O LE AVE PASI A’OGA

VAEGA 21

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, ae o le a fa’aauau atu le tatou Fagogo – O LE AVE PASI A’OGA.

*******************************************************

Sa gata mai le tatou Fagogo i le vaiaso ua tuanai, ina ua le faia se aoga i le aso na soso’o ma le aso sa tupu ai le faalavelave, lea na maliu ai le alii ave pasi o le aoga, o Paulo, a’o iai ni fanau aoga i luga o le pasi.

Ae ua talo se fonotaga a le pulea’oga ma le Komiti Faafoe o le a’oga, ona o se ripoti Matautia na maua mai i le foma’i fa’apitoa sa faia su’esu’ega i le tino maliu o le alii ave pasi, na o’o mai i le pulea’oga e tauala mai i le ta’ita’i leoleo na mataituina lenei mataupu.

Ma na alu le po atoa ua le moe le pulea’oga, ona ua le mautinoa lona mafaufau, pe a faapefea ona fa’ailoa atu i matua o alo ma fanau aoga na a’afia i lenei fa’alavelave sa tupu, ia le tulaga na iai le ave pasi, e pei ona fa’alauiloa mai i le ripoti mai i le falemai.

Ua saofa’i ifo nei le pulea’oga i lona nofoa, e faatalitali ai le taunu’u atu o totino uma o le Komiti Faafoe, ae o le taimi lea, ua le manofo lelei ona ua le iloa e le pulea’oga po o fea a amata ai lana folasaga.

Ina ua taunu’u uma sui o le Komiti Faafoe, sa mua’i faaleoina e le pulea’oga lona agaga fa’afetai i le komiti ona o le fa’aavanoaina o a latou taimi taua, e auai atu ai aua se mataupu taua e manaomia ona soalaupuleina.  Ona soso’o ai lea ma le faalauiloa atu e le pulea’oga ia le maliu fa’afuase’i o le ave pasi a le aoga, o Paulo, ona o se faalavelave faafuasei.

Sa ta’ua e le pulea’oga, o le alii o Paulo ua lata i le 5 tausaga talu ona avea ma ave pasi a le latou aoga ma e leai lava se ripoti leaga po o se fa’alavelave na tula’i mai talu ona faigaluega Paulo.  Sa fa’aauau le faamatalaga a le pulea’oga, i le ‘oto’otoina o mea uma sa tupu i le aso ananafi, se’ia o’o mai i le latou talanoaga ma matua, lea na tatalaina iai a latou fanau, e ave i le fale ma le faaiuga ina ia leai se aoga i lea aso, ae o le tu’u le avanoa e mafuta ai matua ma a latou fanau.

Ua mae’a le folasaga a le pulea’oga ona ia faapea atu lea, “Ae ua iai se ripoti ua o’o mai i lo’u ofisa, e ao ona outou nofo uta iai ma o le autu lea o le tatou auai mai i lenei taeao.”

[E FAIA PEA]