O OE O LO’U TAMA?

VAEGA 85

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

****************************************************************

Na gata mai le tatou FAGOGO I le vaiaso ua mavae ina pisi fomai ma tausima’i i le toe tau te’ite’i ifo i luga o le tamaloa o Alesana, i le falemai, a’o taagulu i ona tafatafa ia lona toalua, le fafine o Eseta.

Sa talosagaina e tausima’i ia Eseta ina ia alu atu e nofo mai i le nofoa i tafatafa o le faamalama lea e i totonu o le potu lea e ta’oto ai Alesana, ae se’i fai la latou galuega.

Na faapea ona fai e Eseta, ma a’o saofa’i le fafine ma matamata mai i galuega a fomai ma tausimai, atoa ai ma le tau atilo mai pe na te iloa mai le mea o lo’o tupu i si ona to’alua, sa fa’ate’ia o ia, i le auselasela atu i totonu o le alii fomai o Taki.

O lea na faapea Eseta, ua leva ona alu Taki i le fale.

Sa le ano mai le alii fomai i le fafine o Eseta, ae ua savali atu i le fomai o lo’o va’aia Alesana ma ia fesili iai po o a mai le tamaloa o Alesana.

Sa tali atu le alii fomai, o lea ua amata ona te’ite’i mai i luga ma o lo’o lelei lava mea uma, e leai se gasegase po o se faaletonu o vaaia.

Na lulu le ulu o le alii fomai o Taki ma ia faapea atu i le fomai lea o lo’o va’aia Alesana, pe mafai ona logo atu o ia pe a iai se suiga.  Na ioe mai iai le fomai, ona savali ese atu loa lea o Taki.

O le savali atu la o Taki o le a alu, ae tau atu lana vaai ia Eseta o saofa’i mai i le nofoa i tafatafa o le faamalama.  Na fai sina umi o le taimi o tu le alii fomai ma tau mafaufau po o le a lana taga o le a soso’o.  O le tonu loa i le mafaufau o le alii fomai, sa ia savali sa’o atu loa i le mea o nofo mai ai le fafine o Eseta ma saofa’i ane i ona autafa.

“Ua a mai si o’u to’alua?” o le fesili atu lea a Eseta ia Taki.

“O la e fai mai le fomai, o lo’o lelei mea uma.  Ae o le la e tau te’ite’i ane i luga.  Atonu o seisi 30 minute, ua toe malamalama lelei o ia,” o le tali mai lea a le alii fomai.

“Faafetai Lava,” o le upu musumusu atu lea a le fafine o Eseta i le alii fomai.

Ona nofonofo le pisa ai lava lea o le to’alua lea ma tau fai matamata mai i gaioiga a fomai ma tausima’i ia o lo’o pisi ai lava ia Alesana.

Pe toeitiiti ona atoa le lima minute o nonofo gugu le to’alua ae faapea atu loa le alii fomai o Taki ia Eseta, “Faamolemole fai i lou toalua, e aua le toe alu atu i lo’u ofisa.  E leai seisi tulaga e manaomia ona tatou talatalanoa ai.”

Na ona uma lava o le faamatalaga lea a Taki, toe tu loa i luga ma savali atu i fafo.

Ae ua na ona sioa atu ia Eseta i lona papatua ma le faitoto’a.

[E FAIA PEA]