O OE O LO’U TAMA?

VAEGA 33

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*************************************

Na gata mai le tatou Fagogo i le vaiaso ua mavae, ina ua alu le tamaitai o Salome i le fale o Iakopo, ae  te’i ina ua vaai i ata o si teine o Naomi i totonu o le fale.

Na umi se taimi o tu Salome ma faataupupula i ata o Naomi ma ia toe manatua le teine lapo’a o le latou vasega, lea sa masani ona ia sauaina ma ta’ita’I isi o le latou vasega e ula ma talie ia Naomi.

Ua liliu atu nei ia Salome ma fesili ia Iakopo po o le ata le la a ai, ae tali mai Iakopo, “O si o’u tuafafine laititi lena o Naomi.”

Na pei e va’ai Salome i se aitu ina ua ta’u atu e Iakopo, o lona tuafafine ia le teine lapo’a lea e i totonu o le ata.  Le teine lapo’a lea sa masani ona fai ma polo tu’i a Salome i aso o latou a’o’oga.  Si teine lapo’a lea sa masani ona asu e Salome ana mea’ai lea e masani ona alu atu le tama o Iakopo e momoli atu mo Naomi i taimi o malologa a le aoga.

Ua va’aia e Iakopo le suia o lanu o foliga a Salome ma ia faapea atu, “E iai se mea ua tupu?”

Na tuai ona tali mai Salome, ae o’o atu loa ia Ruta ma le feau mai ona matua, “Iakopo, fai mai Mom ma Dad e o atu loa, la ua vela le meaai.”

E fai le tala a Ruta i lona tuagane o Iakopo, ae fa’asi’usi’u mata mai ia Salome, lea ua tu ua leiloa po o le a lana taga o le a fai.

Ua savali ese atu Ruta e vala’au ia le alii fomai o Taki e sau loa e ‘ai, ae ua leiloga se taga a Naomi e fai.

E fetaui lava le savavali atu o Iakopo ma Salome o le a o i le fale’aiga lea o lo o faatali mai ai matua a Iakopo ma le teine o Naomi, ae fetaui ma le savali atu o le alii fomai o Taki.

“Oi, malo le soifua Salome,” o le fa’atalofa mai lea a Taki.

Ua liliu atu Salome ma va’aia le alii fomai ma atili ai ona manumit ona foliga.

“E te nofo i’i? Faapea o la e te nofo i le faletalimalo.” O le tala lea a Salome.

“Leai, ua atoa le masina o o’u nofo totogi i le fale o le aiga a Iakopo,” o le tali mai lea a Taki ma savali atu agai i le faleaiga.

“Iakopo, e faamalie atu, ua ese lava la’u fa’alogo.  Ae a pe a e fa’amalie atu i nai ou matua, ae o le a ou alu i le fale, se’i o’u taoto,” o le tala fa’afuase’i lea a Salome ia Iakopo.

Ua tu nei Iakopo ma pupula to’a mai ia Salome, “E a lau tala?” o lana fesili lea.

Ua iloa lelei e Salome, a va’ai Naomi ia te ia, o le a ono iloa ai e le aiga a Iakopo ia lana mea sa fai ia Naomi a’o la a’o’oga fa’atasi.

Ae  o le mea na sili ona popole ai Salome, ina ne’i iloa e le alii fomai, ona avea lea ma lape i totonu o lana galuega.

“Faamolemole lava Iakopo, ua ese la la’u fa’alogo.  E iai la’u fualaau lea e i le fale, e masani ona inu ae lea ou te le o sau ma a’u.  Faamalie atu lava i nai ou matua.  Ae se’i o’o taeao o ta toe talanoa,” e fai lava le tala a Salome ma savali atu i le faitoto’a o le fale lea e agai atu ai i le auala tele, i le mea o lo o paka ai lana ta’avale.

Ua fiu lava Iakopo e toe “Salome” atu, ae e pei o lo o tuli ma ni aitu le savali fa’atopetope a Salome i lana taavale ma alu ese atu ai.

[E FAIA PEA]