O OE O LO’U TAMA?

VAEGA 26

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 26.

*************************

Na laulogo uma totonu o le fale o le aiga a Tanielu ma Eseta i le AUOI a Iakopo, ina ua tuma e lona tuafafine o Naomi.

“O fea sa e iai? Ua ou fiu e vaavaai solo oe, ae na e fai mai nei lava e te faatali se’i o’u manava ona ta o mai faatasi lea i le fale?” e fai lava fesili a Naomi ma tatu’i lona tuagane.

Ua oso Iakopo ma tamo’e atu lafi i tua o lona tina.  “Mama fesoasoani mai!” o le taualaga lea a Iakopo ma taumafai e ‘alo mai i lima o Naomi.

“Se soia, matua’i tou faalavelave tele,” o le ote mai lea a le tina ia Eseta.  “Ae o le a le mea na e fai ai i le teine e te faatali ae ua fiu le teine e su’e oe?”

“Se ua iai foi gai mea faafuasei ga feosofi mai!” o le tala lea a Iakopo.

“Auuuuuu, ai foi ga kaumulimuli i se keige!” o le ‘ava’avau atu lea a Naomi.  “O le mea lava lega ua le koe pasi ai au suega o lou kaumulimuli i keige.”

Ua va’aia e le fafine o Eseta ua suia foliga o si ana tama o Iakopo ona o tala faatiga a Naomi.

“Ia ua lava loa lega Gaomi! Ga la’a e sosopo,” o le ote atu lea a Eseta i lana tama teine o Naomi.

Ua savali ese nei ia Iakopo ma agai atu i lona potu ae a’apa atu Eseta ua i’ini ia Naomi.

“O le a?” o le oso lea a Naomi ma o’omi le mea sa ini e lona tina.

“Aua lava ge’i o’u koe faalogo aku o koe fai sau kala faapega ia Iakopo.  O la e kaumafai malosi lava si kama e su’esu’e e pasi ai aga suega.  Aua le avea lau galuega ma mea e galo ai ia oe le lua va ma lou kuagage, ua e iloa?”

E fai lava tala a Eseta ma sasa Naomi.  Ua sola ese Naomi mai i le a’apa atu a lona tina.  Ae valaau mai loa le tamaloa o Tanielu i lona toalua ma lana fanau, e o atu e a’ai.

“Alu e valaau Iakopo ma Ruta e o mai e a’ai,” o le faatonuga lea a Eseta ia Naomi.

Ua saofafa’i ifo nei le aiga, ua fai le latou lotu faafetai ma amata ona fai le meaai o le afiafi.

“O taeao lea e sau ai le alii fomai o Taki e la’u mai ana meafale,” o le fa’asalalauga lea a le tamaloa o Tanielu i lona aiga.  “Iakopo, vaai e te malolo mai taeao e te fesoasoani ia Taki.”

“Faamolemole Dad, e iai la’u faalavelave taeao,” o le tali atu lea a Iakopo i le faatonuga a lona tama.

“E sa’o lava a’u, ai foi o le keige lea ga la kafafao agagei lea la ke koe fekaui kaeao,” o le oso atu lea a Naomi.  Ae i’ini e Eseta lona vae.

“ O la e sau taeao ia Taki, e mafai lava na e alu pe a uma,” o le toe fai mai lea a Tanielu i lona atalii.  “Ae e ese lava lo’u lagona i le alii fomai lea.  E iai lava so’u lagona, sa iai se mea na ou vaai muamua iai.”

[E FAIA PEA]