O LE AVE PASI A’OGA

VAEGA 13

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

*************************************************

Na gata mai le tatou Fagogo i le vaiaso ua mavae, ina ua agai atu le faamatalaga i le teine o Epi, lea o lo’o alu atu lana ta’avale, i luga o le auala lava lea e tasi, o lo’o tau kamuta mai ai le pa’u o le pasi a’oga a le alii o Paulo.

Ma ua tu’u le faiga pa’u a Paulo ma le inisinia o le a’oga, ua tulimata’i e le tatou fagogo ia le saoasaoa mai o le taavale a le teine o Epi, ona o la e foe lava lana taavale ma lona ita tele i lana manamea lea ua fa’amuta atu le la faiga uo.

Ae ua iloa lelei lava e Epi le tamaitai lea ua mafua ai ona motusia faafuasei faapenei le la faigauo ma si ana manamea.  Ma e pe ma le tolu i le fa taavale, na toetiti so’a e Epi ona o lona ita ma le masau o le sau a lana taavale.

Ma o le mafua’aga foi lea, na le’i iloa atu ai e le teine o Epi ia le faiga pa’u a Paulo ma le inisinia a le a’oga, lea o lo’o fai mai i autafa o le auala. 

O le taimi tonu lea, ua savali ai le inisinia a le a’oga i leisi itu o le pasi e aumai se nati, ua taavale i lalo o le pasi.  Ae ona fa’alogo mai loa, ua i’i pa’u o se taavale, ma le pa’o o le tau o le taavale, i se mea malo.  Ma na’o na taia lava o Paulo e le taavale a le teine o Epi, maliu ai lava i le taimi lena.

E le’i umi lava na faatali ia leoleo, ae taunu’u atu ma ave faapagota ia le teine o Epi.  Na o le pau le tulaga sa fa’afetaia ai Epi, ona e le’i mauaina se ‘ava malosi po o fualaau faasaina ia te ia, i le taimi na su’esu’eina ai o ia.

Ae Talofa e i si alii ave pasi o Paulo.  Ua ave atu nei lona tino maliu i le ‘aisa e faatalitali ai le faia o ona su’esu’ega.

[E FAIA PEA]