O OE O LO’U TAMA?

VAEGA 17

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*********************************

Na gata mai le tatou Fagogo i le vaiaso ua mavae ina ua feto’ai tutu lava le teine o Naomi ma le supavaisa fou a Tausima’i, le tamaitai o Salome, i totonu o le falemai.

Ua ata atu Salome ia Naomi ma faapea atu, “Talofa.  O a’u o Salome, le supavaisa fou a Tausima’i.  O ai lou suafa?”

Na fai sina umi o faataupupula atu Naomi ia Salome, ua fiu e tali atu ae pei ua ave’ese e se faataulaitu lona leo.

Ae oso mai loa ma le alii fomai o Taki ma fa’afeiloai atu ia Salome, ma taitai ese atu o ia.  

O le taimi lea ia Naomi ua faapa’u atu agai i le pa sima o le falemai ma to ai lona sela, e pei ua umi se taimi e le manava.

A’o savavali ese atu Taki ma Salome, na toe tepa mai i tua ia Taki ma vaaia le faataumanava a Naomi ma ua oso ane ai ni manatu fia malamalama ia Taki, pe aisea le mea e faapea ai Naomi.  Aua, o le mafua’aga lea na oso atu ai ma taitai ese Salome, ona e vaai atu i foliga o Naomi ina ua fa’afeiloai e Salome, ua pei o se tagata ua vaai i se aitu le pa’epa’e o ona foliga.

Ina ua toe lelei le faasologa o le manava a le teine o Naomi, na ia savali atu ai loa i totonu o le potu a tausimai ma ki sana vai malulu ma inu faatopetope, ona nofo lea i lalo ma taumafai e toe fa’ato’ato’a lelei le ta ta vale o lona fatu.

Ua amata ona maligi lemu ifo loimata o Naomi ina ua toe fo’i ona manatu i sauaga a lenei tamaitai o Salome sa faia ia te ia, a’o la talavou.  Ua atili ai ona tagi Naomi. 

O leisi tulaga na iloa ai iina e Naomi, ua galo ia Salome o ia, aua o lea na fesili atu po o ai lona igoa.

Ua leiloga se mea e feosoosofa’i solo ai mafaufauga ma manatu a Naomi, ona o le tasi itu, e le o iloa o ia e Salome, o lona uiga, ua galo ia Salome le teine aoga lea sa masani ona ia sauaina a’o la talavou.  O lona uiga, e leai se mea o le a faamavae ai fua mai lana galuega.

Ae o leisi itu, a o’o ina iloa e Salome o Naomi le teineititi lapo’a lea sa masani ona ia sauaina a’o la a’o’oga, e leiloa e Naomi po o le a le mea a Salome e fai ia te ia.  Aua e ui lava ua o la matutua, ae ua goto i le loto o Naomi ona lagona fefe ma le mata’u ia Salome, talu mai lona talavou.  Ma o ni lagona e fa’agalo gata.

Ua toe oso le le mautonu i le loto o Naomi, pe o le mea o le a alu loa e faamavae mai lana galuega ae e le’i iloa e Salome lona igoa…pe o le a loto tele e faafesaga’i ma le faasalaga o lona olaga talavou.

E FAIA PEA.....