O OE O LO’U TAMA?

VAEGA 29

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

******************************

Ua alu aso, sau aso, ua te’a atu le masina atoa o nofo le alii fomai o Taki i le fale o le aiga o tamaloa o Tanielu ma le fafine o Eseta ma si a la fanau toatolu o Ruta, Iakopo ma Naomi.

Ua mafana le mafutaga a le alii fomai ma lenei aiga.  O taeao uma lava, e nonofo faatasi ma inu ti ma talatalanoa talitalie faatasi, ona feosofi o faatasi lea o Taki ma le tamaitai tausimai o Naomi, i le falemai, i le taavale a Taki.  Ae ona o le musu tele o Naomi ina ne’i iloa mai lona alu atu i le taavale a Taki, e masani ai lava ona ia faatonu Taki e tu’u o ia i se vaega o le auala, e le mamao teisi mai i le falemai, ona savali atu lea iina i le falemai.

Ua va’aia lava le fiafia o le alii fomai i lona aiga fou.  O se mea e fiafia tele lava iai le alii fomai o Taki, o faaiuga o vaiaso ia e latou te faifaimea faatasi ai ma le tamaloa o Tanielu ma lona atalii o Iakopo.  A le fai faatasi ni a latou galuega i le fale, e latou te o faamama le lotoa ia po o le alu foi o se latou lava tafaoga.

E o’o lava foi i le tina ia Eseta ma si ana fanau teine o Ruta ma Naomi, ua fiafia lava ua iai seisi e toalua ma Iakopo e faia le mamafa o a latou galuega, ona o le manatu alofa lava o nai tamaiti i si o latou tama, ua le toe tutusa foi le malosi.

Ua o’o i se tasi taeao, a’o fai le inuga ti a le aiga, sa faateia le aiga ina ua faapea atu le alii fomai o Taki, “Ou te mana’o e fa’aavanoa so outou taimi i le faaiuga o le vaiaso nei.  Pe mafai ona ou ave uma ai outou i se tafaoga.”

Ua fetilofa’i le ulugalii o Tanielu ma Eseta ma le la fanau, ona o le fa’aaliga faafuasei a Taki.

“Ou te manao tatou te o i se a’ai e fai sina mamao tele atu, tatou te tafafao ai i ni maimoaga ma fai ai se tatou meaai, ma tatou momoe i se po e tasi i le faletalimalo lea ua uma ona ou totogia.  Aua le popole i se mea e tasi, ua uma ona ou saunia uma mea uma.  Na o lau atopa’u lava e tapena,” o le tala lea a Taki.

Sa va’aia le fiafia o le ulugalii ma si a la fanau ma ua faapea mai Tanielu, “Fa’afetai tele lava Taki manatu mai.  Se’i o ma talanoa ma le tina ona fa’ailoa atu lea ananei le tali.”

Ua ta’ape nei le aiga, ua o atu le fanau i galuega ae nonofo Tanielu ma Eseta ma talatalanoa i le talosaga a le alii fomai.

“E manaia foi sia meaalofa ua sauni mai e Taki mo tatou, atonu e maua ai foi sau malologa, ua leva tele e tatou te le o toe o e tafafao ma tamaiti,” o le tala lea a Eseta.

“Ae o ai o le a vaaia le faleaiga ma le fale?” o le fesili lea a Tanielu.

Ua ‘ata le fafine o Eseta ma faapea atu, “O ai o le a sau e gaoi atoa le fale ma le fale’aiga?  E mafai lava na ta fai i nai a ta tuaoi e va’ava’ai mai le fale ma le faleaiga.  E na o le weekend lava lea tatou te o ai.”

Ua amata ona gagau atu le loto o le tamaloa o Tanielu i le tauanau a lona toalua, ona ua manaia foi le manatunatu atu i le tafaoga ma le faia o sina malologa mai i ana galuega.

[E FAIA PEA]