O TEINE E TO’ATOLU MA LE TAMA NA LEILOA

Vaega e 12

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O TEINE E TO’ATOLU MA LE TAMA NA LEILOA” i lona vaega e 12.

**********************************************************

Ina ua le lava e le alii mau’oa ona faatalitali i le afafine laititi a le tamaloa gaosi falaoamata, i le taeao na soso’o ai.  Sa faapea loa ona ia savali atu agai i le potu o lona maota lea e fefefe tagata ma ana auauna e o iai i totonu.

Sa matua’i fa’ate’ia le tamaloa mau’oa ina ua ulu atu i totonu o le potu, ma ia va’aia ai lona atalii lea ua atoa le 12 tausaga o leiloa, o lo’o moe mai i luga o le moega.

Ae o lo’o saofa’i mai i autafa o le fa’amalama ia le afafine laititi a le tamaloa gaosi falaoamata.

Ai ona o le pa’o o le matala o le faitoto’a, sa faapea ona te’i ifo ai i luga le atalii o le alii mau’oa ma ona va’aia le tu o lona tama i autafa o lona moega ma tilotilo atu ia te ia, ma le maligi o ona loimata.

Ua logotala auauna uma a le alii mau’oa i totonu ma fafo o lona maota e tusa ai ma le tala fiafia e uiga i le toe fo’i mai o le atalii a le alii mau’oa.

[E FAIA PEA]