O OE O LO’U TAMA?

VAEGA 23

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*****************************

Sa gata mai le tatou Fagogo i le vaiaso ua tuanai, i le taimi lea na alu atu ai le alii fomai o Taki e vaai le potu totogi a le aiga o le tamaitai tausima’i o Naomi, ma taofi ai o ia e matua o Naomi, e latou te faiaiga i lea afiafi.

Ma a’o potopoto le aiga ma talatalanoa e uiga i mea na tutupu i o latou aso, na faamatala ai e le tamaitai o Naomi ia vaitaimi o laiti, lea sa lotoleaga uma tamaiti o lana vasega ia te ia, ona na o ia lava sa masani ona alu atu lona tama e ave atu lana meaai i taimi o malologa.

Na fa’afuase’i ona tu i luga le alii o Taki ma fesili mo le fale le ta’ua a le aiga, ae fesili atu iai Naomi pe aisea le mea e mumu ai ona mata.

Ua toe fo’i mai Taki mai i le fale taele ma faamalie atu i le aiga ma faapea atu, “Ou te leiloa po o se mea na pa’ia ai lo’u mata.”

“Ae o le a fai le tonu ona ou te vave usu foi i galuega a taeao.”

Na tutulai uma i luga le aiga, a’o faaleo atu le faafetai a le alii fomai ma savali atu agai i le faitotoa.

Sa ia toe lilium ai ma fa’afetai mai i le fafine ia Eseta ma lana fanau, ae o le taimi lea ua savali atu ai Tanielu ma mulimuli atu i tua o Taki a’o agai atu o ia i fafo ma le fale.

“E mamao le mea o e faamautu ai nei?” o le fesili lea a Tanielu ia Taki.

“E leai, e latalata lava i le falemai.  Ae faigata e le mafai ona ou nofo umi i totonu o se faletalimalo, e musu le falemai e toe fa’aalu se tupe e totogi ai le faletalimalo,” e fai lava le tala a Taki ma ata.

“Afai e manaomia se fesoasoani i le la’uina mai o au meafale po o ato, fai ifo ia Naomi, ae mafai ona ma o atu ma Iakopo e fesoasoani i le la’uina mai o au mea totino,” o le faapea atu lea a Tanielu.

Na liliu Taki ma faasaga i le mea o tu mai ai lana taavale, ma taumafai e soloi ona mata.

“Leai, aua le faapopoleina fua lou aiga,” o le tali mai lea a Taki.

“E leai se mea o iai.  Ae avatu le meaai lea e te alu ma oe e tu’u i lau pusa aisa, ne’i te’i ua e toe fia tausami,” o le tala lea a Tanielu ma tu’u atu se ato o iai totonu ni Tupperware o meaai.

Na te’i Taki, po o le a le taimi na tapena ai e Tanielu nei meaai mo ia.

Ua tago mai nei Taki u’u atu le tagapepa meaai ma savali faatopetope loa i lana ta’avale, ua leai ma seisi tala pe toe tepa mai i tua.

Ae o le taimi lea, o lo o tu ai lava Tanielu ma talotalo atu i le alu ese atu o le ta’avale a le alii fomai.

Na alu lava le ta’avale a Taki ae tepa mai i le faamalama o lo o faasaga i tua, o lo o tu atu ai lava Tanielu ma talotalo atu.

Na va’aia le maligi o loimata o le alii fomai a’o alu ese atu lana taavale.

[E FAIA PEA]