Onosa’i I Mea Tiga

Vaega: 45

Ia malo le soifua maua i lenei taeao toto’a, malo fo’i le onosa’i i faiva ma tiute o lo’o feagai ai i lenei aso, e i ai pea le fa’amoemoe, o lo’o maualuga pea le alofa o le Atua mo i tatou i aso uma. Ae alo maia, o le a toe fa’aauau atu la tatou tala mo lenei aso.

Na muta mai la tatou tala, ina ua taunu’u nei le malaga a Lilo ma le toeaina o Lefefe ia fa’atasi ai ma le tama o Vesi i le fale o le aiga o Loleta aua le fa’amalamalamaga a Lilo i le tama’ita’i ua fiafia i ai lona loto ma lona mafaufau. Se amuia Loleta ia, ua alu i ai le fa’amalamalamaga, ia a’o le tusi tala e pei lava o si lo’omatua o Malia, na ona fa’apea mai a o le Palagi, “You wanna marry me?” Alu atu loa ma le tali latou e le i toe fa’atali, “Yes Sir, shake it but don’t break it.” Ea ea loa ma le tusi tala i le va’alele alu sa’o lava i Amrika, e o uma tagata i Amerika, ae alu le tusi tala i Amerika.

Ua savavali nei i totonu o le fale ia Lefefe ma Vesi, ae ua mulimuli atu i tua Lilo ma Loleta. Fai mai le tala, na u ane i ai autafa o le lo’omatua o Susitina e le fia pupula ane i le tama lea ua saofa’i atu nei i totonu o le fale. Ae ua vala’au ane le matai o le aiga o Falaniko e fa’afeiloa’i le malaga lea ua alu ane.

E le i tu mai i luga le lo’omatua o Susitina, o lea na savali atu ai loa Lefefe ma fa’afeiloa’i. Fai mai, na iloa mamao atu lava e Lefefe le mea lea ua tupu. E o’o fo’i ia Vesi, ua pei o le ‘ata i le fa’ata i a Vesi ia uiga o le tina o Loleta lea ua fa’aali mai nei ia la’ua.

E leai ma se gagana ane o le lo’omatua, a ua na o le tapilipili o lona ili ma fa’asaga i le isi itu.

“Ia afifio maia ma tala mai a’ao, fa’afetai i le alofa o le Atua ua tatou feiloa’i i luma o nu’u ae le o tua o nu’u.” O le tala lea na fa’afeiloa’i ane ai e le matai o le aiga o Falaniko ia Lefefe, ae fai mai na ma’oga a’e lava i luga le leo o le lo’omatua, “E a, o tua o ai le na ua feiloa’i ai.” E fai a tala a le lo’omatua, ma save’u le fala lili’i o lo’o nofo ai.

Na pupula to’a ane nei le toeaina o Falaniko ma lona le malie tele, ae ua onosa’i lava le toeaina, se i ma’ea lelei mea uma ona liliu atu loa lea i le lo’omatua. Na tali mai Lefefe i le fa’afeiloa’i a le matai o le aiga o Loleta, ma o upu lava ua masani ai le atunu’u i tulaga fa’apea. E le i umi lava, ae vala’au fesili ane loa Lefefe ia Vesi, po’o fea o i ai Lilo.

Na tu a’e nei i luga Vesi ma savali loa i fafo e vala’au ia Lilo e alu atu i totonu o le fale. E savali mai i fafo Vesi, ua si’o atoa e tagata faigaluega le tama o Lilo ma le teine o Loleta, ua o’o ane le aufaigaluega e feiloa’i i le tama o le a avea ma to’alua o Loleta ma ona fesoasoani i aso uma o lona ola.

E moni lava le upu, ua mamalu le atiu i le aoa, aua ua pei ua ‘ese lava lea afiafi i le fale o le lo’omatua ma le toeaina. Fai mai le tala, ina ua oso a’e i fafo le tama o Lilo, na fa’ataupupula uma ane i ai tagata faigaluega, ae maise fo’i o i latou o lo’o o’o atu e fai a latou fa’atau i le faleoloa o Falaniko ma Susitina.

Ua na o le tilotilo ane nei i a Lilo, i le lalelei o lenei tama, e fai o lona faitino ma ona foliga, a’o le va’ai fo’i a tagata i lea taimi, e foliga mai ua pei ua toe fa’aopoopo le la lelei o Lilo i lea aso. Na tu nei Vesi ma tilotilo ane i a Lilo, ua ‘ese fo’i le va’ai a Vesi latou i lea taimi, ua lolofi ane nei i ai tagata ma fa’atalofa ma latou feiloa’i.

Na tu nei Vesi ma tilotilo ane i ai, ma na vala’au loa, “Lilo, sau ia o lo’o fa’atali mai matua o Loleta, la na fai mai e te lua o atu i totonu.” I le taimi na tu ai i luga Vesi e savali mai i fafo e avatu Lilo. O le taimi fo’i lea na ‘atigu ai ma nifo o le lo’omatua o Susitina ma fa’apea ona mafaufauga, “E, ua ma’imau si a’u tama i lenei tagata.”

E faia pea...