O OE O LOU TAMA

VAEGA 150

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

****************************************************

Na gata mai le tatou Fagogo i le vaiaso ua tuanai i le taimi ua saunia ai le faamasinoga Apili a le tamaloa o Alesana e fa’atatau i lona faasalaga mai i le faalavelave lea na tupu a’o ona talavou, lea na maliu ai le atalii a se ulugalii mau’oa.

A’o fa’atalitali le tamaloa o Alesana ma lana loia, lona afafine matua o Ruta, i le taunu’u atu a le faamasino, na faate’ia le teine o Ruta i le musumusu atu a Alesana, e aua le tilotilo ae o lea e nonofo mai i tua ia matua a le tamaititi mau’oa lea na maliu.

Ua le mautonu nei le mafaufau a Ruta, ona ua ia iloa lelei ava le uiga o le auai atu a le ulugalii.  O se la taumafaiga lea e tosina le agaga a le faamasinoga, ina ia aua ne’i talia le tagi po o le apili a si ona tama.

Ua o’o i le tiami e amataina ai le faamasinoga ma ua taunu’u atu le alii faamasino.  O lenei ituaiga faamasinoga, e leai ni tagata Iloilo e pei ona masani ai faamasinoga, ae ua na’o le faamasino lava e na te iloiloina le mataupu ma faia le faaiuga.

Ina ua mae’a ona alala i lalo le alii faamaisno, sa ia tu’uina atu loa le avanoa i le tamaitai loia ia Ruta mo lana ulua’i faamatalaga e tusa ai ma le autu o le faamasinoga

E pe a ma le 10 minute le umi o le tautalaga a Ruta, na ia folasia ai le auga ma la autu o le la o’o atu ma lona tama i luma o le faamasinoga i lea taeao.  Faatasi ai ma le faamatalaina o le faalavelave sa tupu ma le gaioiga a lona tama i lea aso, ae fa’ai’u i lona faamatalaina o le soifuaga ma le olaga a si ona tama, i le tulaga o le latou aiga, o le avea o lona tama ma se tagatanu’u tausi tulafono ma faamaoni i ona tiute uma, e le gata i totonu o le latou aiga, ae faapea totonu o le latou atunu’u.

Ina ua mae’a le folasaga a le tamaitai o Ruta, sa faapea ona fesiligia e le alii faamasino ia Ruta, pe iai ni ana molimau e faamautu ai lana finauga.

Sa tali Ruta e faapea, o lo’o iai se tagata o lo’o ona silafia le moni o le finauga a lona tama, ae peitai, ua sili atu le malosi o le tosinaga a le tupe i lo lona faamaoni.  O le mea lea, ua na’o lona tama lea ua sauna e molimau.

Ua faapea mai loa le alii faamasino, o le a malolo le latou faamasinoga, se’ia ta le 2 i lea aoauli, ona toe fa’aauau ai lea i le molimau a le tamaloa o Alesana.

Ua tutula’i le faamasinoga, ae tu’umuli atu le alii faamasino.  E le’i toe nonofo lelei ifo i lalo tagata sa i totonu o le potu faamasino, ae tu a’e i luga ia le ulugalii matutua lea ma savali sa’o atu lava i le laulau o lo’o nonofo mai ai Ruta ma Alesana ma faapea atu le fafine ia Alesana, “O le a le uiga o lenei mea ua e toe faia? E le’i lava le tiga sa o ma mafatia ai i le maliu o si a ma atalii?”

[E FAIA PEA]