O OE O LO’U TAMA?

VAEGA 87

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

********************************************************

Na gata mai le tatou Fagogo i le vaiaso ua mavae ina ua toe ala i luga le tamaloa o Alesana lea sa fa’ataotolia i le falemai ina ua matapogia i le ofisa a le alii fomai o Taki.

Sa fa’alogologo ma le fiafia le fafine o Eseta, le to’alua a Alesana, a’o talatalanoa fiafia Alesana ma si ana fanau, o Ruta, Iakopo ma Naomi.

“O afea e te te’a mai ai i tua, Dad?” o le fesili lea a le teine o Ruta.  

“Ou te leiloa, se’i o’o taeao ona ou talanoa lea i le fomai,” o le tali mai lea a Alesana.

Ua tago atu nei le fafine o Eseta ma ave’ese mai le telefoni mai lona to’alua ma ia faapea atu i lana fanau, “Ia ua lava lena, o loa e fai se malologa, ua toeititi toe ao le mea.  Ae manaomia foi le malologa a le tou tama.  O lea fa’ato’a ala mai.”

Ua fa’atofa atu nei Alesana ma Eseta i le la fanau ma tape le telefoni.  Ona faapea atu lea o Eseta i lona to’alua, “Ou te iloa o lena fa’ato’a e ala mai, ae taumafai e toe malolo ina ia vave ona atoatoa lou malosi, e ta te te’a ai i tua i le fale.”

Ina ua vaai atu le fafine o Eseta ua toe gase le moe a si ona to’alua, sa ia savali loa i fafo mai i le potu ma aga’i atu i le mea o iai tausima’i o le po ma ia fesiligia le foma’i a si ona to’alua ma ia fa’ailoa atu i tausima’i, o lea ua ala mai lona to’alua.

Sa faapea mai ai se tasi o tausima’i, o le foma’i ua malaga i lona aiga, ae o lea o le a ia fa’afeso’ota’iina e fa’ailoa iai le toe ala mai o le tamaloa o Alesana.

Ua savali ese le fafine o Eseta mai i le laulau a tausima’i, ae faapea mai se tasi o tausima’i, “E le o le gasegase lea o lo’o fa’atalitali mai ai ia le alii fomai o Taki mo se tala?” 

Ua tali le tasi o tausima’i, “Ioe, o lea na fai mai le fomai a si tamaloa o Alesana, e fa’afeso’ota’i foi ma le alii fomai o Taki pe a ala mai.  Ia lea ua logo uma le foma’i a Alesana faapea ma le alii fomai o Taki.”

Pe a ma le afa itula talu ona fa’afeso’ota’i e tausima’i ia alii fomai, ae savali mai le alii fomai o Taki ma fa’asasa’o atu i le potu a le tamaloa o Alesana.

Na toe fa’ate’ia le fafine o Eseta i le matala mai o le potu, ae savali atu i totonu ia Taki, aua na manatu o ia, o le foma’i a si ona to’alua lea ua alu atu.

[E FAIA PEA]