O LE AVE PASI A’OGA

VAEGA 09

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’malu, ae o le a taumafai atu le tatou Fagogo – O LE AVE PASI A’OGA.

**************************************************

Sa gata mai le tatou Fagogo i le vaiaso ua mavae, ina ua usu atu le alii ave pasi a’oga o Paulo, e faatino lana galuega i le tasi taeao, ae matua’i o’o i le lagi sau tua selau le maualuga o le me aua lele mai ai, ona o le malosi o lana ula i le po ua mavae, i fualaau faasaina.

Ma o le taeao foi lea, ua tonu ai i le mafaufau a le alii o Paulo, o le a faatino ai loa lana fuafuaga, e pule i lona ola.

Sa fuafua Paulo, o le a ia fa’aoso le pasi a’oga e faafetaui ma se ta’avale tele i luga o le alatele, ma ua le ano lava i soifua o nai fanau a’oga o lo’o iai i totonu o le pasi.

E alu lava la le pasi a Paulo i lea taeao, ae o lo’o fa’asepasepa lava i ona autafa ma tua o le pasi, po o ona iloa atu ni ta’avale tetele e latalata atu, e fa’aoso iai lana pasi a’oga.

Ae ua fiu lava Paulo e tau autilo ae atonu o galuega mamana a le Atua, ua fiu Paulo e tau autilo ia se ta’avale lapo’a, ae ua leai lava se taavale ua na iloa atu.  Ae na o le pau le taavale tele na ia iloa atu, o se ta’avale na alu ifo i leisi itu auala, e fai sina mamao.

Ua tonu loa i le mafaufau a Paulo, o le a fa’atu sa’o loa iai lana pasi, e tusa lava pe mamao ese atu.  Ae e sa’o lava, o galuega mamana a le Atua i lea taeao, ona ua silafia faufauga leaga a le alii o Paulo, na te’i Paulo i le faalogo atu, ua maluelue mai tua o le pasi.

Ma ta ai loa e Paulo ia le pasi i tua o le auala, ae oso i fafo e siaki po o le a le me aua tupu.  Ma le alu atu o Paulo, ua pa uma pa’u pito i tua o le pasi a’oga.

[E FAIA PEA]