’i le ATM a le TBAS ma le faia o suesuega a leoleo i lenei mataupu. 

O faiaoga o Aoga Maualuga a Tafuna sa teuteuina le auala mo le ta’aloga o le siamupini o le lakapi i le aso To’ona’i, na latou vaaia muamua ai le silia i le lima ta’avale a leoleo o lo o siomia ai le lala i Tafuna.

Na vaaia leoleo i le nofoaga o le faletupe i Tafuna pe tusa o le itula e 4 i le vaveao, ma puipuia ai le vaaiga ma pu’e ata.