Osofa’ia e se alii 26 tausaga ia le falea’oga tulaga muamua a Pago Pago

Pago Pago - AMERIKA SAMOA

E tusa ai ma fa’amaumauga a le faamasinoga, o le 8:18 i le taeao o le aso 28 o Aperila, 2025, sa vala’au mai ai se faiaoga ECE a le aoga tulaga muamua a Pago Pago, i le ofisa a leoleo i Fagatogo, e tusa ai ma le gaoia o a latou potu a’oga.

Ina ua taunu’u leoleo, sa fa’ailoa iai e le faiaoga sa valaau i le ofisa a leoleo, lona usu atu i le a’oga i lea taeao, ma o latou va’aia ma nisi faiaoga, ua matala faitotoa o potu o lo’o teuina ai a latou meaaoga (storage).  Ae le gata i lea, o le tele o a latou laulau, o lo’o matala mai ia ‘drawers’ pito i luga.

Ma e fa ni potu a’oga sa a’afia i lenei osofaiga.  E foliga mai sa fa’aaogaina e le gaoi ia se naifi ma se seleulu, lea na mauaina i totonu o se tasi o potu, e talepe ai loka o faitoto’a.  

Sa faamatalaina e se tasi o teu fale a le aoga, i leoleo, lona va’aia o se alii e suafa ia Austin Fanene, o fealua’i le lotoa a le aoga, e foliga mai o lo’o tau saili se mea.  Ae ina ua ia (teu fale) savali atu e fesili iai, sa faapea ona tamo’e ‘ese ia Austin.

Sa faapea ona agai atu leoleo e saili ia Austin, ma sa maua atu o ia o lo’o tu i autafa o se lapisi.  Ma sa fa’atonuina o ia e leoleo ina ia o latou o atu i le ofisa a leoleo, mo le fa’ataunu’uina o sa latou su’esu’ega.  Na malie iai ia Austin ma o atu loa ma leoleo i le ofisa a leoleo.

Ina ua fa’atalanoaina e leoleo ia Austin, i le ofisa a leoleo, sa fa’amaonia e Austin i leoleo, o ia na osofa’ia ia le falea’oga ma sa ia fa’aaogaina muamua ia se naifi 10 inisi, e tatala ai le faitoto’a o le fale le ta’ua, a le ECE.  Ae na te le’i osofa’ia ia potu a’oga.

Sa ta’ua e Austin lona gaoia o bowl saimini, o se mitiafu lanu moana, o se ogaumu ma ni komipiuta feavea’i (tablets), se tolu.

Na ia ioeina foi lona fa’atauina uma o ‘tablets’ e tolu, i ni tagata e le masani ai, i le ta’i $10.

Sa mafai ona tusia le fa’amatalaga a Austin.  Ma o le tau aofa’i o meatotino sa ia gaoia, na silia ma le $100.  E le i ta’ua i fa’amaumauga a le faamasinoga, pe sa lokaina Austin i le taimi lea.

Ae o ona moliaga, na aofia ai le Solivale o fanua ma fale, Faomea i lona tulaga e lua, Gaoi ma le Faaleagaina o ni meatotino, i lona tulaga e tolu.

O moliaga o le solivale o fanua ma fale ma le moliaga o le faaleagaina o meatotino, o ni vaega ‘B’ i solitulafono mama.  E mafai ona nofosala ai i le ta’i ono masina, i le falepuipui, i le moliaga e tasi.  Po o sala tupe e ta’i $500; po o fa’asalaga uma e lua.

O moliaga o le Faomea ma le Gaoi, o ni vaega ‘C’ i solitulafono mamafa.  E mafai ona nofosala ai i le falepuipui, e le silia ma le ta’i fitu tausaga, i le moliaga e tasi.  Po o ni sala tupe e silia ma le ta’i $5,000; po o faasalaga uma e lua.

E $5,000 se vaegatupe na fa’atulagaina, e mafai ona tatalaina ai i tua Austin mai i le falepuipui, e faatalitali ai lona faamasinoga.