O OE O LO’U TAMA?

VAEGA 48

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 48.

********************************************************************

Na matua’i fa’ate’ia si tamaloa o Tanielu ina ua alu atu le alii fomai o Taki ma fesili atu ia te ia, “O ai lou igoa moni?”

Ua tau fai pulapula a’e mata o Tanielu i luga ia Taki ua le mautonu lona mafaufau.

“O le a le uiga o lau fesili,” o le tali mai lea a Tanielu.  Ua oso atu foi ma le tina a le alii fomai ma faapea atu, “Taki, o le a le uiga o lau fesili? Ua fia sina ou le fa’aaloalo i a tatou malo fa’aaloalogia.”

Ae ua le minoi le alii fomai i le mea o lo o tu ai i luma o le tamaloa o Tanielu ma ona foliga ua tumu i le ita.

“Na ou aumaia outou iinei, e le gata ina ia fa’aali atu ai lo’u agaga fa’afetai ae e faapea foi ona fa’ailoa atu ia te outou lo’u tama moni.  O le igoa o lo’u tama o Tanielu Satalo, lea na fanau i le aso 30 o Iulai, 1960 i le falemai a le tou nu’u lea ou te faigaluega ai nei,” o le tala lea a Taki.

“O le aso fanau foi lena o le matou tama,” o le oso mai lea a Iakopo. 

Ua liliu atu nei ia Taki i lona tina ma faapea atu iai, “O le mafuaaga lena sa ou talia ai le galuega i le falemai i le nu’u lea, aua na ou sailia tamaloloa e igoa ia Tanielu Satalo sa fananau ia Iulai 30, 1960 i le falemai lea, ma ou mauaina ai le aiga lenei.  Ma o le mafuaaga foi lena sa ou faamasani atu ai ia i latou ma ou nofo i lo latou fale, ona sa faapea a’u o lo’u tama lea”.

E fai lava le faamatalaga a le alii fomai ma maligi ona loimata.

“O le mea foi lea na ou mana’o ai e o mai iinei e tafafao ai, ma feiloai atu ia te oe,” o le faai’ui’u lea o le faamatalaga a le alii fomai.  “Sa ou faapea o lo’u tama lea.”

Ua savali atu le fafine o Amelia ma opo mai si ana tama ma faamafanafana atu ia te ia, ma faapea atu, “Aisea na e le fesili mai ai ia te a’u ae e te le i faia lenei tulaga?  Semanu e mafai ona ou faamatalaina atu le tulaga na o’o i si ou tama.”

Ua tulai mai i luga le tamaloa o Tanielu ma faapea atu ia Taki, “Ou te faamalie atu pe afai ua avea lo’u tagata ma se mafatiaga ia te oe.  Ae ou te mautinoa, e le o a’u o lou tama.”

Ua saofa’i ifo nei i lalo le alii fomai ma faapea atu ia Tanielu ma le fafine o Eseta ma si a la fanau, “E leai, o a’u lea ou te sese, ou te faamalie atu ai.  Ae e uiga ese lenei tulaga, e fai o le tutusa o lua igoa ma lo’u tama, tutusa aso fanau, toe tutusa ma falemai na lua fananau mai ai.”

Ua saofai ifo nei ia Amelia ma faapea atu i si ana tama, “E moni lava lau tala, ae o lou tama, sa maliu o ia i se afi i Lonetona.  E maliu lou tama, e na te le iloa ua ou maitaga ia te oe.  E tutupu uma nei mea, o lo o ma talavou ma na ou faapea, e toe fo’i mai loa mai Lonetona o’u tago i le ta’u iai.  Ae paga lea, e le i toe foi mai o ia.”

[E FAIA PEA]