O OE O LO’U TAMA?

VAEGA 34

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 34.

****************************

Ua na o le tu o le alii o Iakopo ua matua’i le malamalama po o le a le mea lea ua tupu.  Ae o le taimi lea, ua mou ese atu le ta’avale a Salome mai lana va’ai, ma o le saoasaoa o le alu a le ta’avale a Salome, e pei lava o lo o tuliloa e ni aitu.

Ua liliu lemu lava Iakpo ma savali atu agai i le faleaiga, i le mea o lo o fa’atali mai ai lona aiga ma le alii fomai o Taki.

Ua iloa mai e matua o Iakopo, le savalivali lemu atu o Iakopo ma ona foliga ua matua’i fa’anunumi, e foliga mai o lo o melotagi.

“O le a le mea ua tupu?” o le fesili mai lea o le tamaloa o Tanielu.  “A o feal au teine na lua o mai?”

Ua ea ifo nei ia Iakopo ma faapea mail ana fa’amatalaga tau musumusu, “O le la ua alu, fai mai ua le lelei lana fa’alagona”.

“E a?” o le oso atu lea a le fafine o Eseta.  “Ua tu atu lava alu, ae le sau e fai mai se tala?  Vaai e le o ni aiga o vale le aiga nei, e na o le tu atu lava alu ae le fai mai se faamatalaga.  Auououo.  Ia gata ona ou toe vaai i lau teine lena i totonu o le fale lenei,” o le ote mai lea a Eseta.

“E, se tau onosai mai ea,” o le fa’ato’ato’a atu lea a Tanielu i lona to’alua ma lue atu lona ulu agai i si a la tama o Iakopo.

“E iai se mea ua tupu ia Salome?” o le fesili filemu atu lea a Tanielu i si ona atalii, ona ua va’ai atu lava Tanielu, ua foliga mafatia lava si ona atalii.

“Ou te le iloa,” o le tala lea a Iakopo ma saofa’i ane lava i lalo.  “Na lelei lava le ma talatalanoaga i totonu o le fale, ae te’i lava ua fai mai, ua le lelei lana fa’alogo ma savali atu lava oso i lana ta’avale ma alu.”

“O le mea lava lega ua kupu  i kegeiki kaka’a i nei vaikaimi, ua le iloa le va fealoa’i ma kagaka,” o le toe ote mai lea a Eseta.

“Se ogosa’i ia,” ole fai atu lea a Tanielu.

Ua tilotilo atu nei ia Iakopo I le alii fomai o Taki ma faapea atu, “E te lua masani lelei ma Salome?” 

“Ioe, o le supavaisa le la o tausima’i i totonu o le falemai lea ma te faigaluega ai ma Naomi.  O le supavaisa le la a Naomi,” o le tali atu lea a Taki.

Na pei e oso Naomi i se niu ina ua na fa’alogo mai i le igoa lea e ta’u atu e lona tuagane.

“O ai le igoa o lau uo teine?” o le fesili mai lea a Naomi i si ona tuagane.

“O lau supavaisa o Salome,” o le tali atu lea a Taki, ae ua le tali Iakopo.

“E sa’o, na fa’ato’a oso lava uiga o Salome ina ua va’ai i lou ata a’o e a’oga.  E te lua masani ma Salome?” o le fesili atu lea a Iakopo i lona tuafafine.

O mata uma o le aiga ua liliu atu ia Naomi.

“E ma te le masani lelei, o la’u supavaisa lena,” o le tali lea a Naomi ma tilotilo ese.  Ua tulai nei Naomi ma si’i lana ipu i le fa’atanoa fulu ipu ma faapea mai, “Maona, fa’afetai lava fai mea’ai”.  Ma savali loa agai i totonu o le latou fale.

Na umi se taimi o tu Naomi i le ogatotonu o le potu malolo o le latou fale ma fa’ataupupula i ona ata a’o aoga, le taimi lea o lona lapo’a ai.  Ma I’u ai lava ina maligi ona loimata.

“E iai se mea o tupu?” o le fesili lea a se tagata mai ona tua.

Ma le liliu atu o Naomi, o le alii fomai o Taki lea e tu mai i tua.

[E FAIA PEA]