Onosa’i I Mea Tiga

Vaega: 27

Tatou fa’afo’i pea le vi’iga ma le fa’amanu i lo tatou Atua, ona o le anoanoa’i o Ana fa’amanuiaga mo i tatou i aso uma o lo tatou ola. Tatou a’ea’e ia lea manu ua ulu, ma o tatou talia mea uma e o’o mai, aua o lenei lalolagi o lo’o tatou ola ai, o le lalolagi lava o puapuaga ma faigata, ia o tatou maua pea le onosa’i ma le fa’apalepale i mea uma. Ao, le vi’iga e fo’i lava i le Atua Soifua, ia manuia le alo faiva o le atunu’u i lenei aso.

Na muta mai la tatou tala, ina ua taunu’u Lilo ma Filipina i le fale, ina ua manava galuega o le aso, o lea la ua feiloa’i ma si o la tina le lo’omatua o Malia. Manatua fo’i, o lea ua matua’i le iloa e Lilo, po’o le a le mea o le a fai, ae o le a fo’i se auala e mafai ai ona ia talanoa atu i ona matua e tusa ai ma le tonu ua uma ona o la faia ma Loleta.

Ae se i o tatou tulituliloaina pea, po’o fea o le a o’o i ai mana’oga o si tama o Lilo. Ua saofafa’i ifo nei i lalo Lilo ma Filipina ma ua amata loa le mea’ai, ua tau le alu i totonu mea’ai a Lilo i lona popole tele i ona matua. E le i umi lava ae ma’ona Lilo, ua fa’afetai ane nei i lona tina, ma tu a’e loa i luga ma savali loa i tua i lona faleo’o ma sa’ofa’i ifo loa i lalo.

Fai mai, na i’u lava ina maligi ifo loimata o le tama, ua le mautonu lona mafaufau, ma ua le iloa fo’i po’o le a le mea o le a fai. Ua manatua nei e Lilo le toeaina o Lefefe i lea taimi. Na fa’apea mafaufauga o Lilo, afai e alu i a Lefefe e sau e fesoasoani ia te ia i lana mataupu, a tonu e tau tu’u mai ai loto o ona matua. Ua  mafaufau le tama i uiga o Lefefe, e fa’a’ata’ata fua, ae o se matai ua sili ona lelei i totonu o lo latou aiga, e le gata i lea, ae o le nu’u fo’i ma le itumalo, e vali uma e Lefefe matai, aua ua sa’o ai le igoa ua fa’asuafa ai e lona aiga.

Fai mai, o le taimi atoa a’o fa’asolosolo mafaufauga o Lilo, o le taimi lea, o lo’o talatalanoa ai Vesi ma le toeaina o Mose e uiga i le mana’oga o Lilo. E le o iloa atu la e Lilo, o lea o lo’o fa’ailoa fo’i manatu o Vesi i lona tama o Mose e fa’ailoa ai le mana’oga o si ona uso o Lilo.

“Vesi, si o’u atali’i, ua uma ona talanoa mai Lilo i a ma’ua ma le lo’omatua, o ia ua fai fai sona to’alua, o lea la ua ou tautala atu ai ia te oe, pe o le a fo’i sou manatu a’o sou loto e tusa ai ma le fanoga a Lilo, ae e sili pe a ta talatalanoa ai, o lea fo’i ua uma ona ma fai i ai ma le lo’omatua, e aumai le teine i le fale, se i o ma feiloa’i i ai ma se i fai fo’i se tonu lelei, ona fa’atino ai lea o ana fuafuaga.”

Na fa’ate’ia Vesi i lea tala, ona e le i iloa e la’ua ma Luisa se  mea o tupu, o lea na tu a’e ai loa i luga Vesi ma tilotilo ane ia Mose ma fa’apea ane, “Tama, va’ai oe, o mea lelei lava mea uma, afai ua loto Lilo e fai sona to’alua, o le a le mea e tu’u ai, fai, ae ia alofa fa’amaoni le na teine ia te ia, o le mea lea e sili ona ta’ua i le olaga o le tagata.”

Ua le toe tautala le toeaina o Mose, ae ua foliga mai ua tau maligi ona loimata, ae na toe fa’apea ane lava, “Vesi, va’ai oe le atali’i, ua ou pople, ona ou te le iloa po’o le a se manatu o le lo’omatua, ae sa tau alu a’e fo’i i luga le fe’afe’a o le lo’omatua, ma ua tau le taofiofia fo’i, ae talosia ia, ia ona lagona le filemu ma le loto maualalo, ona manuia lea o mea uma.”

“Mose, ia e leai lava sa’u tala e fai atu, ae fa’afetai ua e fa’aali mai ia te a’u, e le o iloa fo’i e Luisa lenei mea, ae ou te talitonu, o le a fiafia Luisa pe afai o le a ou fai atu i ai, i le mana’oga o si ona tuagane. Ae, ‘aua e te popole, se e au mai e le Atua le taimi ma le aso e fa’atino ai mea uma, ua lagona fo’i lo’u fiafia, o le a fai se to’alua o Lilo, ua matua fo’i ia, ma e tatau lava ona fai sona to’alua lelei, e fesoasoani ia te ia i mea e fai, ma le isi itu, se i fa’amafanafana fo’i si tama ia ua lagona le malulu o le po, e pei fo’i o le mea ua o’o i ai ta’ua, o lea lava e sikueli palegi lava fa’amafanafana a lo’omatutua.”

Ua ‘ata le toeaina o Mose ma fa’apea ane, “La lea, la lea, ae ua tau alu feto’i fo’i le fa’amafanafana a le lo’omatua i lenei vaitaimi, e pei e sili pe a su’e se simolo la’ititi se i tau sui ai fo’i le fa’amafanafana a le toeaina.”

E faia pea…..