O OE O LO’U TAMA?

VAEGA 102

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 102.

***********************************

Na umi se taimi o saofa’i le teine o Salome ma tilotilo mai ia Ruta, ina ua faapea atu ia Ruta, “Ou te iloa ua e silafia le mafuaaga ua ou sau ai i lenei taeao.”

Na matua’i fa’ate’ia Ruta ina ua amata ona tagi Salome.  

“Oi, o le a le mea ua tupu?” o le fesili lea a Ruta.  “E faigofie lava la’u fesili.”

Ae ua na o le masusu o Salome ua leai ma se tala.

“E te silafia le tiga na feagai ma Naomi a’o talavou, lea na i’u ai lava ina alu ma koleni malosi ina ia lusi ona pauna?  Na alu Naomi ua a’o lana kalake ma isi tulaga faapena, ina ia aua ne’i toe ulagia o ia e seisi,” o le tala lea a Ruta.

“Ae ou te iloa, na fa’aauau lava lou olaga sa leai ma sou mafaufau pe manatunatu i le olaga o le teineititi lea sa e agaleaga ai, a ea?”

Na toe fa’ate’ia ia Ruta i le palasi ifo o Salome ma to’otuli i ona luma ae o lo’o masusu lava.

Ua to’otuli atu ai foi ma Ruta ma faapea atu, “O le a le mea ua e tootuli ai?  E le o a’u se Atua.”

“Faamolemole faamagalo mai a’u,” o le tau masusu lea a Salome.

“E sese le tagata lena e te fa’ato’ese iai.  Ma ou te iloa, o lo’u uso o Naomi, o se tagata loto alofa ma loto faamagalo, ma e le mana’o e te fa’ato’ese atu foi ia te ia,” o le tala lea a Ruta.

“Ae na o le pau lava lea o le mea ou te fia iloa, po o e malamalama i le uiga o lau gaioiga sa faia ma le a’afiaga o le olaga o lo’u uso talu ai lou le alofa.”

Ua le tautala Salome ae ua na o le lulu o lona ulu.

[E FAIA PEA]