O le i’uga lava o le pa’i i leisi tagata, o le molia i le tulafono

Pago Pago - AMERIKA SAMOA

O le aso 14 o Oketopa, 2024 na vala’au ai se tina loto mafatia i le ofisa a leoleo, e ripotia iai le sauaina e sona alo o seisi alii.

E tusa ai ma fa’amaumauga a le malo, o le aoauli o le aso 14 o Oketopa sa valaau atu ai lenei tina i le ofisa a leoleo ma ripotia iai sona alo e suafa ia Tuifao Tuifelasa’i, ua nofo ma fasi seisi alii.

Ina ua fa’atalanoaina e leoleo ia le na a’afia i lenei faalavelave, sa ia faamatalaina e faapea, o la’ua ma Tuifelasa’i, sa fai se la galuega i lena taeao ma sa tu’u atu ai e le pule o le la galuega ia se tinoitupe e $20 e faatau ai se la meaai o le aoauli.

Ae peitai, ina ua o la o atu i le faleoloa i le aoauli, sa le fiafia Tuifelasa’i ona e le’i mana’o e fa’aaoga le tupe ona sa ta’ua e le na a’afia, sa mana’o le ua molia, e fa’aaoga e fa’atau ai se vaega o fualaau faasaina, o le Aisa.  Ae na fai atu iai le na a’afia, e avatu pea lana $10 e faatau ai sana meaai, ua fia ai.

Ma ina ua o la taunu’u i le fale, na alu sa’o lava Tuifelasa’i i le la potu ma loka mai.  Ae ina ua tu’itu’i atu le na a’afia ma fai atu iai e tatala mai le faitoto’a, sa musu Tuifelasa’i ma palauvale mai i le na a’afia.  Ae na fa’ate’ia le na a’afia, ina ua tatala fa’afuase’i mai e Tuifelasa’i ia le faitoto’a ma tu’i lona mata.

Na fa’ailoa atu e leoleo i le na a’afia, o le a ave o ia i le ofisa a leoleo ina ia mafai ona togafitia lona mata e le vaega a le EMS.  Ma na fa’atonuina ai foi e leoleo ia le tina po o le molimau, ina ia malaga atu ma ia i le ofisa a leoleo, mo le fa’aauauina o su’esu’ega a leoleo.

Ina ua faatalanoaina e leoleo ia le tina molimau, sa ia faamatalaina e faapea, sa tu’itu’i le alii na a’afia i le faitoto’a o le potu, ae o lo’o iai o ia i le fale ma sa lagonaina le palauvale mai o Tuifelasa’i i le na a’afia. 

Ma sa fai atu le na a’afia ia Tuifelasa’i, e tu’u le le mafaufau ae tatala mai e Tuifelasa’i le faitoto’a ma tu’i le mata o le na a’afia.  Ae e oso atu le tina/molimau e vaovao le misa, ua na le mafai ona taofiofi le ua molia.  Ona tago lea o le tina i se salu ma sasa ai le ua molia, ae atili ai ona ita. Ma o le taimi lena na valaau ai loa e le tina ia leoleo mo se fesoasoani.

Ina ua mae’a ona togafitia e le EMS ia le na a’afia ma sa ia tete’eina foi le aveina o ia i le maota gasegase a le LBJ mo nisi togafitiga, sa faatonuina loa i la’ua ma le tina ina ia fa’afeso’ota’i atu le ofisa a leoleo pe a toe va’aia le ua molia, ona e taunu’u atu leoleo, ua sola ese mai i le fale.

O le aoauli o lea lava aso, na toe fa’afeso’otai ai e le tina ia le ofisa a leoleo ma fa’ailoa iai, o lea na ripotia mai le va’aia o lona alo, i le faleoloa a le Laufou.

Ae peitai, na fiu leoleo e saili le ua molia i le Laufou, ae e leai seisi na maua.  O lea na toe agai atu ai leoleo i le fale o le tina.  E taunu’u atu loa leoleo, ae valaau mai iai le tina, o le ua molia lena ua tamo’e atu agai i tua o le fale ma sa tuliloaina loa e leoleo, ma mauaina atu le ua molia, o lo’o lafi i se pu pu vao i tafatafa o se vaitafe.

Na lokaina mai ai loa Tuifelasa’i ma aveina atu loa o ia i le ofisa a leoleo mo le su’esu’ena.

Ma na ia faamatalaina i leoleo lona le fiafia i le alii na a’afia ona o le pa’o i le faitoto’a ma o le mafuaaga lea na ia tatalaina ai le faitoto’a ma tu’i le mata o lea alii.

Ua molia nei Tuifelasa’i i le Fa’ao’olima i lona tulaga e tolu, o se vaega  ‘A’ i soligatulafono mama, e mafai ai ona lokaina o ia i le tausaga atoa, po o se sala tupe e $1,000 po o faasalaga uma e lua.

E $3,000 na faatulagaina e tatalaina ai lenei alii 20 tausaga, e faatalitali ai lona faamasinoga.