O OE O LO’U TAMA?

VAEGA 31

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*************************************

Sa matua’i fa’ate’ia le tamaitai o Salome ina ua faapea atu iai Iakopo, e mana’o la te o se’i feiloai ia Salome i matua o Iakopo.

Manatua n agata mai le tatou fagogo i le vaiaso ua mavae, ina ua fa’ailoa atu e Iakopo ia Salome o le a le avanoa o ia i le faaiuga o le vaiaso, ona o lo o fuafua se tafaoga a lona aiga.  Ae fia fa’ali’i ai Salome.

Na umi se taimi, ua na o le pupula to’a atu o Salome i foliga o Iakopo, e aunoa ma se toe ‘emo o ona mata.

“Se’i toe fai tasi mai lau fa’amatalaga ali’i Iakopo,” o le tali atu lea a Salome ia Iakopo.

“O lea ua atoa le masina o le ta faigauo, ma ua ou le lava nana le ta faigauo mai i le matou aiga  O taimi uma lava e fai ai se ta fuafuaga, ou te tau mafaufau lava se tala e fai i o’u matua e aua ai ne’i masalosalo i le mea o o’u alu ai,” o le tala lea a Iakopo.

“E le o se mea faigofie lena e te fai mai ai Iakopo,” o le toe tali atu lea a Salome.  “Faamolemole e tu’u mai se taimi se’i o’u mafaufau ai.”

“Ou te iloa o lena e te le fiafia i le toe tolopo o a ta fuafuaga mo le faaiuga o le vaiaso, ona o le tafaoga a le matou aiga,” o le tala lea a Iakopo.

“Ia aua le popole, alu i le tafaoga a le tou aiga, ona e toe fo’i mai lea ta toe talanoa,” o le tala lea a Salome, ma tu lava i luga ma savali ese atu.

Na umi se taimi o saofa’i lava Iakopo ma tilotilo atu i le itu na savali atu iai Salome, ma ona mafaufauga ua le mautonu.  Ua le iloa e Iakppo po o lo o ita lava ia Salome, ia po o ua popole i le alu e feiloai ma ona matua.

Ua alu ese atu nei ia Iakopo mai i le falemai, ae o le taimi lea ua savali atu ai Salome ma saofai i totonu o le potu a Tausima’i ma tau to lona sela.

Ae fetaui loa ma le savali mai o le teine o Naomi.  Sa taumafai lava Naomi e alo’ese mai i le mea o saofa’i atu ai Salome, ae peitai, na vala’au atu iai Salome, “Tamaitai, se’i sau lava faamolemole.”

[E FAIA PEA]