O OE O LO’U TAMA?

VAEGA 62

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  O le vaega lua lenei o le tatou Fagogo fou, i le alii o Taki ma le tamaloa o Tanielu.  Ae ia se’e maia i ou se’etaga malu, se’i toe soso’o atu le tatou Fagogo.

***************************

E pisi lava le ulugalii o Tanielu ma Eseta i le tapenaina o meaai o le la faleaiga i le taeao o le Aso Gafua, ae sa le i faatamala ai lava Tanielu e tapena foi ma le meaai o le taeao a si ana fanau o Iakopo, Ruta ma Naomi.

E ui lava ua matutua nei tamaiti ma ua “toe o ni taitoalua” e pei ona ote ai le tina ia Eseta, ae peitai, sa le tu’ua ai lava le toaga o le tamaloa o Tanielu e tapena a latou taumafataga i le taeao, aoauli ma le afiafi.

Ma sa fai ma masani a Tanielu le alu i le aoauli e momoli meaai a lana fanau a o a’o’oga i latou, ae o lea ua matutua ma ua faigaluega uma ia teine o Ruta ma Naomi, ia ma le usu o Iakopo i taeao uma i le aoga e fai ai ana suesuega aua suega e ulufale ai i le iunivesite, ae e le i tuua ai lava le galuega alofa a lenei tama o Tanielu, o le alu e momoli i ofisa ma faletusi ia meaai o le aoauli a si ana fanau.

E ote a la le tina o Eseta i le leaga o le faiga e Tanielu o lana fanau, ae fai lava e Tanielu lenei galuega faigata ma le laumata fiafia ma le pese i lona loto.

O lea taeao, na usu mai ai le teine o Ruta e sauni e alu e faigaluega i lona ofisa loia, ae sauni Iakopo e alu e nofo i le faletusi a le Iunivesite ma fai ana suesuega ina ia mafai ona pasi lana suega ulufale i se tasi o galuega faa ofisa, ae le toe pasi.  Ae u ausu mai le teine o Naomi ma fa’asasa’o atu i le faleaiga a ona matua, e fesoasoani ai I ona matua aua le pisi o le taeao.

Ua faatonu e Tanielu ia Naomi e alu e valaau lona uso ma lona tuagane, e o mai muamua e a’ai ona o ai lea e faigaluega.  Ua tamo’e atu Naomi ma valaau nai ona tei e o mai.

Ua vaavaai fiafia Tanielu, a o a’ai lana fanau ma talatalanoa fiafia i lena taeao, ae e le i o ese atu mai le faleaiga, ae tu’ua ai na o la’ua ma le tina ia Eseta aua a la galuega masani o le aso.

O lo o faagasolo pea le aso o le ulugalii o Tanielu ma Eseta ma si a la fanau toatolu, ae o le taimi lea na taunuu ai se va’alele lapo’a a le malo i le malae vaalele.  Na sosolo atu ma se ta’avale a le malo, e piki mai se alii fomai faapitoa mai atunu’u i fafo.

O lenei alii fomai, sa ola mai o ia i le nu’u lea e iai Tanielu ma lona aiga, ma sa au o ia i Iunivesite maualuluga i atunu’u i fafo, i vasega fa’afoma’i.  O le maoae tele o le atamai o lenei alii i faiva o le faafomai, sa faapea ona faatosina mai ai o ia e le malo, ina ia galue i le falemai tele a le malo o lenei atunu’u.

O le igoa o lenei alii fomai, o Taki Sanerivi.  Ma ola mai lenei alii i se vaega o le nu’u e na o tagata mau’oa e nonofo ai.  Ma sa auai atu foi o ia i aoga e aooga ai fanau a tagata mau’oa.  Ona o le atamai o lenei alii, sa mafai ona faafaigofie ai ona ulufale atu i Iunivesite faafoma’i maualuluga.  O lenei foi alii o Taki, e na o ia lava le tama a lona tina.  E leai se tama ma e fia Taki e fesili atu i lona tina po o fea lona tama, ae tali lava lona tina, e na te le manaomia se tama, ua lava lava i la’ua.

O le falemai la lea ua galue ai nei le alii o Taki, o le falemai foi lena o lo o faigaluega faa tausimai ai le tamaitai o Naomi.

E FAIA PEA.