O le gaoi na sola ae toe maua i luga o le Api o Foliga

Pago Pago - AMERIKA SAMOA

I le aoauli o le aso Lua, Oketopa 31, 2023, na fa’afeso’ota’i ai e le pule o se faleoloa (Joe Store & Laundromat) ia le ofisa leoleo i Tafuna, mo se fesoasoani ona o se alii na alu atu I le faleoloa ma fasi le kesia, ae sola ma le masini tupe a le faleoloa.

Ina ua taunuu leoleo i le faleoloa, sa o latou matamata i ata o le vitio a le faleoloa ma na va’aia ai e leoleo se alii o lo o laeiina se ofuvae ami, o se pulou, mitiafu lanu pa’epa’e ma se’evae lanu enaena.  Sa fafa e lenei alii se atofa’afafa ma se aga’ese.

I suesuega a leoleo, na fa’ailoa ai e se tasi i leoleo le tamo’e atu o le ua molia agai i tua o le faleoloa a le Happy World, ma na faapea ona agai atu ai leoleo ma o latou maua ai le masini tupe a le faleoloa ua malepe, o taatia i tafatafa o se vaitafe.

Sa le i mafai ona maua le ua molia i lena aso, ae na mafai ona fa’asalalauina ata o lenei alii i luga o le upega tafailagi, ma na mafai ona iloa ai e leoleo lenei tagata.

I le faatalanoaga ma le pule o le faleoloa, sa ia faamatalaina ai e faapea, na alu atu le ua molia e fai sana faatauga, ae peitai, na tago lenei alii ma togi o ia i se fagu kofe ma tau ai i lona ulu.  Ma sa faapea ona a’apa atu le ua molia ma sei mai le masini tupe sa i luga o le fata ma sola ese ma ia.  Sa le i faamanualiaina le pule o le faleoloa, i le togi a le ua molia.

O le afiafi o le aso lava lea, na valaau atu ai se tasi i le ofisa a leoleo i Tafuna ma fa’ailoa atu i leoleo, o lea ua i le fale ia le ua molia.  Ma na iloa le ua molia, ona o lona ata i luga o le Facebook.

Na faapea loa ona agai atu leoleo i Aoloau i lea o iai le maota o le ua molia, ma loka mai ai o ia.

O le susuga ia Fernando Tauanuu lea ua molia nei i lenei faalavelave ma sa ia ta’ua i lana faamatalaga i leoleo, lona salamo e tusa ai ma le mea na tupu ma sa na ia iloaina lava le sese o lana gaioiga na faia, ae peitai, sa mana’o i se tupe e faatau ai sana pia ma sana sikaleti.

Sa faamaonia foi e le ua molia ia le molimau a le pule o le faleoloa, i lona togiina o le ulu a le pule o le faleoloa, i se fagu kofe atoa ai ma lona gaoia o le masini tupe a le faleoloa.

Sa ta’ua e lenei alii lona toatamai ina ua tatala atu le masini tupe i tua o le faleoloa a le Happy World, e leai se tupe o i totonu, tau o lisiti.  O lea na ia tiai ai le masini iina ae foi i lona aiga i Aoloau.

Ua molia nei le alii o Tauanuu i le gaoi ma le faaoolima i lona tulaga e tolu.  E $20,000 le tinoitupe faatulagaina e mafai ona tatala ai i tua.