Osofa’i e Leoleo le toese i Tafuna ma maua i ai fualaau fa’asaina

Na osofa’i e Leoleo su’esu’e mai le Vaega e Suesueina Fualaau Fa’asaina i le Ofisa o Leoleo le nofoaga o le toese i Tafuna i le vaiaso na te’a nei, ma tu’uaia ai le maua o se vaega tele o fualaau fa’asaina o le aisa, atoa ai ma vaega e fa’aaoga e ula ai fualaau fa’asaina e aofia ai paipa tioata.

Na taumafai le Samoa News e saili se fa’amaoniga o lenei ripoti mai le Pule o le Toese i Tafuna, le tofa i le Tootoo ia Tauese Vaaomala Sunia, peita’i na saunoa Tauese, e le mafai ona ia talanoa i le mataupu se’i vagana ua fa’ataga atu o ia e le Komesina o Leoleo. Sa ia fautuaina le Samoa News e fesili muamua i le Komesina o Leoleo mo se fa’atanaga, ona fa’atoa mafai ai loa lea ona ia talanoa i le mataupu.

E po eleele le aso Lulu na te’a nei e lei tali mai lava le afioga i le ali’i Komesina ia Le’i Sonny Thompson i fesili a le Samoa News na lafo i ai e uiga i lenei mataupu.

Ae tusa ai o ripoti fa’atuatuaina sa tuuina mai i le Samoa News, sa taua ai le tulaga lea, o le mae’a ai ona faia o se suega faapitoa e sui o le Ofisa Faanofovaavaaia fa’asaga i pagota o loo taofia i le toese poo latou tagofia fualaau fa’asaina, na sosoo atu ai loa ma le  osofaiga a Leoleo Suesue ma latou sailia ai totonu atoa o le nofoaga o le toese.

E le i mautinoa mai pe i ai ni isi o le a molia i le umia fa’asolitulafono o fualaau fa’asaina, e mafua mai i le osofaiga sa faia i le toese i le vaiaso na te’a nei.

E to’a 8 i latou o lo o tuli a latou fa’asalaga i le toese na faia i ai suega faapitoa, ina ia mautinoa o lo o mama i latou mai le tagofia o fualaau fa’asaina. O le to’atolu o i latou nei na fa’amaonia o lo o i ai le vailaau oona o lo o maua i le pauta o le aisa i totonu o latou tino.

O i latou nei e aofia ai Waye “Ueni” Gasolo, John Tuupo ma Tolupo Hodges Jr. O le taeao o le aso Lulu na te’a nei na tutula’i uma ai i latou nei i luma o le Fa’amasinoga Maualuga, i lalo o tusi saisai mai le Ofisa Faanofovaavaaia, ona o tu’uaiga i lo latou le usitaia lea o tuutuuga o a latou nofovaavaaia, o le fa’asa lea ona latou toe tagofia fualaau fa’asaina.

O le aso 15 Me i le itula e 9:00 i le taeao lea ua fa’atulaga e faia ai ulua’i iloiloga a i latou nei i luma o le fa’amasinoga e tusa ai o lenei mataupu.

Na taua e molimau fa’atuatuaina e fa’apea, o lo o masalomia taimi o asiasiga a aiga o pagota o loo taofia i le toese, o iina lea o lo o auala atu ai i totonu o le nofoaga fualaau fa’asaina.

Na taua e se tasi o Leoleo Sinia e fa’apea, ua tatau ona silasila le Ofisa o Leoleo i se isi gaioiga e mafai ai ona puipuia le toe ulufale atu o fualaau faasaina i totonu o le falepuipui i taimi o asiasiga, pe afai o lo o masalomia lea tulaga.

O ali’i e to’atolu e pei ona taua, o lo o tuli a latou fa’asalaga fa’a falepuipui i le toese i Tafuna, i le mae’a ai lea ona ta’usala o i latou i le umia fa’asolitulafono o vaega o le pauta oona o le aisa.

O Tuupo o loo tuli lona fa’asalaga e 28 masina, e mafua mai ina ua ta’usala o ia i le umia faasolitulafono o le pauta oona o le aisa, atoa ai ma le faalauiloaina o faiga faatalitane e aafia ai tama’ita’i talavou.

O se tasi o tuutuuga o lana nofovaavaaia e 7 tausaga, o le fa’asa lea ona ia toe tagofia fualaau fa’asaina, atoa ai ma le faia o ni suega i lona tino ina ia faamaonia ai na te le o toe tagofia fualaau fa’asaina.

O le ali’i o Gasolo, o loo tuli fo’i sana fa’asalaga faa falepuipui e 28 masina i le toese ina ua ta’usala o ia i le moliaga o le umia faasolitulafono o vaega o le pauta faasaina o le aisa.

O ni isi o tuutuuga o lana nofovaavaaia, e aofia ai le faasa lea ona ia toe tagofia fualaau fa’asaina, atoa ai ma le faia o se suega i lona tino ina ia iloa ai na te le o toe tagofia fualaau fa’asaina.

I le taimi na lau ai le fa’asalaga a Gasolo i le masina o Aokuso na te’a nei na saunoa ai le afioga i le Fa’amasino Sili ia Michael Kruse e fa’apea, tusa lava pe taofia Gasolo i totonu o le toese, e manaomia le faia pea o suega i lona tino ina ia mautinoa poo ia fa’aaoga fualaau fa’asaina, ona e le o mautinoa poo saogalemu le toese mai le oo atu i ai o fualaau fa’asaina.

O Hodges Jr na ta’usala i lona umia faasolitulafono o vaega o le pauta oona o le aisa talu mai le 2011.

O le magalo ai o Hodges Jr mai le tuliina o lana fa’asalaga, na toe pu’e fa’apagota ai o ia e Leoleo i le masina o Aperila na te’a nei, ona o tuuaiga i lona le usitaia lea o poloaiga o lana nofovaavaaia, e faasa ai ona ia toe tagofia fualaau fa’asina, o le mafua’aga lena o le toe taofia o ia i le toese i Tafuna.

O lo o taofia uma i latou nei e to’atolu i le toese e fa’atali ai le latou iloiloga lea ua fa’atulaga mo le vaiaso fou.