O OE O LO’U TAMA?

VAEGA 101

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

Na gata mai le tatou FAGOGO i le vaiaso ua mavae, i le fa’aauau pea ona le moe le teine o Salome ona o le atu o lona loto i le mataupu ia Naomi ma lona fefe tele ina ne’i maua e Iakopo ia se faamatalaga e uiga i le taimi na o la a’o’oga fa’atasi ai ma Naomi i lo la talavou.

Ua toe salamo ane lava le teine o Salome ae ua faigata le mataupu, ua alofa ia Iakopo ae a nofo malamalama ia Iakopo o ia lea sa ta’ita’ia le vaega lea na fai ma sasa i si teine o Naomi, ma taufa’alili i si teine i lona lapo’a ma fa’aigoa o le tama’i fagafao, o lona uiga, e vave lava ona tia’i fa’afasifa’i o ia e Iakopo.

Na toe usu atu Salome i le galuega i lena taeao, ae ua le mautonu po o le a lana mea o le a fai.  Aua i lona mafaufau, e na o le pau lava le auala e mafai ona fofoina ai lenei faafitauli, o le alu e ta’u le mea moni ia Iakopo.

Ina ua taunu’u Salome i lona ofisa i lena taeao, sa ia faatonuina lana failautusi, ina ia tolopoina uma ana ‘appointments’ mo lea aso ma ia aua ne’i fa’atagaina se tasi e ulufale atu i totonu o lona ofisa.

Ae na matua’i fa’ate’ia Salome ma pei e va’ai i se aitu, ina ua ta tonu lava le iva, ae matala atu le faitoto’a o lona ofisa, ma ia vaai mai ai le tu atu o le uso matua a Naomi, le teine o Ruta.

Ua oso i luga Salome ma tu ma fa’ataupupula mai i le faitoto’a i le savali atu a Ruta i totonu o lona ofisa, ua le gagana.

Na ona saofa’i ifo lava o Ruta i le nofoa ona ia faapea atu lea, “Talosia ou te le o fa’alavelave mai i lou pisi i lenei taeao.”

Ua le gagana Salome ae ua tu fa’amalo pei o se fa’atagata.

Ona faapea atu lea o Ruta, “Alala mai lalo, se’i ta talanoa.”

Ua solofa ifo lemu lava i lalo Salome i lona nofoa, ae ua le se’e ese lava lana pupula mai ia Ruta.

“Ou te iloa ua e silafia le me aua ou sau ai i lenei taeao,” o le tala lea a Ruta.

[E FAIA PEA]