O OE O LO’U TAMA?

VAEGA 41

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***************************************

Sa gata mai le tatou Fagogo i le vaiaso ua mavae ina ua alu le tamaitai o Naomi e fa’afetaui le ula lenei o Salome, ae e le i alu le tafaoga a le latou aiga i le taeao e soso’o ai.

Ina ua fesaga’I ia Naomi ma Salome, sa tau amata le faato’esega a Salome, ae peitai, na taofi e Naomi ma faapea atu ia Salome, “Salome, ou te le i sau e te fa’ato’ese mai ia te a’u.  O a’u, ou te alofa tele i lo’u tuagane.  Ma ou te le mana’o e fai se mea e tiga ai o ia.  Ma ou  te iloa, afai ae iloa e Iakopo le mea na tupu, e matua’i mafatia ai lava o ia.  O le mea lea ua ou sau ai e fai atu ia te oe, ou te le ta’uina ia Iakopo le mea na tupu.  Ona ou te puipui i lo’u tuagane.  Ae afai e te faia se tulaga e tiga ai lo’u tuagane, ona e va’ai lea i la’u mea e fai ia te oe.”

Na ona uma lava o le faamatalaga a Naomi, ua tu i luga ma savali ese atu ae ua na o le nofo o Salome ma sioa mai i le savali atu a Naomi, ua le mautonu lona mafaufau.

Ina ua toe aga’i atu le ta’avale a le alii fomai o Taki ma le teine o Naomi i le fale, na fesili atu Taki ia Naomi po o a mai o ia.

Na fai sina umi ona nofo Naomi ona faapea atu lea ia Taki, “Atonu o lo o e fia malamalama i le mea o tupu, a ea?”

Sa tali mai Taki, “E leai, o le mea na ia o le mea i le va o oulua ma Salome.”

Ua liliu atu nei Naomi ma fa’amatala atu i le alii fomai le tala’aga atoa e uiga ia la’ua ma Salome.

Ina ua uma le faamatalaga a Naomi, ona ia tilotilo lea i foliga a Taki e vaai po o le a sona lagona i le mea ua ia fa’amatalaina.

Sa fai sina umi o le tautala le alii fomai, ma ua manatu Naomi, o le a le tali mai o ia.

Ae na te’i Naomi ina ua faapea mai le alii fomai, “E le o se tagata lelei le Supavaisa o tausima’i a le tatou falemai.”

Ua punou Naomi ma ia faapea atu, “Ou te le mautinoa pe aisea ua ou faamatalaina atu ai lenei mea ia te oe.  Ae faamolemole, aua e te ta’uina i seisi, aemaise lava si o’u tuagane.”

Sa tali mai le alii fomai ma faapea mai, “Ou te le iloa po o se faaiuga sa’o lena, o le nanaina o lena mea mai ia Iakpo, ma e le o a’u foi e tatau ona fa’ailoa atu ia Iakopo le mea sa tupu i le va o oulua ma Salome.  Ae a e alofa i lou tuagane, e lelei le fa’ailoa iai o le ituaiga tagata e iai le teine o lo o la fa’auo, e fai ai sana ia lava faaiuga.”

Ua liliu Naomi ma tilotilo agai I fafo o le faamalama o le taavale ma mafaufau i upu a le alii fomai.

Ina ua o la taunu’u i le fale, na fa’asasa’o loa Naomi i le potu ma amata tapena lana ato mo le tafaoga a le latou aiga i le aso na soso’o ai.

Ua malama le taeao na soso’o, ua vevesi solo le aiga i le tapenaga o a latou ato e ave i le latou malaga, ae o le fa’amautu o le puipuiga o le latou fale ma le fale’aiga, mo aso ia o le a to’esea ai.

Na tapena foi e le alii fomai ia se ta’avale tele e mafai ona o latou malaga uma ai, faatasi ma le latou uta.  

O le mamao o le nofoaga lea o lo o iai le aiga o Tanielu ma Eseta, ma le mea o iai le aiga a le alii fomai, e pe a ma le tolu itula. 

Ua mae’a nei ona tapena le aumalaga ma ua agai atu nei i le malae vaalele mo le amataina o le latou faigamalaga.

[E FAIA PEA]