O LE AVE PASI A’OGA

VAEGA 11

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

****************************************

Sa gata mai le tatou Fagogo i le vaiaso ua mavae, ina ua tupu le fa’alavelave i le  pasi a’oga lea o lo’o fealua’i ai le alii ave pasi o Paulo, i le aso tonu lava na faufau Paulo e pule ai i lona ola.  Ae o lo’o iai tamaiti a’oga i totonu o le pasi.

Atonu o se fuafuaga mamana a le Atua, ona ua le ‘ai le tulaga na faufau e Paulo, ona ua pa le pa’u o le pasi, ma le mafai ai ona toe fa’aauau lana malaga i luga o le alatele.

Na atili fa’amaonia lea tulaga, ina e le’i umi lava ona fa’aafe i tua e Paulo le pasi a’oga mai i le auala, ma fa’atu i tafatafa o le auala, ae sosolo atu ma le alii inisinia a le a’oga, sa fai sana galuega, i lea taeao, i se vaega o le alatele, e le mamao mai i le nofoaga na pa ai le pa’u o le pasi a’oga.

Ina ua mae’a ona Iloilo e le alii iinisinia ia le fa’alavelave na tupu, sa ia fai atu loa ia Paulo, e faatali ae se’i alu e aumai le siaki mai lana ta’avale, e sui ai le pa’u a le pasi a’oga.

Ina ua toe fo’i mai le alii inisinia ma le siaki, sa fa’ate’ia Paulo ina ua fesili atu, “Aisea le mea ua e oso mai ai i le auala lea, ae e le o se auala lea e te masani ona e ui mai ai’.

Na fai sina umi o tu le alii o Paulo ma tau mafaufau sana pepelo, ona faapea atu lea, “Se’i tau sui atu foi se va’aiga i lenei taeao.”

E le’i iloa mai e le alii inisinia le suia o foliga o Paulo mai i le ‘ata’ata, i le ita, ona ua le taulau lona fa’amoemoe.

[E FAIA PEA]