O OE O LO’U TAMA?

VAEGA 18

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 18.

**********************************

Na fai si umi o saofai pea Naomi i totonu o le potu malolo a Tausimai ona ua ona le mautonu po o le a leisi ana taga o le a fai.

E fai o lona le fia faamavae mai lana galuega, ae peitai, o le fa’atu o lona mafaufau ma lona loto, ona o lona fili lea ua avea ma ona taitai i totonu o le galuega.

A’o saofai pea Naomi ma tau mafaufau leisi ana taga o le a fai, ae savali atu loa i totonu ia le alii fomai o Taki.

Na ona iloa atu lava e Taki le mea o saofai mai ai Naomi, faga sa’o atu lava Taki ma nofo i le nofoa i tafatafa o Naomi.

Na fa’ate’ia Naomi ina ua saofai atu Taki i ona tafatafa.

“Aisea na e alu ai i le ofisa a le pule o le falemai ananafi?” o le fesili atu lea a Taki ia Naomi.

Ua te’i Naomi i le fesili a le alii fomai.

“E faamalie atu i lau susuga, e le mafai ona ou ta’u atu le mafuaaga,” o le tali mai lea iai o Naomi.

Ua lulu le ulu a Taki ma toe fesili atu, “E iai se mea e mafai ona ou fesoasoani atu ai?”

Ua atili ai le faateia o Naomi i fesili a le alii fomai.

“E leai, o lo o lelei mea uma,” o le tali faatopetope mai lea iai a Naomi.

“Afai o iai se mea o avea ma faalavelave i lou mafaufau, e ono a’afia ai lau galuega, o se tulaga lea e mafai ona ou fesoasoani atu ai, ona o lo o faamoemoe le tele o tagata gasegase o le atunu’u ia te oe,” o le toe faapea mai lea a le alii fomai.

Ua lagona e Naomi, ua tolotolo ifo se mea pei o se ita i le fomai.

“O iai se mea o faapopoleina ai lau susuga i le faatinoina o la’u galuega?” o le fesili mai lea a Naomi.

“O a’u ou te fou mai i le tou falemai.  Ou te le mana’o e galue faatasi ma ni tausimai e le o mafai ona faatinoina lelei a latou galuega,” o le tali lea a le alii fomai.

Ua tu sasa’e a’e nei i luga ia Naomi ma le le fiafia tele, ma faapea atu, “Ioe, o oe e fou mai i le galuega ae a e tagai i luga o le laupapa, o lo’u ata lena e pipi’i ai, o se tagata faigaluega silia i masina e tele.  E leai se mea e faapopoleina ai fua lau susuga i le faatinoga o la’u galuega.”

E fai a le tala a Naomi ma savali ese atu loa ma amata lana galuega.  Ua na le iloa mai le ataata lemu a le alii fomai o Taki, a’o ia tilotilo atu i le savali ese atu o Naomi.

E FAIA PEA.