O OE O LO’U TAMA?

VAEGA 10

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

**********************

A o nofonofo si teine loto mafatia o Naomi i le fale faatali pasi, sa toe faasolo ona mafaufauga i mea fa’atiga uma sa faia e Salome ia te ia a’o la a’o’oga.  Ma na atili ai ona maligi loimata o si teine o Naomi ma i’u ai lava ina misi lana pasi e alu ai i le latou nu’u.

E toe malamalama ifo le teine o Naomi, ua amata ona pogisa le lagi ma ua le toe iai ni pasi o toe feoai.  O lea na oso ai loa le teine ua fa’atu le taxi i luga o le alatele ma agai ai loa i le lona aiga.

Ae o le taimi lea, ua le maunofo le tamaloa o Tanielu, ina ua na iloa, ua siliga ma le taimi lea e masani ona manava atu ai Naomi ae e le’i o’o atu lava si ona afafine laititi.  Ina ua amata ona pogisa mai fafo, na savali loa si tamaloa agai i le fale faatali pasi e va’ai pe na te maua atu ai lona afafine.

Ae peitai, na o’o le savaliga a Tanielu i le fale faatali pasi a le latou nu’u, e leai se Naomi.  Ma toe fo’i mai i le latou fale, e leai lava se Naomi.  Ua amata ona popole le ulugalii o Tanielu ma Eseta.  Ua faatopetope ona valaau Eseta i le falemai e saili po o faigaluega pea Naomi, ae tali mai le falemai, na manava lava Naomi i le taimi masani.

Ua na o le savali atu o Tanielu i leisi itu o le fale, toe lilium ai i leisi itu, i lona popole tele.  E fetaui le toe savali mai i fafo o Tanielu e vaai pe na te vaaia si ona afafine, ae tu loa ma le taxi lea o lo o alu atu ai Naomi.  

Ina ua oso i fafo Naomi, sa oso mai le tamaloa loto popole o Tanielu ma fusi atu ma fesili pe o le a le me aua tupu, ua tuai mai ai.  A o fesiligia e Tanielu ia lona afafine laititi, sa ia vaaia foliga o si ona afafine, e mumu uma pei na tagi.

Ua savavali atu nei Tanielu ma si ona afafine i totonu o le fale.  Ma ina ua iloa mai e le tina ia Eseta le taunuu atu o si ana tama, ua oso mai foi o ia ma opo atu le teine o Naomi, ma fesilisili foi pe iai se mea na tupu ua mafua ai ona tuai mai i le fale.

E na o le tasi lava le faaupuga a Naomi i ona matua, savali loa i totonu o lona potu.  Sa faapea mai Naomi i ona matua, “Ou te le toe fia faigaluega i le falema’i.”

E FAIA PEA!