Onosa’i I Mea Tiga

aVaega: 98

Na muta mai la tatou tala, ina ua taunu’u tama’ita’i o Mataniu ma Lanuola i le falema’i, e va’ai Filipina. E ui fo’i i nisi tulaga se manu e o’o i ai Filipina i lona ma’i, ae ua va’aia le alofa o le Atua ma Lana fa’amalologa, lea ua toe manuia mai ai.

Manatua fo’i, o le talosaga a Filipina na fai i lona uso o Luisa, ia alofa e fai i a Lilo ia vala’au si ona to’alua, ma logo i ai o lea ua ola ia, ae ‘aua le popole mai ma ta’u fo’i i ai, o le tama le la tama. Ua fai nei le talatalanoaga a Malia ma lana fanau, a’o lea lava e nofo atu ai ma le toeaina o Lefefe, ua le fia alu i lona aiga.

Na toe manatua nei e Luisa le tala a si ona uso na fai ane i a te ia, ina ia fai i a Lilo e vala’au lona to’alua ma logo i ai mea uma. Ua uma ona talanoa Luisa i a Lilo e tusa ai ma le mana’oga o Filipina, e logo vave lona toalua ma fai i ai ua ola, ae ‘aua le popole mai ia te ia, o lea ua malosi. E le o iloa lava e le lo’omatua o Malia le mea na tupu i a Filipina, sa natia lava e Lilo ma Luisa, ona o le manatu ne i te’i ua tupu se fa’alavelave i si o latou tina.

Ina ua o’o i le aso e soso’o ai, na taumafai ai loa Lilo ma Loleta e su’e po’o fea ua o’o i ai le va’alele lea o lo’o kapeteni ai Roger, le to’alua o Filipina. Na su’e muamua lava i le kamupani va’alele, ma na ta’u ane ai loa le faletalimalo i Ausetalia, lea o lo’o fa’amautu i ai Roger ma le aufaigaluega sa o latou malaga fa’atasi.

O le lona fa o aso, na te’a mai ai i tua Filipina ma lana tama, mai le falema’i. Fai mai, o se fiafiaga sili i le loto o le lo’omatua o Malia, e le i toe mana’o le lo’omatua e toe ave’ese mai e se tagata le pepe mai i ona talane. Fai mai, e pesepese i ai, e genogeno i ai le lo’omatua i taimi uma, ua lagona le fiafia o lona loto. O le igoa ua fa’aigoa ai nei le pepe fou, o Ali’ioaiga Alfred McMillian. Ae fai mai, a genogeno nei i ai le lo’omatua, ua fa’apea ana tala, “Ali’ioaiga, ma’i mau pe ana e fanau mai, a’o ola si ou tama matua o Mose, o se fiafiaga sili lenei mo ia, ona o oe, fa’afetai i le Atua, ua maua oe, ia e tama lelei, ia toa lou loto ma ia e usita’i i ou matua, ua e fa’alogo mai.”

Fai mai, a fai tala ia a le lo’omatua i le pepe, e iloa atu lava e Filipina le sa’a solo o vae o si ana tama ma ‘ata a’e i lona tina. O se tama ua sili ona lalelei, ma e leai se mea o lona tama e ave’esea, o mata, o foliga ma lona faitino.

Ua tapena nei le aiga mo le fa’aipoipoga a le tama’ita’i o Malia Matalena, le tama matua a Vesi ma Luisa, sa fai fo’i finauga i aiga galua, ona e manana’o le aiga o le tama e na o le fa’apaia ma fai le la ‘aiga ona uma lea. Ae alu atu le finau a le lo’omatua o Malia, e leai, e fai lava le fa’aSamoa i le fa’aipoipoga a lana tama.

Ua fa’apea lava ona fai, fai mai o se aso fiafia i le aiga atoa, o lava mea na natia, ua aliali a’e uma i luga i le manatu e tasi, fai ia lelei mea uma, afai lava ua manana’o e fai le fa’aSamoa, fai ia mafai. i le va’ai a le lo’omatua o Malia, o se aiga e fia tagagata le aiga o le to’alua o Matalena, ae e le i tu’u mamaina e le lo’omatua, ma e le i tele lava i se pito faiga a le lo’omatua.

Talu ona te’a mai i tua Filipina ma si ana tama, sa amata ai lava ona vala’au Lilo i Ausetalia e su’e Roger. O le tele o taimi e tatagi le telefoni, ae e leai se isi e talia maia. Ae o le isi vala’au a Lilo, na tatagi mai ai le telefoni i le potu o Roger, ae e ‘ese le tagata sa ia tali maia.

E faia pea...