O OE O LO’U TAMA?

VAEGA 93

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

******************************

Sa gata mai le tatou Fagogo i le vaiaso ua mavae ina ua alu le teine o Naomi i le ofisa a le alii fomai o Taki ma fa’ato’ese ia Taki ona o ana fa’amatalaga sa lafo i le alii fomai i le aso na tupu ai le fa’alavelave i lona tama, le tamaloa o Alesana.

Manatua, o lea ua fa’amavae Taki mai i lana galuega fa’afoma’i i le falema’i lea e i le a’ai e nonofo ai le tamaloa o Alesana ma lona to’alua o Eseta faapea ma le la fanau e to’atolu, o Ruta, Iakopo ma Naomi.

O le mafua’aga na sau mamao ai lava Taki i le galue i le falema’i lea, ona o le tau sailiga o lona tama moni.  O le tama moni a Taki, o se uo lelei lava lea a le tamaloa o Alesana ma o lona igoa o Tanielu Sanerivi, ae na maliu o ia e le’i faaipoipo ma le tina a le alii fomai.  Na soifua mai lava la si foma’i, ae e le’i fa’amatala lava iai e lona tina ia se mea e tasi e uiga i lona tama, se’ia vagana lona igoa.

Ae ona o se fa’alavelave na tupu a’o talavou le tamaloa o Alesana ma le tua’a a le alii fomai, o Tanielu Sanerivi, o le mea lea ina ua iloa e Tanielu, o ia o le a maliu, sa ia tauanauina ai loa si ana uo mamae lava, le tamaloa o Alesana, e tago e fa’aaoga lona igoa (Tanielu Sanerivi) ina ia aua ai ne’i toe lavelavea i le tulafono.

Ma ina ua matua le alii fomai o Taki ma ia taumafai e saili lona tama moni, sa tau mail ana sailiga i le tamaloa o Alesana ma lona aiga, lea na mafua ai ona malaga mamao mai e galue i le falemai lea e galue Tausima’i ai ia le teine o Naomi, ina ia fa’alatalata mai ia Tanielu.

Ma na faapea foi ona nofo totogi le alii foma’i i le fale o le tamaloa o Alesana ma lona to’alua o Eseta ma ua matua’i mafana tele le latou mafutaga.

Ae paga lea, ina ua malamalama si alii fomai i le tala’aga moni o le mea sa tupu i si ona tua’a ma le mafuaaga ua fa’aaoga ai e le tamaloa o Alesana lona igoa, sa le gata ina to’atama’i le alii fomai, ae ua maasiasi, toe loto faanoanoa ona, e fai, ua maliu si ona tama, ae e foliga mai, sa pelogia o ia e le tamaloa o Alesana ma lona to’alua.

Ma o le mafua’aga lea na fa’afefeina ai e Taki ia Alesana ma lona aiga, o le a alu e ave sana tagi i le ofisa a leoleo, e fa’asaga ia i latou.  Ma o le mafuaaga lea na alu ai le tamaloa o Alesana e fa’ato’ese i si alii foma’i, ae peitai, na tupu mai ai se fa’aletonu ia te ia i totonu o le ofisa a le alii foma’i ma taofia ai i le falemai.

O iina la lea e tau fa’ato’ese ai le tamaitai o Naomi i si foma’i ona e fetaui lava le taunu’u atu o Naomi ae palasi loa i lalo si ona tama, na alu le aso atoa o fa’atalitali sona avanoa e feiloai ai i le alii fomai, ma le ‘ai atu ai lava.

O upu mulimuli lava a le teine o Naomi ae e le’i tu’ua le ofisa a le alii fomai, sa ia faapea atu ai, “Po o fea le mea o le a e malaga iai, alofa le Atua fa’amanuia ia te oe ma ou la’asaga uma.” 

O le aso lava lea sa te’a ai loa i tua le tamaloa o Alesana mai i le falema’i ma sa pisi le teine o Ruta ma lona tuagane o Iakopo e tapena le latou mea’ai aua se latou alalafaga i le afiafi mo le latou tama.

O se afiafi fiafia tele lea i le tamaloa o Alesana aemaise si ona to’alua o Eseta ina ua te’a ma le manuia mai i tua le gasegase o le tama o le aiga.

Ina ua nonofo ifo le aiga e fai le latou lotu afiafi e fa’afetaia ai le alofa ma le agalelei o le Atua ua toe fa’afo’i le manuia i le tama o le aiga, ae tu’itu’i atu loa le tagata i le faitoto’a o le fale.

Ua oso i luga le alii o Iakopo ma tamo’e faatopetope atu i le faitoto’a ma tatala mai.  Ua fetilofa’i le aiga, po o ai lea ua asia latou i lea afiafi ae e foliga mai o la na iloa e Iakopo e alu atu le tagata lea.   Na faalogo mai le aiga o faapea le tala a Iakopo, “Sau i totonu, o lea ua matou a’ai.”

Ua tau fai tilotilo uma mai le aiga i le faitoto’a po o ai lea e alu atu ma le fa’ate’ia o le aiga i le savali atu o se teine i totonu ma ni meaalofa.

“Mom, Dad, o la’u uo teine lea o Salome,” o le fa’afeiloai atu lea a Iakopo i ona matua.

[E FAIA PEA]