O OE O LO’U TAMA?

VAEGA 32

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 32.

***********************************

Na fiu lava si teine o Naomi e taumafai e lafi mai ia Salome, i totonu o le potu a Tausima’i, ae peitai, sa fa’ate’ia o ia  ina ua valaau atu Salome, “Le tausima’i lea, se’i sau lava faamolemole.”

Ua saofa’i atu nei Naomi i le nofoa e faafesaga’i ma Salome, ma faapea mai Salome, “E iai lava le mea ou te masani ai ia te oe, a ea?”

Ua le tali Naomi ae ua na ona tilotilo atu ia Salome, ma taumate po o le mea o taufa’ase’e le faamatalaga a Salome, o la na te iloa Naomi ae fa’ataga le iloa, po o le mea, e moni lava e le o manatua e Salome o ia.

Na tali atu Naomi ma ata, “Atonu na e va’ai ia te a’u i se mea, ae ailoga e ta te masani.”

E toe tau fai atu leisi tala a Salome, ae ua tulai vave i luga ia Naomi ma faapea, “E faamalie atu lava, o lea ou te alu e sui le moega o se tasi o gasegase.”  Ma savali ese atu lava.

E alu lava Naomi ae ua fa’anunumi foliga o Salome ma faapea ifo, “Ou te masalosalo lava e iai se mea ma te masani ai ma le tausima’i le la.”

O lena afiafi, na fiu le alii o Iakopo e tauvala’au le telefoni a Salome, ae ua le tali maia.

Ae o Salome foi ia, ua alu le po atoa o mafaufau lava i le faamatalaga a Iakopo, e la te o i lona aiga.

E usu mai la Salome i le galuega i le taeao na soso’o ai, ae ua mautonu lona manatu, o le a ioe i le talosaga a Iakopo, e la te o i lona aiga.

Na leiloa le mea e tau mai ai le fiafia o Iakopo ina ua fai atu Salome ia te ia, “Ia ua lelei, ua ou talia lou mana’o, e ta te o e feiloai i ou matua.”

Ua fai nei le tonu a le toalua lea, o le a fetaui pe a manava Salome, ona o lea e fai se fa’atauga e o ma la’ua e asi ai matua ma le aiga o Iakopo.

Ua le lelei se galuega a Salome i le alu o lona ulu i le feiloaiga lea o le a faia i le afiafi lea, ma matua o Iakopo.  O le tamaitai lenei o Salome, ua matua oti ma e leai foi ni ona uso po o tuagane, e na o ia lava le tama a ona matua.  Ma o le mafua’aga lea ua fai ai siga nervous o le tamaitai ona e le masani i ni aiga tetele.

Ua manava galuega o lea aso, ma ua savali atu loa Salome i lana ta’avale ma aga’i atu loa i le faleoloa na la tu’utala ma Iakopo e fetaui ai e fai ai le la faatauga.

Oka se fa’atau ina a tele, a le teine o Salome.  E fai atu lava Iakopo ua lava, ae mana’o lava Salome ia aua ne’i faia se tala i le laiti o mea o lana asiga.

Ua aga’i atu nei le ta’avale a le to’alua lea i le fale o le aiga a Iakopo, ma ua le manofo lelei le tamaitai o Salome, ua pei o se tagata ua ai e loi tamatama’i vae, le minoi solo i totonu o le ta’avale.

Ua a’apa mai Iakopo ma u’u lona lima ma faapea atu iai, “Aua e te popole.  O o’u matua e le manatu fa’apena.  E pau lava le mea e la te manana’o iai, ia ola fiafia le la fanau.”

Ua taunu’u nei Iakopo ma Salome i le fale o le aiga a Iakopo ma ua fa’afeiloa’i mai e le ulugalii o Tanielu ma Eseta.

“O fea o iai Ruta ma Naomi?” o le fesili lea a Iakopo ma tilotilo solo mo ona tuafafine.

“Ai ua toeititi taunu’u mai.  O la e o mai fa’atasi ma Taki,” o le tali mai lea a Tanielu.  “Ae o ma Salome e talatalanoa i totonu o le fale ae se’i tope atu le tatou meaai.”

Ua aga’i atu nei le to’alua lea i le potu o Iakopo e eva ai, ae taunu’u loa le ta’avale a le alii fomai o Taki ma teneiti o Ruta ma Naomi.

“O le ta’avale le la a ai e i luma o le fale?” o le fesili lea a Naomi ma oso atu fesoasoani i ona matua i le kuka o le afiafi.

“O le ta’avale a le uo teine a Iakopo, lea na o mai ananei.  O la e i totonu o le fale,” o le tali mai lea a Eseta.

Ua fetilofa’i Naomi ma Ruta ma talie.  Ae o le taimi lea ua savali ese atu Taki aga’i i lona potu.

Ua mae’a gasesega a le ulugalii o Tanielu ma Eseta ma le la fanau teine, ona fa’atonu loa lea e Tanielu ia Ruta e alu e valaau mai ia Iakopo ma lana teine, faapea ma le alii fomai o Taki.

Ua saofafa’i ifo nei ia Tanielu ma Eseta ma Naomi i le laulau ‘ai e faatali leisi vaega o le latou aiga.

Ae o le taimi lea o lo o fa’asolosolo ai le matamata a le tamaitai o Salome i ata o le aiga a Iakopo i totonu o le fale, ae tau loa lana vaai i le ata o Naomi a’o latou a’o’oga fa’atasi i le aoga tulaga lua a le latou nu’u.

Na umi se taimi o tu ia Salome ma pupula to’a i le ata o le teine lapo’a lea sa masani ona ia taufa’alili iai a’o latou a’o’oga.  Na pei e va’ai Salome i se aitu ina ua va’ai atu, i le tele o ata a le teineititi lapo’a lea i totonu o le fale a le aiga o Iakopo.

“O ai si teine lea?” o le fesili tosotosololoa lea a Salome.

“Oi o si o’u tuafafine lena o Naomi,” o le tali mai lea a Iakopo.

[E TOE FAIA PEA]