O OE O LO’U TAMA?

VAEGA 36

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 36.

***************************************

Na matua’i fa’ate’ia le tamaitai o Naomi i le faamatalaga a le alii fomai o Taki, e uiga i ona ata lea o lo o teu ai le potu malolo a le latou fale, e faapea, “E ese le matagofie o lau ata.”

Ua liliu ese Naomi mai ia Taki ma faapea atu, “Ia ua lava loa lega.”

Ae faapea atu Taki, “Leai, e moni la’u tala.”

Ua pulapula ifo Naomi ia Taki, ae o le taimi lena, e le o tilotilo mai ai le alii fomai, ae ua na ona fa’asolo o lana va’ai i ata i totonu o le potu malolo.

“E a?  E magaia lo’u lapo’a?” o le tala ata lea a Naomi.

“Oi, sa e lapo’a?” o le ata lea a le alii fomai ma ata leotele.

“O le a le mea malie?” o le fesili mai lea a Eseta ma savavali mai ma lona toalua o Tanielu i totonu o le potu moe.

“Papa, o lea e ula le alii lea o Taki ia te a’u,” o le oso atu lea a Naomi ma u’u mai le lima o lona tama.

Ua matua’i galo atoa ia Naomi le mea lea na tu ai ma tagi i luma o ona ata, ona o Salome.

Ua titilo atu ma le alofa le tamaloa o Tanielu i foliga o si ona afafine laititi.

“O oe e te aulelei lava mai i lou lauulu, e tau i lalo i ou tamatama’i vae,” o le tala lea a Tanielu ma ia opo mai si ona afafine laititi.

Ua mou atu lagona tiga o Naomi i upu a Taki faapea upu alofa a si ona tama o Tanielu.

O le taeao na soso’o ai, ua fa’afaigata ia Naomi ona sauni mo lana galuega, ona o le fa’aatu e vaai ia Salome.  Ona o lea ua iloa e Salome o ia lea na la aooga fa’atasi.

Sa lototele pea Naomi ma tapena mo lana galuega.  Ina ua taunu’u le tamaitai o Naomi i le falemai, na matua’i pese fiafia ina ua alu atu, ae fai mai le tala, e le faigaluega le latou supavaisa, o la e fa’ama’ima’i.

Na pei e fai ni apa’au a Naomi i le ‘emo o lana galue i lena aso, ona o le leai o se Salome. 

O le afiafi lena, ina ua sauni Naomi e alu i le fale, i le manava o galuega, ae oso atu le alii fomai o Taki ma faapea atu, “Faatali mai ta te o fa’atasi i le fale, o lea foi ua ou manava.”

Ua feosofi nei Naomi ma Taki i le ta’avale a le alii fomai, ae faapea atu Taki, “E okay pe a ta o muamua e fa’atau mai se keke mai i le faleaiga lale, e ave i le fale?”

Ua ioe atu nei ia Naomi i le alii fomai, ma la agai atu loa i se faleaiga e le mamao tele mai i le falemai.

Ua paka le la ta’avale, ma o la savavali atu i totonu.  Na fai sina mamao mai i tua o Naomi, ae ua mamao teisi atu i luma ia Taki, ae lagona loa e Naomi le valaau a se tamaitai, “Talofa Taki, o ai na lua o mai?”

Ma le tepa atu o Naomi, o Salome le la e saofai mai i se tasi o laulau, ma ni teine se toalua, o lo o u mai la tua.

Ua tilotilo mai i tua ia Taki i le mea o tu atu ai Naomi, ma sa faapea foi ona liliu mai ai ma le ulu o Salome i le mea o tilotilo mai ai le alii fomai.

Na pei ua vaai i se aitu ia Salome ina ua tepa mai ae tau mail ana vaai ia Naomi.  

Ae o le taimi foi lea, na liliu mai ai ma teine e toalua ia e nonofo ma Salome, ma na toeititi pe le fatu a Naomi ina ua vaai atu, o teine ia, o le vaega a Salome, a’o latou a’o’oga fa’atasi.

[E FAIA PEA]