O OE O LO’U TAMA?

VAEGA 79

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

********************************************

Sa gata mai le tatou Fagogo i le vaiaso ua mavae, ina ua faamautuina le fuafuaga a le tamaloa o Alesana ma si ana fanau, o le a fa’aauau a latou fuafuaga mo le suia mai o le igoa o Alesana mai ia Tanielu lea sa igoa ai mo le 20 tausaga.  Aua o le igoa o Tanielu, o le igoa lea a si ana uo lea ua maliu, le tua’a o le alii foma’i o Taki.

Ua sauni le tamaitai o Ruta, le afafine matua lea a Alesana, e avea ma loia e tulai mo lona tama i le faamasinoga mo le suiga o lona igoa.  Aua o lo’o feagai Alesana ma ni faaiuga faigata pe a mae’a ona sui lona igoa.  A le fa’asala o ia e le tulafono i lona fa’aaogaina o le igoa o leisi tagata, o le a faapea ona toe molia o ia, i le fa’alavelave lea na tupu a’o ia talavou, lea na mafua ai ona tauanau o ia e si ana uo o Tanielu, e tago e fa’aaoga lona igoa.

Sa alu lena afiafi o talatalanoa ia Alesana ma si ana fanau, i tulaga o le a o latou o’o iai, i le taimi e toe suia ai le igoa o Alesana.  Sa fa’ailoa atu foi e Alesana i lana fanau, le lagolagosua mai o le tina a le alii fomai o Taki, le fafine o Elena, i le latou taumafaiga.  Lea na ta’ua e le tamaitai loia o Ruta, le manaia o lea tulaga ona o le a fa’afaigofie ai le latou mataupu i luma o le faamasinoga, pe a faapea e taumafai le malo e fa’asala Alesana i lona fa’aaogaina o le igoa a Tanielu.

Ua o’o le talanoaga a le tamaloa o Alesana ma lana fanau, ia Taki.  Ma na ‘autasi uma i latou, e sa’o lelei le le fiafia o Taki i le tulaga ua tula’i mai ma e le tu’ua’ia o ia i lona loto ita ma lona fia taui ma sui.  Ae sa ioe foi Alesana ma lana fanau, e mana’omia ona toe taumafai tasi lava seisi o i latou e alu atu e toe talanoa tasi lava ia Taki ma faamanino iai le tulaga lea o le a faia, ina mafai ona faaitiitia le mafatiaga o lo’o ia tauaveina.

Ua oso mai le teine o Naomi ma faapea mai, e sili ona ia alu e toe talanoa ia Taki.  Ae peitai, sa faapea mai le tamaloa o Alesana, “Leai, e tatau ona ou alu.  E sili ona ma faafesaga’i ma Taki.  Ou te iloa, o le mea lea e mana’o iai si a’u uo o Tanielu.”

Ua ta’ape loa le aufono a le tamaloa o Alesana ma si ana fanau i lena po, ma le faaiuga, o le a usu le tamaloa o Alesana e saili sona avanoa i le alii fomai o Taki, i le aso e soso’o ai.

Na usupo lava le teine o Naomi ma tapena mo lana galuega, ona ia alu atu lea i le tu’itu’i i le potu a ona matua.  Ua tatala mai e lona tama ona faapea atu lea o Naomi, “Dad, a e sauni loa, ona ta o loa lea.”

Manatua foi, o Naomi, e galue o se Tausima’i i le falema’i tele a lo latou atunu’u, lea o lo’o galue ai le alii fomai o Taki.

Ma o le tulaga lea o lo’o mafatia ai tele Taki, ona sa ia te ia le filifiliga o falema’i sili atu ona lelei i le lalolagi, sa o latou manana’o e alu atu e galue ai.  Ae peitai, sa ia filifilia lava le falema’i lenei, ona o le sailiga o lona tama, ona e le i faamatalaina lava iai e lona tina le tala’aga ma le maliu o si ona tama.  Ae ona o lea e fa’aaoga e Alesana ia le igoa o Tanielu, sa faapea lava si alii foma’i, o lona tama lea.  Ma o le mea lea na ia filifilia ai le falemai lea, ina ia latalata mai i le aiga o Alesana.

Ae paga lea, e malamalama ifo ia Taki i le mea na tupu i lona tama, ua mafana le latou mafutaga ma le tamaloa o Alesana ma lona to’alua o Eseta ma le la fanau e to’atolu.

Ma o se tulaga na matuai pito sili ona mafatia ai Taki, ma ona lagona ai ua fa’ase’e o ia e le tamaloa o Alesana ma lona aiga.  Lea ua mafua ai ona ia fa’asagatau ia Alesana ma mana’o e fa’asala o ia i le tulafono.

[E FAIA PEA]