Olaga Le Tumau

Vaega: 205

Taeao manuia i lou alafa’i mai i fanuga lelei o lenei aso fou, o se aso e fa’aopoopo i lou soifua ma si o’u nei ola vaivai. E ao ai ona o tatou fa’apea ifo, “Le Atua Mamana e, ia e alofa ma fa’amanuia mai ia i matou i lenei aso, o faiva ma tiute o le a feagai ai ma i matou, ia taunu’u i le manuia fuafuaga uma, a’o le vi’iga matou te fa’afo’i atu i Lau Afio e fa’avavau, Amene.”

O le vaega mulimuli lenei o la tatou tala fa’asolo “Olaga Le Tumau” afai na i ai se upu ua le tautamali’i i lau faitau, ia malu ave i fale i lou finagalo, o upu lava a le atunu’u, e poto lava le tautai, ae se lana atu i ava, ae e i ai le fa’amoemoe, ua maua se a’oa’oga lelei mo i tatou, ia o tatou maua le alofa, le loto fa’amagalo le onosa’i ma le fa’apalepale i mea uma, e pei ona finagalo lo tatou Atua, ia o tatou faia.

Ae alo maia, o le a fa’ama’ea atu la tatou tala, ae ia manuia lou alo atu i faiva ma tiute o lenei aso.

Ua ma’ea le fa’amasinoga o Loleni, fai mai, e luasefulu tausaga o le a nofosala ai i le falepuipui, o lona uiga a te’a mai i tua Loleni ua atoa le limasefulu lua o ona tausaga. O Niki, ona ua mafai ona avea ma molimau a le Malo, o lea ua na o le sefulu ai tausaga o lana sala.

Ua uma le fa’aipoipoga a Keisi ma Keneti ma o se fa’aipoipoga sa i ai le lelei o ona itu uma, aua ua molimau tagata, i le tausa’afia o uiga o Keneti, ma ua o latou iloa fo’i le alofa moni o Keneti ia Keisi.

Fai mai, ua le toe i ai lava nisi mea e fa’alavelave i le loto ma le mafaufu o Keisi, ua sagai ane nei e fai lona tiute o le alofa, lagolagosua malosi, fa’amalosi au ia Keneti. Sa i ai le manatu, o le a malolo Keneti mai i lana galuega, peita’i, sa finau malosi pea Keneti, e leai, e lelei fo’i lea, e i ai se mea e fa’aalu ai lona taimi.

Ua ma’ea ona saini e Keisi le miliona tala e tu’u mo Loleni, e amata ai lona olaga pe a te’a mai i tua, o lea tupe, o le tupe lava a Keisi mai i lona siea. Amuia Keisi ia, e maua le loto fa’amagalo ma le loto alofa a ea, e le tatau ea ona o tatou faia ia mea ua silisili ona lelei.

Ua toe maua le isi tama a Lulu ma ua fa’aigoa ia Keneti, aua o le tama, o le la tama lea ma ieremia. Ua matua fo’i Lola, ma ua alu e fa’aauau ana a’oa’oga i le isi Setete, ma e fai lava ma o i ai Lulu ma ieremi e asi.

Ua to’amalie mea uma, o a fo’i mea na tutupu ma mafatiaga, o lea ua to’amalie i le filemu mea uma ma ua le toe i ai se mea e toe mamafa i le loto ma le mafaufau o Keisi. Ua maua le la fanau, o le tama ma le teine, ma ua tausi lelei nei e Keisi le la fanau ma Keneti.

Ua fou mea uma, ua le toe i ai se mea tuai, aua o le fuata ma lona lou, o le aso fo’i ma ona ‘ai.  Soifua