Onosa’i I Mea Tiga

Vaega: 99

Alo maia, o le a toe fa’aauau atu la tatou tala. Na muta mai la tatou tala, ina ua ma’ea le fa’aipoipoga a le teine o Malia Matalena, ma o se aso fiafia lea i aiga ga lua. O le tonu lava na fai e le lo’ommatua o Malia, o le tonu lava lea na fai, ma sa atili ai ona matagofie le aso fiafia o le tama’ita’i o Lanuola.

Fai mai, na mana’o le tama e nonofo ma Lanuola i lona aiga, ae e le i fa’avaivai ai le lo’omatua o Malia, “Matalena, e te le alu ‘ese ma le aiga lenei, fai i lou to’alua e te nofo mai lava i o’u talane, o a le finagalo o le Atua ia te a’u, a’o lea ou te va’ai atu ia outou uma, a fai fo’i ni ta’ito’alua o Mataniu ma isi teine, o le mea lava le na e fai.”

Na usita’i Matalena i le fa’atonuga, ma o lea na alo ai loa Vesi ma Luisa fa’apea ma Lilo ma Loleta, e fai le fale e nonofo ai Matalena ma lona to’alua, i totonu o ‘ele’ele o le aiga o si o latou tama o Mose. Se i o tatou liliu e tau sa’ili po’o le a le mea ua tupu i le to’alua o Filipina, le tamaloa Palagi o Roger.

Fai mai le tala, ua amata ona i’ite Lilo, ona e vala’au atu i Ausetalia, ae ua ‘ese le tagata na talia maia le telefoni. O le leo o se tama’ita’i na tali maia le telefoni, na toe fesili atu i ai Lilo, pe o le potu lea e nofo ai Roger, ae sau le tali a le tama’ita’i, ioe, o le potu lea e nofo ai Roger.

Na toe fesili atu i ai Lilo, po’o fea la o i ai Roger, ae fa’alogo atu Lilo, ua ‘ese le tala a le teine na fai mai ia te ia. Ua tu’u i lalo e Lilo le telefoni, ma tilotilo ane i le itu o lo’o i ai lona to’alua, lea o lo’o la faigaluega fa’atasi, e le i iloa e Loleta, o lea na vala’au Lilo i Ausetalia e su’e Roger. O le isi itu, ua amata ona viga viga Filipina, pe na maua mai se tala i lona to’alua, ae tali atu lona tuagane, na vala’au i ai, ae e leai se isi na tali maia le telefoni.

A’o le vala’au lea a Lilo na fai nei, lea na tali mai ai e le tama’ita’i le telefoni, o le vala’au lea, ua lagona ai le popole o le tama. Ua tu’u i lalo e Lilo le telefoni, ae savali atu loa i le itu o lo’o i ai Loleta. Fai mai, na iloa mamao mai lava e lona to’alua, ua i ai fo’i le mea ua mamafa i le loto o Lilo, o lea na tu mai ai i luga ma fa’afeiloa’i le savali atu a Lilo ia te ia.

Na geno ane nei Lilo i lona to’alua la te o i fafo, ua iloa mai e Loleta le uiga, ma ua savavali loa i fafo. Ua saofafa’i ifo nei i lalo o se la’au ua sili ona matagofie, lea o lo’o i talane o le ofisa. Ua iloa mai e Loleta ua i ai le mea ua tupu fua i le fa’apea o Lilo. “Lilo, e i ai se mea ua tupu, tautala mai, e i ai se mea ua tupu.?”

Ua na o le punou o Lilo i lea taimi, pau le mea na ia manatu i ai o si ona tuafafine o Filipina ma si ana tama, o le mea lea na mamafa i le loto o Lilo. “Loleta, na ou vala’au i le numera na au mai e le ofisa o va’alele, manatua lea na ta vala’au muamua ae e le talia maia le telefoni, “O nei la sa ou toe vala’au, ae tali mai loa le telefoni i le potu o Roger, ua o’u te’i ina ua tali mai le telefoni, o le teine, ae e le o Roger.” Fai mai ua le taofiofia Loleta i lea taimi, “O le a la lau tala na fai i le teine, a’o ai le na teine ua talia maia le telefoni i potu o Roger.”

E faia pea...