O OE O LO’U TAMA?

VAEGA 51

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*************************************

Sa faagata mai le tatou Fagogo i le vaiaso ua mavae, ina ua fai atu le tamaloa o Tanielu i lona toalua o Eseta, o le a faamatala i lana fanau le tala moni e uiga i le mataupu e faatatau i le alii fomai o Taki.  Ae peitai, sa le’i mana’o ai le fafine o Eseta, ona e foliga mai, e ono lokaina ai lona to’alua.

Ae ua mautu i le loto o Tanielu, ua o’o i le taimi ua tatau ai ona fa’ailoa atu i lana fanau, ia lo la so’otaga ma le alii fomai o Taki aemaise le tama a Taki lea sa maliu i Lonetona.

Na alu lena po o moe tagi le fafine o Eseta i lona pala’ai tele i le mea e ono tupu pe afai ae faamatalaina e Tanielu i le la fanau, lona so’otaga ma le tama o le fomai o Taki.

Sa le’i moe mai i le la potu ia le tamaloa o Tanielu, i lena po.  Ona ua alu le po o ia mafaufau i le la’asaga o i luma o lona olaga, ona o lana faaiuga lea ua fai.  Ae ua talitonu Tanielu, ua alagatatau ona fa’ailoa atu i lana fanau, ia le tala moni o lona olaga, faapea ma lo la sootaga ma le alii fomai o Taki.

Ua talitonu Tanielu, o lea ua matutua lana fanau ma ua lelei galuega, seia vagana ai lona atalii o Iakopo lea o lo o feagai ma aoaoga aua le sailiga o sana galuega i totonu o le malo.  Ae ua talitonu Tanielu, ua o’o i le vaitaimi o olaga o lana fanau, po o le a se mea e tupu mai ia te ia, o le a tulaga lelei o latou olaga.

Ma sa manatu foi Tanielu, ua leva tele ona ia tau’aveina lenei avega mamafa, o lo’o nofo ma ia.  Ma ua fia malolo lona mafaufau.

Ua o’o i le taeao na soso’o ai ma a’o pisi lava le tamaloa o Tanielu i le gasesega o taumafa o le taeao mo le fale’aiga, na muamua lava usu atu le teine o Naomi ma na iloa mamao mai lava e Tanielu le fetilofa’i solo o mata a lona afafine, e tau va’ai po o fea lona tina.

Sa faapea atu Tanielu i lona afafine, ‘O lou tina la e tiga lona ulu, o le mea lena ua le usu mai ai.”

Ma na vaaia e Tanielu, le toe liliu o Naomi ma toe fo’i atu i lo latou fale.  Ae o lo o pisi pea i gasesega o le taeao.  Ma ua le toe alu atu ai lona ulu i lona afafine.

Ae o le taimi lea na savali atu ai Naomi ma tu’itu’i le faitoto’a o le potu a ona matua ma tauvalaau lemu atu, “Mom? Mom?”

“O le a le mea e te mana’o ai?” o le valaau mai lea a le fafine o Eseta mai i totonu o le potu.

Ua tago atu Naomi ma u’una’i lemu atu le faitoto’a ma savali atu i totonu o le potu.  Ae o le taimi lea ua u mai ai le papatua o le fafine o Eseta, a’o taoto i luga o le moega.

“E iai se mea o e manaomia, Mom?” o le fesili lea a Naomi i si ona tina.

“E leai, ua na’o lo’u ulu lea e tiga.  O lea fa’ato’a maua se malologa mai i le tatou tafaoga,” o le tali mai lea a Eseta.  “Alu e fesoasoani i lout ama ma e alu loa i lau galuega, i e tuai.”

Ua sogi atu Naomi i le ulu o lona tina ma toe lilium ai e savali i fafo.  Ae o le taimi lena ia Eseta, ua na o le maligi o ona loimata ma u mai lava lona tua i le alu ese atu o Naomi.

Sa iloa lelei lava e Naomi e le o faamaoni lona tina, o lo o iai se mea ua tupu.

[E FAIA PEA]