O OE O LO’U TAMA?

VAEGA 15

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, i le alii fomai o Taki ma le tamaloa o Tanielu.

************************************

Na gata mai le tatou fagogo i le vaiaso ua mavae, ina ua taumafai le tamaitai o Naomi, le ui’i a le tamaloa o Tanielu ma lona toalua o Eseta, ina ia faamavae mai lana galuega, ae oso faalava ai le alii fomai o Taki ma toso ese o ia mai luma o le faitoto’a o le pule a Naomi.

Ona o le faalavelave o Taki, na matuai galo ai lava ia Naomi, ona faamavae mai lana galuega.  Na fa’ato’a manatua lava e Naomi lona mana’o ina ia faamavae mai lana galuega, ona e le o fia faigaluega ma le Supavaisa o Tausima’i, le teine saua o Salome.

O le taunu’u o Naomi i le fale ina ua manava mai lana galuega i lea aso, ae fesiligia o ia e ona matua, po o le a se tali mai i lana pule, na toe manatua ai e Naomi sa fia mana’o e talanoa i lana pule e uiga i lana galuega, ae peitai, na toe toso mai o ia e le alii fomai o Taki ona sa mana’o e fia nofo totogi i le fale o le aiga o Naomi.

Ua ata le tamaitai o Naomi ma faapea atu i ona matua, “O taeao lea e sau ai ma le fomai fou e fia talanoa ia oulua e uiga i le potu lea e te lua mananao e nofo totogi ai se tagata.”

“Oi, ta’i manaia…o le a le taimi o fia sau ai le fomai?” o le fesili atu lea a le fafine o Eseta, ia Naomi.

“Pule mai lava oulua i le taimi,” o le tali mai lea a Naomi.

“Ia manaia ae fai iai e sau fa’a aoauli,” o le tali atu lea a le tamaloa o Tanielu.  “E lelei lena, e le pisa ai tatou.  Ae fai i lau fomai e sau ma se tusi faamaonia o lona tala’aga ma se tusi mai le pule o le falemai, e faamaonia ai e mafai ona totogi e le alii fomai ia le potu”.

Ua ata leotele ia le teine o Naomi ma faapea atu i ona matua.  “E le o sa’u foma’i, o le fomai a le atunuu.”

Ua o’o i le taeao na soso’o ai ma ua sauni Naomi e malaga ese atu mo lana galuega, 

“Aua ne’i galo e ta’u i le fomai ia mea e manaomia ona sau ma ia,” o le tala lea a le tamaloa o Tanielu i lona afafine laititi.

“Aua le popole.  O la’u galuega muamua lena pe a ou taunuu i le falemai,” o le tali mai lea a Naomi.

Ua mae’a le inuga ti a le aiga e pei ona masani ai, ona tamomo’e loa lea o Iakopo ma ona tuafafine agai i le fale faatali pasi, e pu’e ai le latou pasi.

Ae e le i savali ese atu Naomi, sa a’apa atu lona tina ma u’u mai lona lima ma tilotilo i ona foliga ma fesili atu i si ana tama, “O lelei mea uma ia te oe?” 

Ua ata Naomi ma faapea mai, “O lea e okay a mea uma Mama, aua e te popole.”

Ua faamavae atu Naomi i ona matua ma tamo’e atu loa e pu’e lana pasi faatasi ma nai ona tei matutua.

E FAIA PEA!